Kela doarjagat vearjogeatnegasaide

Vearjogeatnegasvuohta oaivvilda dan ahte olmmoš vuolgá soahtevehkii dahje siviilabálvalussii. Vearjogeatnegas- dahje siviilabálvalusa čađaheaddji oažžu vearjogeatnegasbáikkistis smávva beaiveruđa.

Dan lassin Kela sáhttá máksit soalddátdoarjaga. Dat máksojuvvo maiddái olgoriikkain bálvalussii boahtán vearjogeatnegassii.

Soalddátdoarjagii gullet

  • vuođđodoarjja
  • ássandoarjja
  • ealihandoarjja
  • sierradoarjja
  • oahppoloana reantodoarjja.

Soalddátveahki sáhttet oažžut

  • vearjogeatnegas
  • náittosguoibmi
  • beallelaš, jus beallelaččain lea oktasaš mánná
  • vearjogeatnegasa iežas mánná dahje náittosguoimmi mánná.

Loga lasi soalddátdoarjaga ohcamis (suomagillii).

Vuođđodoarjja

Vuođđodoarjja máksojuvvo vearjogeatnegasa oapmahaččaide. Dat gokčá beallelačča ja máná beaivválaš goluid, maidda boađut eai reahkká. Dat leat ovdamearkan borramuššii, biktasiidda ja dearvvašvuođafuolahussii gullevaš golut.

Vuođđodoarjaga dievas mearri lea 662,82 e/mb. Doarjaga mearrái váikkuhit bearraša boađut ja mánáid mearri.

Ássandoarjja

Kela máksá vearjogeatnegasa ja su oapmahaččaid govttolaš ássangoluid.

Vearjogeatnegas ieš sáhttá oaččut doarjaga dušše, jos son lea ássan iehčanasat sulaid 3 mánotbaji áigge ovdal go lea mannan bálvalussii.

Ássama goluide rehkenastojuvvojit láigu, čáhce- ja šleađgamávssut, vástta, visteloana reanttut ja bearašviesu dikšungolut.

Ealihandoarjja

Jos vearjogeatnegas ii bastte máksit mánnái ealihandoarjaga, Kela máksá mánnái ealihandoarjaga bálvalusáigge. Dat lea seammá stuoris go dábálaš ealihandoarjja.

Eará doarjagat

Kela sáhttá máksit vearjogeatnegasa oapmahažžii sierradoarjjan ovdamearkan
dearvvašvuođafuolahussii dahje mánáiddikšumii laktáseaddji goluid.

Kela sáhttá maiddái máksit vearjogeatnegasa ja oapmahačča oahppoloana reanttuid.
Oahppoloana reanttuide sáhttá ohcat Kelas maiddái reantodoarjaga.

Vaikke it oaččo soalddátdoarjaga, dárkkis Kelas, sáhtátgo oažžut almmolaš ássandoarjaga.

Jos vearjogeatnegas dahje siviilabálvalusolmmái lea áhčiidluomus, son sáhttá oažžut áhčiidruđa.