Hååid Kela-aaʹššid ääiʹjbeäʹlnn ouddâl jooul – pââʹzz vaaikte tuärjjõõzzi mähssmõʹšše

Kela-aaʹššid kaʹnnat håiddad ääiʹjbeäʹlnn ouddâl jooul, ǥu pââʹzz vaaikte ouddõõzzi mähsspeeiʹvid, da eeʹjjvaajtõs lij Kelast ǩirrsaž äiʹǧǧ.

Piʹrǧǧeemtuärjjõs âstt tiʹlle ouddâl jooul, jõs ooccmõš da meâlddõõzz liâ tååimtum mââimõõzzâst 10.12. Jooul ääiʹjad še tuejteʹmesvuõttääiʹj iʹlmmtõs- da mähsspeeiʹvid.

Jooul põõʹzzin da ođđeeʹjjpeiʹvven Kela kääzzkâʹsttempääiʹǩ da teʹlfonkääzzkõs liâ ǩidd. Lââʹssen eeʹjjvaajtõs da eeʹjj vuõssmõõzz neäʹttel liâ Kelast täujja ǩirrsa.

Vuäǯǯad piʹrǧǧeemtuärjjõõzz ääiʹjbeäʹlnn

Jooulmannust piʹrǧǧeemtuärjjõõzz mââimõs mähsspeiʹvv ouddâl jooul lij 23.12. Tuärjjõs âstt tâʹl tiʹlle, jõs ooccmõš da taarbšeei meâlddõõzz liâ tååimtum Kelaaʹje mââimõõzzâst 10.12.

Jõs äʹššneǩ taarbaš piʹrǧǧeemtuärjjõõzz ǩirrsânji, suʹst feʹrttai väʹldded õhttvuõđ Kela kääzzkâʹsttempäikka leʹbe kääzzkõsnââmra 020 692 207 (lääddas) leʹbe 020 634 2894 (tâʹvvsääʹmǩiõʹlle). Ǩirrsallaš vueʹǩǩ vuäitt leeʹd ouddmiârkkân akuutt tarbb mähssčõnnõõttâmpõʹmmja talkksi leʹbe poorrâmtarbbsi diõtt.

Jõs äʹššneǩ taarbaš piʹrǧǧeemtuärjjõõzz ǩirrsânji Kela äävaiåårramaaiʹji åålǥbeäʹlnn, kåʹdd vuäitt tuʹmmjõõzzes mieʹldd miõttâd cõggi piʹrǧǧeemtuärjjõõzz. Akuuttâst kriisvueʹjjest jooul põõʹzzi poodd äʹššneǩ vuäitt leeʹd õhttvuõđâst jälstemkååʹddes sosiaalpeiʹvvrõõttmõʹšše.

Iʹlmmet tuâjteʹmesvuõttpeeiʹvid ääiʹjbeäʹlnn

Jooul ääiʹjad tuejteʹmesvuõttääiʹj iʹlmmtõs- da mähsspeeiʹvid. Vuäinak OmaKelast leʹbe vuäǯǯmad iʹlmmtõslomaakkâst peeiʹv, kuäʹss vuäitak kueʹđđed jiijjad iʹlmmtõõzzad.

Jõs tuejteʹmesvuõttääiʹj iʹlmmtõõzz podd poott 21.12.2021

  • iʹlmmtõõzz vuäitt maaccted 21.12.2021
  • tieʹǧǧ liâ tiillâst ääiʹjmõsân 23.12.2021.

Jõs tuejteʹmesvuõttääiʹj iʹlmmtõõzz podd poott 22.12.2021

  • iʹlmmtõõzz vuäitt maaccted 22.12.2021
  • tieʹǧǧ liâ tiillâst ääiʹjmõsân 27.12.2021.

Jõs tuejteʹmesvuõttääiʹj iʹlmmtõõzz podd poott 23.12.2021

  • iʹlmmtõõzz vuäitt maaccted 23.12.2021
  • tieʹǧǧ liâ tiillâst ääiʹjmõsân 28.12.2021.

Iʹlmmtõs kaʹnnat tååimted äššʼstõõllâmkääzzkõõzzâst juʹn maacctempeeiʹv tueʹlää, što tõt õõstât ǩiõttʼtõõllâd vueiʹtlva sõrgg.

Teʹlfonkääzzkõs lij äävai jooul da ođđeeʹjj kõskkarggpeeiʹvin

Teʹlfonkääzzkõs lij jooul da ođđeeʹjj kõskksaž neäʹttlest äävai čiâss 9–16. Ođđeeʹjjkäänʼnen teʹlfonkääzzkõs lij äävai čiâss 9–13, leša piʹrǧǧeemtuärjjõõzz kääzzkõsnââmar peiʹvvrââtt čiâss 16 räjja.

Kääzzkâʹsttempaaiʹǩi äävaiåårramaaiʹjin vueiʹtte leeʹd muttâz jooul da ođđeeʹjj kõskkarggpeeiʹvin da ođđeeʹjj mâŋŋa. Äävaiåårramaaiʹjid da jååʹttemaddrõõzzid kaʹnnat taʹrǩsted kela.fin kääzzkâʹsttempääiʹǩ ooccmest. Aanar kääzzkâʹsttempäiʹǩǩ (Âʹvvel) lij äävai seärad čiâss 10–12 da čiâss 13–15.

Piâtnâc äävai åårrai kääzzkâʹsttempääiʹǩ mâʹnne ođđeeʹjjkäänʼnen ǩidd čiâss 13. Puõʹtti kääzzkâʹsttempääiʹǩ vieʹǩǩte ǩirrsallaž piʹrǧǧeemtuärjjõõzz taarbšeeʹjid čiâss 16 räjja:

  • Espoo / Leppävaara
  • Heʹlssen / Kamppi
  • Hämeenlinna
  • Järvenpää
  • ­­­Jyväskylä
  • Kajaani
  • Kirkkonummi
  • Kokkola
  • Kotka
  • Kouvola
  • Kuopio
  • Lahti
  • Lappeenranta
  • Lohja
  • Oulu
  • Pori
  • Porvoo
  • Raisio
  • Rauma
  • Ruäʹvnjargg
  • Salo
  • Seinäjoki
  • Tampere
  • Turku kääzzkâʹsttempäiʹǩǩ
  • Vaasa
  • Vantaa / Tikkurila

Tuäivtep äʹššniiʹǩǩid rääuhlõs jooul da leklvaž ođđ eeʹjj 2022!

Looǥǥ lââʹzz