Kela mäksim iäláttuvah

Jis tun jieh uážu pargoiäláttuv tâi jis tot lii ucce, te Kela máksá tunjin aalmugiäláttuv. Kela máksá tunjin meid táhádâsiäláttuv, jis tuu eres iäláttuvah pääcih uáli uccen tâi jis tun jieh uážu monnân eres iäláttuv.

Aalmugiäláttâh

Tun puávtáh uážžuđ aalmugiäláttuv oles mere tuše, jis tun jieh uážu ollágin pargoiäláttuvâid tâi jis tun uážuh taid enâmustáá suulân 56 e/mp. Jis tun uážuh pargoiäláttuvâid eenâb, te aalmugiäláttâh lii ucceeb tâi jieh uážu tom ollágin.

Aalmugiäláttuv oles meeri lii suulân 665 e/mp. Jis tust lii pelikyeimi tâi ávuskyeimi tâi tun lah registeristum parâkoskâvuođâst, te aalmugiäláttuv oles meeri lii suulân 594 e/mp.

Aalmugiäláttâh puáhtá leđe ucceeb, jis tun lah váldám aalmugiäláttuv toledum puárásijiäláttâhân ađai ovdil 65 ive ahe. Aalmugiäláttâh puáhtá leđe ucceeb meid talle, jis tun lah aassâm olgoenâmijn.
Jis tun varriih olgoenâmáid, tot puáhtá vaiguttiđ tuu uážžum aalmugiäláttâhân. Koijâd Kela palvâlemnumerist, maht olgoenâmijn aassâm vaaigut aalmugiäláttâhân. Palvâlemnummeer lii 020 634 0200.

Aalmugiäláttuv ucedeh

  • pargoiäláttâh
  • eres tuu uážžum iäláttuvah já sajanmáávsuh.

Aalmugiäláttuv iä ucceed

  • pelikyeimi puáđuh
  • párnái tipšo ääigi nurrum iäláttâh
  • uápui jotteem ääigi nurrum iäláttâh
  • pargonavcâttesvuotâiäláttuv kerdialedem.

Kela iäláttuvâin já pargoiäláttuvâin piärroo viäru.

Aalmugiäláttuv puáturääjih

Tun jieh kannat uuccâđ aalmugiäláttuv, jis tuu eres iäláttâsah já sajanmáávsuh láá eenâb ko puáturääjih.

Kela meerrid aalmugiäláttuvâst tâi táhádâsiäláttuvâst iäskán ko lii čielgâs, ete mon ennuv tun uážuh eres iäláttuvâid.

Tun puávtáh uážžuđ aalmugiäláttuv, jis tuu eres aalmugiäláttâhân vaigutteijee iäláttuvah já sajanmáávsuh láá ucebeh ko čuávuvááh puáturääjih:

  • parâkoskâvuođâst ellee suulân 1 231 e/mp
  • ohtuu ässee suulân 1 373 e/mp.

Puáturääjih uáivildeh bruttopuáđuid adai puáđuid, main ij lah kepidum viäru. Puáturääjih sättih leđe ucebeh, jis tun lah aassâm olgoenâmijn.

Luuvâ lase Kela iäláttuvâi euromeerijn já puáturaajijn (suomâkielân).

Táhádâsiäláttâh

Tuše Suomâst ässee iäláttâhlâš puáhtá uážžuđ táhádâsiäláttuv. Tom puáhtá uážžuđ, ko lii aassâm Suomâst ucemustáá 3 ive.

Táhádâsiäláttuv oles meeri lii suullân 838 e/mp. Jis tun jieh uážu maiden eres iäláttuvâid, te tun uážuh oles táhádâsiäláttuv.

Táhádâsiäláttâh lii kuittâg ucceeb, jis tun lah uuccâm ovdil iäláttâhave toledum puárásijiäláttuv. Talle puáhtá keevvâđ tienuuvt, ete tun jieh uážu táhádâsiäláttuv.

Táhádâsiäláttuv kepideh meid

  • aalmugiäláttâh
  • pargoiäláttuvah
  • leeskâiäláttuvah
  • eres iäláttuvah, meid tun uážuh.

Toh kepiduvvojeh ollásávt oles táhádâsiäláttuvâst.

Táhádâsiäláttuv ij keeppid ovdâmerkkân tipšotoorjâ, aassâmtoorjâ, pargopuáđuh, omâdâh tâi pelikyeimi omâdâh.

Jis tun uážuh pargonavcâttesvuotâiäláttuv, tuu pargopuáđuh pyehtih kuittâg vaiguttiđ táhádâsiäláttâhân.

Perâkoskâvuođah iä vaaigut táhádâsiäláttuv miärán.

Koijâd Kela palvâlemnumerist, maht olgoenâmijn aassâm vaaigut táhádâsiäláttâhân. Palvâlemnummeer lii 020 634 0200.

Luuvâ lase táhádâsiäláttuv ucâmist (suomâkielân).