Ääiʹjvaʹrrjummuš neeʹttest ođsmââvv – pueʹttiääiʹj äʹššneeʹǩǩest feʹrttai tobddeed

Kela oođad čõhččmannust neʹttkääzzkõõzz, koʹst äʹššneǩ vuäitt vaʹrrjed ääiʹj Kelaaʹje. Ođđ kääzzkõs lij čiõlǥâs, tõn lij hiâlpp ââʹnned di tõt ânnʼjââvv mobiilaparaattid. Teâttstaan ainsmâʹttem diõtt äʹššneǩ âlgg tobddeed ouddâl ko son vuäitt vaʹrrjed ääiʹj.

Kela väldd ââʹnnma ođđ ääiʹjvaʹrrjemriâšldõõǥǥ podd pooddi čõhččmannu 20. peeiʹvest ääʹljeeʹl. Ođđ kääzzkõs lij čiõlǥâs, tõn lij hiâlpp ââʹnned di tõt ânnʼjââvv mobiilaparaattid. Tõt lij še vuällamlaaǥǥan, leʹbe tõn vuäitt ââʹnned jeeʹresnallšem veäʹǩǩneävvaivuiʹm, mâʹte teâttikkânlookkâmprograammivuiʹm.

Ođđ kääzzkõs hiâlpat še vaʹrrjõõzzi seuʹrrjummuž da vaaldšummuž. Äʹššneǩ vuäitt kuäʹss täättas ǩeeʹrjtõõttâd kääzzkõʹsse, jõs son haaʹlad täʹrǩsted ääiʹj leʹbe tõõzz kuulli teâđaid. Vaʹrrjum ääiʹj lij še hiâlpp muʹtted leʹbe jårrâʹstted.

Ääiʹjvaʹrrjummuš lij mäŋggsi miõl mieʹldd da mobiilaparaatti âânnmõš lij lâssnam

Oođummuž tueʹǩǩen lij tõt, što ääiʹjvaʹrrjummuš lij mäŋggsi miõl mieʹldd di što lij tarbb oouʹdeed teeknlaž riâšldõõǥǥid. Eeʹjj 2020 äʹššneeʹǩǩ äʹššee ääiʹjvaʹrrjummšin 246 000 vuâra, oouʹdab eeʹjj 207 500 vuâra. Ääiʹjvaʹrrjummuš suäpp jeäʹrben vuõʹjjid, koin äʹššneeʹǩǩest lij määŋgmåkksaž vueʹǩǩ leʹbe suʹst lie jiânnai ääʹšš seʹlvvtemnalla.

Šuurab joukk lij âʹnškuättam Kela neʹttseeidaid da -kääzzkõõzzid mobiilaparaattin. Ouddmiârkkân eeʹjj 2020 kela.fi-seeidai õõʹnnʼjin 61 % kõʹllʼje seeidain mobiilaparaattivuiʹm da 35 % teâttmašinaivuiʹm.

Ođđ kääzzkõʹsse feʹrttai tobddeed

Teâttstaan ainsmâʹttem diõtt äʹššneǩ âlgg tobddeed ouddâl ko son vuäitt vaʹrrjed ääiʹj ođđ riâšldõõǥǥâst. Tobddummuš oʹnnast neʹttbaŋkktiõttivuiʹm, mobiilstaanõõǥǥin leʹbe staanõk-koortin.

Nuʹbb ooumaž vuäitt vaʹrrjed ääiʹj tiuddâkksaž äʹššneeʹǩǩ peäʹlest, jõs äʹššneǩ lij ouddam suʹnne väʹlddvuõđ Suomi.fi-kääzzkõõzzâst. Takai väʹlddǩiiʹrjin ääiʹjvaʹrrjummuš ij oʹnnest nuuʹbb oummu peäʹlest neeʹttest. Vueʹllâkksaž päärna huõlteei vuäitt vaʹrrjed ääiʹj päärnžasas pååđ väʹlddvuõđtää Suomi.fi:st.

Ođđ riâšldõõǥǥ vääʹldet ââʹnnma 20.9. ääʹljeeʹl

Ođđ riâšldõõǥǥ vääʹldet ââʹnnma podd pooddi 20.9. ääʹljeeʹl, kuäʹss ânnʼjõž riâšldõõǥǥ âânnmõš poott. Jõs äʹššneǩ lij vaʹrrjam ääiʹj ouddâl 20.9., ääiʹj täʹrǩstummuš da jårrâsttmõš oʹnnste teʹlfoonâst.

Neeʹttest vuäitt vaʹrrjed aaiʹjid tåʹlǩ teʹlfonkääzzkõʹsse. Pueʹttiääiʹj ääiʹj vuäitt vaʹrrjed še soiʹttjeeʹl Kela teʹlfonkääzzkõʹsse. Jõs äššad kaiʹbbai jeällmõõžž kääzzkâʹsttempääiʹǩest da ââldmõs päiʹǩǩ toiʹmmai tåʹlǩ ääiʹjvaʹrrjummšin, soiʹtte Kela teʹlfonkääzzkõʹsse.

Sääʹmǩiõllsaž kääzzkõʹsse vuäitt kueʹđđed såittraukkmõõžž

Sääʹmǩiõllsaž äʹššneǩ vuäitt õinn kueʹđđed õhttvuõttväʹlddemraukkmõõžž še Kela sääʹmǩiõllsaž teʹlfonkääzzkõʹsse vuõltteeʹl saaǥǥ saame@kela.fi -neʹttpååʹštaddrõʹsse. Saaǥǥâst âʹlǧǧe käunnʼjed nõmm da teʹlfon-nââmar di teâtt tõʹst, mâid äʹšš kuâskk.

Kela sääʹmǩiõllsaž kääzzkâʹsttemäʹšštobddi leʹbe Kela vaʹrrjem tulkk väldd õhttvuõđ äʹššnekka, što suäʹppe ääʹšš håiddmest. Aanar- da nuõrttsääʹmǩiõllsaž äʹššummuž hoiʹddjet tuulk veäkka.

Kela tâʹvvsääʹmǩiõllsaž teʹlfon- da ougglõskääzzkõs lij äävai aarǥi čiâss 13 –15.

Looǥǥ lââʹzz