Jõs siirdčõõđak Lääʹddjânnmest ålggjânnmid

Jõs siirdčõõđak ålggjânnmid juʹn-a põõššjen leʹbe kõskkpoddsânji, iʹlmmet tõʹst Kelaaʹje, jõs tuʹnne määuʹset koon-ne Kela tuärjjõõzz. Iʹlmmet še Kelaaʹje, jõs åårrmõõžžääd mottje, ko leäk ålggjânnmin.

Iʹlmmet ouddmiârkkân

  • mättʼtõõttmõõžž leʹbe reâuggmõõžž alttõõzzâst
  • mättʼtõõttmõõžž leʹbe reâuggmõõžž jõskkmõõžžâst
  • piârkõskkvuõđi muttsest, mâʹte rätkkjummšest leʹbe õʹhtte siirdčõõttmõõžžâst pieʹllkueiʹmin.

Kõskkpoddsaž avi põõšši siirdčõõttmõš?

Vuõiggâdvuõđad Kela tuärjjõõzzid tuʹmmeet takainalla tõn vuâđald, mõõn kuuʹǩǩ ääiǥak leeʹd ålggjânnmin.

Jõs ääiǥak leeʹd ålggjânnmin jäänmõsân 6 määnpââʹj, tuʹst lij takainalla tõn äiʹǧǧen vuõiggâdvuõtt Kela tuärjjõõzzid. Teʹl vuäitak vuäǯǯad tõid Kela tuärjjõõzzid, koid määuʹset ålggjânnmid. Tõk lie ouddmiârkkân jeältõõǥǥ, päärnažlââʹss, jeäʹnnveäʹǩǩvuõtt da jeeʹres päʹrnnpiârri tuärjjõõzz.

Jõs siirdčõõđak ålggjânnmid põõššjen, tuʹst ij takainalla leäkku teänab vuõiggâdvuõtt Kela tuärjjõõzzid. Siirdčõõttâm ââʹnet põõššjen, jõs tõn lij mieʹrr peʹštted pâʹjjel 6 määnpââʹj. Teʹl vuõiggâdvuõttad Kela tuärjjõõzzid takainalla poott, ko siirdčõõđak meädda Lääʹddjânnmest. 6 määnpââʹj äiʹǧǧraajj ij leäkku seämma vueʹjjest täʹrǩǩ, jõs jälstak nuuʹbb EU-jânnmest, Etv-jânnmest leʹbe Sveiʹccjânnmest.

Jõs siirdčõõđak jeeʹres jânnma, seʹlvvet, vuäitak-a vuäǯǯad tuärjjõõzzid ođđ jälstemjânnmastad.

Riikk veʹrǧǧoummu lie vuõiggõttum Kela tuärjjõõzzid še teʹl, ko sij jälste ålggjânnmin. Jõs veʹrǧǧoummu piârneeʹǩǩ vueʹlǧǧe mieʹldd, sij âʹlǧǧe iʹlmmted siirdčõõttmest Kelaaʹje.

Lââʹssen ouddmiârkkân mättʼtõõttjin da vuõlttuum tuâjjlast vuäitt leeʹd vuõiggâdvuõtt Kela tuärjjõõzzid, håʹt sij jälsteʹče ålggjânnmin kuuʹǩǩab ko 6 määnpââʹj.

Vueʹss eeʹjjest ålggjânnmin

Jõs jälstak ålggjânnmin mieʹrrkõõski pâʹjjel peäʹl eeʹjjest, tuʹst ij takainalla leäkku vuõiggâdvuõtt Kela tuärjjõõzzid.

Looǥǥ lââʹzz