Juos buohccát

Juos buohccát dahje juos dus gávnnahuvvo váddu, sáhtát oažžut Kela ruđalaš doarjaga. Juos buohcuvuohta dahje váddu váikkuha du beaivválaš birgemii dahje bargonávccaide, sáhtát oažžut Kelas veajuiduhttima.

Kela buhtte earret eará oasi čuovvovaš goluin:

  • reseaptadálkasat, mat gullet buhttejuvvon dálkasiidda
  • priváhta doaktára buhtadusat
  • priváhta bátnedoaktára buhtadusat
  • mátkkit buohccedikšui, dutkamuššii dahje veajuiduhttimii.

Lassin Kela buhtte ánsomanaheami buohcuvuođa ja buohccán máná dikšuma áigge.

Kela ii buhtte divššu almmolaš dearvvasvuođafuolahusas nappo divššu dearvvasvuođaguovddážis dahje buohcceviesus.

Juos leat barggus, sáhtát fitnat maiddái bargodearvvasvuođadivššus, man bargoaddi ordne. Lassin dáhkádusfitnodagat vuvdet priváhta buohcuvuođadáhkádusaid buohccáma várás.

Juos mánná buohccá

Juos mánná buohccá, de sáhtát doalvut su dearvvasvuođaguovddážii dahje priváhta doaktárii.

Kela buhtte oasi priváhta doaktára mávssuin. Dán lassin Kela buhtte oasi dálkasiid hattis.  Dearvvasvuođaguovddáža divššu Kela ii buhtte.

Juos vuollel 10-jahkásaš mánná buohccá, ovdamearkka dihte nurvui ja feberii, sáhtát báhcit ruoktot dikšut su. Dát gohččoduvvo gaskaboddasaš dikšunfriddjan. Sáhtát dikšut máná eanemustá 4 bargobeaivvi. Eanaš bargoaddit mákset bálkká gaskaboddasaš dikšunfriddja áigodagas. Kela ii mávsse doarjaga dán áigodagas.

Sierradikšunruhta

Juos divššut buohcci dahje lámis vuollel 16-jahkásaš máná, sáhtát ohcat Kelas sierradikšunruđa.
Sáhtát oažžut sierradikšunruđa, juos gárttat leat eret barggus

  • máná buohcceviessodikšuma dihte
  • máná buohcceviessodikšumii laktáseaddji ruovttudikšuma dihte
  • máná veajuiduhttima dihte
  • máná skuvla- dahje beaivedikšuniskkadeami dihte.

Sierradikšunruhta lea seamma stuoris go buohcuvuođabeaiveruhta. Dan oažžumii váikkuhit máná ahki, buohcuvuohta, dikšunbáiki ja divššu muddu.

Ohcamuššii galgá laktit doaktára D-duođaštusa, mas ákkastallo, manin dárbbašat sierradikšunruđa.

Oza sierradikšunruđa 4 mánotbaji siste dikšuma álgimis.

Loga lasi sierradikšunruđa ohcamis (suomagillii).

Kela-koarta

Juos dus lea Kela-koarta, oaččut dainna njuolga buhtadusa dikšungoluin máŋga priváhta doavtterstašuvnnas. Ná don it dárbbaš ohcat buhtadusa sierra. Kela addá Kela-koartta buohkaide, geat gullet Suoma sosiáladorvui. Koarta lea nuvttá ja dat sáddejuvvo ruoktot.

Sáhtát diŋgot Kela-koartta bálvalannummiris 020 692 204.

Eurohpalaš buohccedikšunkoarta

Juos mátkkoštat eará Eurohpá riikkain, lea buorre juos dus lea mielde eurohpalaš buohccedikšunkoarta.

Sáhtát diŋgot eurohpálaš buohccedikšunkoartta neahtas dahje riŋget bálvalannummirii 020 692 204.

Koarta lea nuvttá. Dat postejuvvo ruoktot.

Juos buohccát fáhkkestaga, čájet koartta ja identitehtaduođaštusa olgoriikka dikšunbáikkis. Koarta dohkkehuvvo EU- ja Edg-riikkain ja Sveiccas. Ovdal mátkki gánneha váldit čielgasa das, mo guđege riikkas galgá doaibmat, juos buohccá.

Loga lasi eurohpálaš buohccedikšunkoartta geavaheamis olgoriikkain (suomagillii).

Juos dus ii leat eurohpalaš buohccedikšunkoarta mielde, sáhtát ohcat buhtadusaid maiddái maŋŋeleappos Kelas.

Lassin dáhkádusfitnodagat vuvdet mátkedáhkádusaid, mat buhttejit dikšungoluid.

Loga lasi