Rihkolaččat snugget báŋkodovddaldagaid – seaillut neavvagiid dorvvolaš áššedikšuma várás

Kela, Guovddášrihkuspoles ja Kyberdorvvolašvuođaguovddáš ávžžuhit fuolalašvuhtii, go čálihat iežat sisa neahttabálvalusaide. Rihkolaččat jearahallet báŋkodovddaldagaid báŋkkuid ja Omakanta-bálvalusa namas. Amma don divššut áššiidat neahta bokte dorvvolaččat ja fuobmát dájuhemiid. Muital dájuhemiid birra maiddái iežat lagamuččaide.

Suomas lea leamaš giđa rájes jođus aggressiivvalaš dieđuid jearahallan, mas rihkolaččat leat ožžon háldoseaset neahttabáŋkodovddaldagaid ja dasto lihkosmuvvan suoládit ruđaid priváhtaolbmuid báŋkokonttuin.

Albma siidduid lágan dájuhansiiddut leat leamaš jođus eandaliige báŋkkuid ja dál maiddái Omakanta-bálvalusa namas. Go oaffar čállá neahttabáŋkodovddaldaga dájuhansiidduide, rihkolaččat besset oaffara neahttabáŋkui.

Ovdamearka dájuhanpoasttas, mii leamaš Nordea namain.

Ale čálit iežat bálvalusaide njuolgga neahta ohcanmašiinnas

Dájuhanpoasttat, mat jearahallet báŋkodieđuid, lávdaduvvojit teakstasániid ja šleađgapoasttaid bokte. Dájuhansiidduide lea vejolašvuohta gártat maiddái liŋkkaid bokte, mat leat coggojuvvon ohcanmašiidnabohtosiidda. Omakanta-bálvalusa dájuhansiidduide dál gártá namalassii ohcanmašiinnaid (ovdamearkan Bing, Google) bokte. Ale goassige čálit Omakantai njuolgga ohcanmašiinna bokte.

Juos eahpidat ahte du báŋkodieđut leat gártan boastto gieđaide, váldde dalán oktavuođa iežat báŋkui ja bargga dan maŋŋá rihkusalmmuhusa polesii.

Dorvvolaš áššedikšun neahttabáŋkkus

Ná čálihat iežat neahttabáŋkui dorvvolaččat:

  • Čále bláđejeaddji čujuhusgieddái báŋkku olles čujuhusa.
  • Vurke neahttabáŋkku čujuhusa iežat bláđejeaddji bustávvamearkkaide.
  • Ale sirdás báŋkku neahttasiidduide ohcanmašiinna bohtosiid bokte.
  • Geavat báŋkku iežas mobiilaheivehusa.

Dorvvolaš áššedikšun Omakantas

Ná čálihat iežat Omakanta-bálvalussii dorvvolaččat:

  • Čále bláđejeaddji čujuhusgieddái čujuhusa kanta.fi, man bokte beasat čálihit iežat Omakantai.
  • Vurke čujuhusa bláđejeaddji bustávvamearkkaide.
  • Ale čálit iežat Omakanta-bálvalussii njuolgga ohcanmašiinna bohtosiid bokte.

Omakanta geavaheapmi lea dorvvolaš, go čuovut iežat čáliheamis dáid rávvagiid. Omakantas sáhtát geahčadit iežat dearvvasvuođadieđuidat ja ovdamearkan bivdit reseaptta ođadeami. Omakantas ii leat sierra mobiilaheivehus.

Kela namas leat jearahallon dieđut maiddái telefovnna bokte

Kela dihtui lea boahtán dáhpáhus, mas olmmoš lea ožžon riŋgga Kela namas doaibmi dájuheaddjis. Riŋgejeaddji lea čuoččuhan, ahte son dárbbaša olbmos earret eará dieđuid, mat laktásit báŋkokontui. Kela lea bargan rihkusalmmuhusa ja čielggadan ášši eará virgeoapmahaččaiguin.

Kela bargit eai goassige jeara geavaheaddjidovddaldagaid, suollemassániid dahje dovddaldatnummiriid, maiguin čálihuvvo persovnnalaš bálvalusaide.

Juos oaččot eahpemearálaš riŋgga, mas riŋgejeaddji ovdanbuktá iežas Kela bargin, doaimma ná:

  • Botke riŋgga alege atte riŋgejeaddjái dieđuid iežat birra
  • Almmut áššis polesii
  • Almmut iežat báŋkui, juos leat addán riŋgejeaddjái dieđuid, maiguin son sáhttá beassat du báŋkokontui
  • Oahpásmuva diehtogolganrávvagiidda čujuhusas tietovuotoapu.fi

Ane fuola alddát ja iežat lagamuččain

Mis juohkehaš sáhttá fuolahit iežas lagamuččain juohkimiin dieđuid dájuhemiid birra ja veahkehemiin ovdamearkan neahttabáŋkku geavaheamis, vuoi sisa čáliheapmi dáhpáhuvvá dorvvolaččat.

Rihkolaččat leat lihkosmuvvan suoládit eandaliige badjel 60-jahkásaš suopmelaččaid neahttabáŋkodovddaldagaid ja leat sirdán stuorra supmiid oaffariid báŋkokonttuin. Ášši guoská goittotge buotahkásaš olbmuid, nu ahte juohkehaš galgá leat dárkil.