Áigevárren neahtas ođasmuvvá – boahttevuođas áššehas galgá čálihit sisa

Kela ođasmahttá čakčamánus neahttabálvalusa, man bokte áššehas sáhttá várret áiggi Kelai. Ođđa bálvalus lea čielggas, álki ja heive mobiilarusttegiidda. Diehtodorvvu sihkkarastima várás áššehas galgá čálihit sisa, ovdalgo son sáhttá várret áiggi.

Kela váldá geavahussii ođđa áigevárrenvuogádaga vehážiid mielde čakčamánu 20. beaivve rájes. Ođđa bálvalus lea čielggas ja álki, ja dat heive mobiilarusttegiidda. Dat lea maiddái olámuttos, nappo dan sáhttá geavahit iešguđetlágan veahkkeneavvuin, nugo ruvttolohkanprográmmain.

Ođđa bálvalus álkidahttá maiddái várremiid čuovvuma ja hálddašeami. Áššehas sáhttá goas beare iežas čálihit bálvalussii, juos son háliida dárkkistit iežas várren áiggi dahje dasa gullevaš dieđuid. Várrejuvvon áiggi lea maiddái álki rievdadit dahje juo šluhttet.

Duohken áigevárrema bivnnutvuohta ja mobiilarusttegiid geavaheami lassáneapmi

Ođasmahttima duohken lea áigevárrema bivnnutvuohta ja dárbu ovddidit teknihkalaš vuogádagaid. Jagi 2020 áššehasat dikšo áššiideaset áigevárremiin 246 000 geardde, jagi ovdal 207 500 háve. Áigevárren heive eandalii diliide, main áššehasas lea mohkkás dilli dahje olu čilgen láhkai.

Ain eanebut geavahit Kela neahttasiidduid ja -bálvalusaid mobiilarusttegiin. Ovdamearkan jagi 2020 kela.fi-siidduid geavaheaddjiin 61 % galledii siidduin mobiilarusttegiin ja 35 % dihtoriin.

Ođđa bálvalussii galgá čálihit iežas

Diehtodorvvu sihkkarastima dihtii áššehas galgá čálihit sisa, ovdalgo son sáhttá várret áiggi ođđa vuogádagas. Sisa čáliheapmi lihkosmuvvá neahttabáŋkodovddaldagain, mobiilasihkkarastiin dahje sihkkarastingoarttain.

Nuppi olmmoš sáhttá várret áiggi dievasahkásaš áššehasa beales, juos áššehas lea addán sutnje fápmudusa Suomi.fi-bálvalusas. Dábálaš váldegirjjiin áigevárren ii lihkosmuva nuppi olbmo beales neahtas. Agivuloš máná fuolaheaddji sáhttá várret áiggi mánnái almmá sierra fápmudusa haga Suomi.fi:s.

Ođđa vuogádat váldo atnui 20.9. rájes

Ođđa vuogádat váldo atnui vehážiid mielde 20.9. rájes, goas dálá vuogádaga geavaheapmi nohká. Juos áššehas lea várren áiggi ovdal 20.9., áiggi dárkkisteapmi ja šluhtten lihkosmuvvet telefovnna bokte.

Neahta bokte sáhttá várret áiggiid dušše telefonbálvalussii. Boahttevuođasge áiggi sáhttá várret maiddái riŋgemiin Kela telefonbálvalussii. Juos du ášši eaktuda fitnama bálvalanbáikkis ja lagamuš doaibmabáiki doaibmá dušše áigevárremiin, riŋge Kela telefonbálvalussii.

Sámegielat bálvalussii sáhttá guođđit riŋgenbivdaga

Sámegielat áššehas sáhttá ainge guođđit oktavuođaváldinbivdaga maiddái Kela sámegielat telefonbálvalussii sáddemiin dieđu saame@kela.fi -šleađgapoastačujuhussii. Bija šleađgapostii iežat nama ja telefonnummira ja dieđu das, maid ášši guoská.

Kela sámegielat bálvalanáššedovdi dahje Kela várren tulka váldá oktavuođa áššehassii soahpan dihtii ášši dikšumis. Anáraš- ja nuortalašgielat áššedikšun doibmejuvvo tulkka vehkiin.

Kela davvisámegielat telefon- ja gáiddusbálvaleapmi lea rabas árggaid dmu 13–15.

Loga lasi