Kela almostit uđđâ anarâškielâlijd siijđoid

Kela áávvud sämmilij aalmugpeeivi 6.2. almostitmáin uđâsmittum anarâškielâlijd viermisiijđoid. Siijđoin muštâleh ovdiist vijđásubbooht Kela hiäđuin já Kela sämikielâlijn palvâlusâin. Viermisiijđoi paaldâst Kela almostit sämikielâlijd hiätutieđettemčáállusijd já uuccâmluámáttuvâid.

Uđđâ anarâškielâliih viermisiijđoh västideh siskáldâs peeleest moonnâm ive almostittum čielgâsuomâkielâlijd já tavesämikielâlijd viermisiijđoid. Siijđoh láá juohhum käävci fáádán eellimtile mield: aassâm, iäláttuvah, pärniperruuh, varrim Suomân tâi Suomâst olgoenâmáid, oppâm já viärjukenigâsvuotâ, puáccám já vajoidittem, áigápuátutoorjâ sehe pargottesvuotâ. Toos lasseen siijđoin muštâleh Kela sämikielâlii äššigâspalvâlmist sehe torjui ucâmist já mäksimist. Sijđoid puátih meid Kela äigikyevdileh tiäđáttâsah.

Säämi kielâlaahâ täähid sämmiláid vuoigâdvuođâ ášástâllâđ virgeomâháiguin jieijâs eenikielân. Sämikielâlij viermi- já káiduspalvâlusâi vievâst sämikielâliih pyehtih ášástâllâđ ovdiist pyerebeht jieijâs kielân aassâmsaajeest peerusthánnáá. Viermipalvâlusâi mield puáhtá väldiđ huámmášumán meid uccâ kielâjuávhui táárbuid.

Anarâšâi jieijâs kielâ, anarâškielâ, lii uhkevuálásâš ucceeblohokielâ. Anarâšâi ärbivuáváliih aassâmkuávluh láá Aanaarjäävri pirrâsist. Anarâškielâst láá ain lamaš uccáá sárnooh mutâ aktiivlii iäláskittem mield kielâ lii majemui iheluuvij ääigi finnim meid uđđâ sárnoid.

Sämmilij aalmugpeivi 6.2. Kelast

Kela miärkkoo sämmilij aalmugpeeivi liipputmáin sämilippuin váldutoimâtáálust Helsig Töölöst. Juhlepeivi miärkkoo meid Kela ornijdumeviestâdmist: Kela intranetist muštâleh sämmilijn, sämikielâin já sämikielâlijn palvâlusâin.

Kela uásálist sämmilij aalmugpeeivi áávvudmân meid sämikuávlust Anarist, Suomâ sämmilij kuávdáást.

Meid luámáttuvah já tieđettemčáálluseh sämikielân

Viermisiijđoi lasseen Kela almostit tehálumosijd uuccâmluámáttuvâid já hiätutieđettemčáállusijd sehe äigikyevdilijd tiäđáttâsâid puoh Suomâst sarnum sämikielân. Tavesämikielâliih uuccâmluámáttuvah láá almostittum jo ovdil.  Anarâškielâliih luámáttuvah almostuveh 2.3.2020. Nuorttâlâškielâliih viermisiijđoh já luámáttuvah almostuveh, ko tai jurgâlusah valmâštuveh.

Sämikielâlij luámáttuvâi tevdimân tiäturáin tâi eres piergâsáin tarbâšuvvoo Adobe Reader –ohjelm já jieškote-uv sämikielâ miäldásâš puállupevdivuájáán. Ucâmušâid já tai lahtosijd sehe sämikielâlijd saavâid puáhtá toimâttiđ Kela šleđgâlii ášástâllâmpalvâlus peht lahtosin tâi poostâ peht. Sämikielâlii ášástâlmist muštâluvvoo lase uđâsmittum viermisiijđoi Äššigâspalvâlem-uásist.

Kela sämikielâlij palvâlusâi já viestâdem ovdedem vuolgâsaijeen láá sämikielâlij äššigâsâi kielâliih vuoigâdvuođah já sierânâstáárbuh. Kela oovded sämikielâlij äššigâsâi palvâlusâid oovtâstpargoost Suomâ sämitiggijn.

Pyeri sämmilij aalmugpeivi!

Uáppáásm sämikielâláid kela.fi-sijđoid www.kela.fi/anaraskielan.