Kela viättá sämikielâi oho – sämikielâliih palvâlusah ovdeduvvojeh oovtâst kielâsiärváduvváin

Sämikielâi oho ulmen lii finniđ sämikielâid uáinusân já kulosân puoh ohtsâškode uásisuorgijn. Kelast viettip sämikielâi oho ovdedempargo ooleest.

Sämikielâi oho ohtsâš ulmen lii finniđ sämikielâid uáinusân já kulosân puoh ohtsâškode uásisuorgijn. Sämitige saavâjođetteijee Tuomas Aslak Juuso tuáivu, ete nuuvt maaŋgâ tuáimeeh ko máhđulâš váldáččii uási sämikielâi ookon:

– Ko kielâ uáinoo jyehi peeivi, te tot puáhtá tobdo, ete mii kielâ lii tuhhiittum, tast lii árvu já tot kulá ohtsâškoodán.

Sämikielâi okko uáinoo Kelast sehe Kela pargeid já äššigâssáid čujottum viestâdmist. Huámmášume finnee taan ive eromâšávt sämikielâlii palvâlem ovdedem já oovtâstpargo sierâ tuáimeiaguin.

Sämikielâi ohhoost viestâdep meid Kela pargeid

Sämikielâ tahhoo uáinusân já kulosân kielâoho ääigi meid Kela siste. Ulmen lii, ete Kela jyehi pargee tobdá sämmilij kielâlijd vuoigâdvuođâid já máttá stivriđ sämikielâlii äššigâs jieijâskielâlii palvâlusân.

Kela fáálá puoh Kela pargeid máhđulâšvuođâ Sämmiliih Kela äššigâssân -nettikuursâ čođâlditmân. Kurssâ lii tievâs tiätupakkeet sämmilii kulttuurist já sämmilij kielâlijn vuoigâdvuođâin. Meid eres ornijduumij pargeeh peesih forgâ uápásmuđ Kela pyevtittem Moodle-nettikuursân eOppiva peht.

Teemaoho ääigi äššitobdeeh, kiäh pargeh Kela sämikielâlii palvâlem ooleest, muštâleh Kela eres pargeid jieijâs koskâvuođâst sämikielân já -kulttuurân. Siämmást sij jyehih feerimijd tast, ete maggaar lii porgâđ sämikielâlij palvâlusâi ooleest Kelast.

Kela oovded sämikielâlijd palvâlusâid oovtâst sämmilijguin

Kela oovded sämikielâlijd palvâlusâid oovtâstpargoost sämmilii kielâsiärváduvváin. Ovdedemtooimâin räđideh jyehi ive oovtâst sämitiggijn. Kela já sämitige ovdâsteijeeh teivih čuávvoo tove Anarist skammâmáánust.

Sämikielâlij palvâlusâi oovdedmist aneh ävkkin meid äššigâsraađijd. Ive 2021 ääigi tollum sämikielâlii palvâlus äššigâsraađijd láá uásálistám puoh Suomâst sarnum sämikielâi ađai tave-, anarâš- já nuorttâlâškielâ sárnooh. Äššigâsraađijn äššigâsah peesih árvuštâllâđ tom, ete mon pyereest Kela palvâlusah västideh sii tuoivuid já tárboid.   

Kela uásálist meid sämikielâlij palvâlusâi kvaliteetpaargon. Soti-ráhtusuđâsmittem Laapist -haahâ ornij kiiđâ 2021 ääigi sämikielâlii palvâlem kvaliteetpargopáájáid. Pargopáájái vuáđuld rahtum ohtsijd sämikielâlij já sämikulttuur miäldásij soti-palvâlusâi kvaliteetavžuuttâsah valmâštuveh čoovčâ ääigi. Avžuuttâsah tuárjuh puátteevuođâst meid Kela sämikielâlij palvâlusâi ovdedem.

Ovdil mainâšum ovdedemtoimâiguin viggeh visásmittiđ sämmilij kielâlij já kulttuurlij vuoigâdvuođâi olášume Kela palvâlusâin.

Sämikielâlâš viestâdem palvâlusâi toorjân

Kela sämikielâlii viestâdem ulmen lii faallâđ tiäđu Kela palvâlusâin já hiäđuin kuulmâ sämikielân. Kelast lii porgâm sämikielâlii viestâdem äššitobdee ive 2020 rääjist.

Kela almostitij sämikielâlijd nettisiijđoid 2019–2020 já fáálá Elämässä.fi-siijđoin ášástâllâmoonâid meid sämikielân. Toos lasseen Kelast láá printtimnáál tieđettemčáálluseh já ravvuuh sehe 30 hiätuluámáttâhhâd sämikielân.

Enijpakettân puáhtá puátteevuođâst finniđ meid sämikielâlii vuosâkirje. Ovdil vuosâkirje lii lamaš finniimist tuš printtimnáál pdf-vuárkkán tavesämikielân. Čuávvoo vuosâkirje almostittoo olmâ kirjen puoh kuulmâ sämikielân.

Šleđgâlâš ášástâllâmpalvâlem sämikielân puátimin

Lavâlâšvuotâkoccee kiddij ive 2019 huámmášume toos, ete Kela ij faalâ šleđgâlii ášástâllâm sämikielân. Kela ulmen lii tivvoođ taam vänivuođâ. OmaKela-ášástâllâmpalvâlem sämikielâliih tooimah ovdeduvvojeh eidu, já láá árvuštâllâm, ete vuossâmuuh uásih liččii valmâšeh ive 2022.

Sämikielâlii palvâlem pargopáájáh kuoimijd

Kela uárnee juovlâ-uđđâivemáánust rááiđu nettipargopáájáid sämikielâlii palvâlmist. Toh láá uáivildum virgeomâhái, kieldâi já pyereestvaijeempalvâlusâi äššitobdeid, kiäh pargostis kuáhtájeh sämikielâlijd äššigâsâid.

Pargopáájáin uápásmep sämikielâlij äššigâsâi tárboid já suogârdep oovtâst čuávdusijd sämikielâlij palvâlusâi falâmân. Almottât pargopáájáid tääbbin (lyyti.fi)!

Pyeri sämikielâi okko!

Luuvâ lase