Viärjukenigâs torjuuh

Viärjukenigâsvuođâ čođâldittem uáivild suátiviehân tâi siiviilpalvâlusân moonnâm. Suátivievâst tâi siiviilpalvâlusâst orroo uážžu suu palvâlemsaajeest uccâ peiviruuđâ.

Toos lasseen Kela puáhtá mäksiđ suáldáttorjuu. Tom puáhtá mäksiđ suátivievâst tâi siiviilpalvâlusâst orroi tâi suu omâháid. Omâhâš uáivild viärjukenigâs pelikyeimi tâi ávuskyeimi, kiäin viärjukenigâsâst lii ohtâsâš páárnáš. Toos lasseen omâhááh láá viärjukenigâs jieijâs párnááh já pelikyeimi párnááh.

Kela puáhtá mäksiđ suáldáttorjuu meid ulmui, kii puátá olgoenâmijn Suomân palvâlusân.

Suáldáttorjui kuleh

  • vuáđutoorjâ
  • aassâmtoorjâ
  • elettemtoorjâ
  • sierânâstoorjâ.

Lasseen Kela puáhtá mäksiđ uáppuloovnâ riäntuid.

Suáldáttorjuu puáhtá uážžuđ

  • viärjukenigâs
  • pelikyeimi
  • ávuskyeimi, jis kuoimijn lii ohtsâš pärni
  • viärjukenigâs jieijâs pärni tâi pelikyeimi pärni.

Luuvâ lase suáldáttorjuu ucâmis (suomâkielân).

Vuáđutoorjâ

Kela puáhtá mäksiđ viärjukenigâs omâhâžân vuáđutorjuu.

Vuáđutoorjâ luávdá kyeimi já párnái jyehipiäiválijd koloid, mooid eres puáđuh iä pijssáá. Toh láá ovdâmerkkân purrâmušân, pihtâsáid já tiervâsvuođâtiipšon lahtojeijee koloh.

Vuáđutorjuu oles meeri lii 665 e/mp. Torjuu miärán vaigutteh perruu puáđuh já párnái meeri.

Aassâmtoorjâ

Kela puáhtá mäksiđ viärjukenigâs já suu omâháá kuáhtulijd aassâmkoloid.

Kela puáhtá mieđettiđ aassâmtorjuu viärjukenigâsân olssis tuše, jis sun lii aassâm jiečânávt suulân 3 mánuppaje ovdil palvâlus.

Aassâmkoloid rekinistojeh láigu, čäci- já šleđgâmáávsuh, táluservimáksu, aassâmloovnâ
riäntuh sehe peerâtáálu tipšomkoloh.

Elettemtoorjâ

Jis viärjukenigâs ij suuiti mäksiđ páárnán elettemiše, te Kela puáhtá mäksiđ elettemtorjuu suátivievâ tâi siiviilpalvâlus ääigi.

Sierânâstoorjâ já uáppuloovnâ riäntuh

Kela puáhtá mäksiđ viärjukenigâs omâhâžân ovdâmerkkân tiervâsvuođâtiipšon tâi párnáitiipšon lahtojeijee koloid. Taat kočoduvvoo sierânâstoorjân.

Kela puáhtá meid mäksiđ viärjukenigâs já suu omâháá uáppuloovnâ riäntuid.

Eres torjuuh

Jis viärjukenigâs lii ejijriijâst, te sun puáhtá uážžuđ ejijruuđâ.

Jis tun jieh pyevti uážžuđ suáldáttorjuu,  tust puáhtá leđe vuoigâdvuotâ uážžuđ almos aassâmtorjuu. Täärhist ääši Kelast.