Mäʹhtt puåtti vaaikte jälstemtuärjjõʹsse?

Vuâđđjiõččvasttõs

Ouddâl ko loopplaž jälstemtuärjjõs lij seʹlvv, jälstemkoolain ǩieʹppeet vuâđđjiõččvasttõõzz. Vuâđđjiõččvasttõõzz meärra vaaikte

  • poorrâmkååʹdd bruttopuåtti määnpââʹjest
  • vuõrâsoummi da päärnai lååkkmieʹrr poorrâmkååʹddest.

Bruttopuåtti lie puåtti, koin jie leäkku valddum meädda piiđ.

Mõõn šuurab puåtti lie, tõn šuurab lij vuâđđjiõččvasttõs. Jõs puåtti lie samai occka, vuâđđjiõččvasttõs ij leäkku ni vooʹps.

Puåtti

Jälstemtuärjjõõzz meärra vaaikte

  • tiânnâz (ouddmiârkkân päʹlǩǩpuåđ, koʹst lij tuejjuum tiânâsǩeäʹppõs)
  • kapitaalpuåtti (ouddmiârkkân vuåkrrpuåtti da teäʹǧǧruõkkmi koorǥ)
  • määŋg tuärjjõõzz (ouddmiârkkân reâuggmarkkântuärjjõs, mätt-teäʹǧǧ, jeältõõǥǥ da puõʒʒâlmpeiʹvvteäʹǧǧ).

Jälstemtuärjjõõzz meärra jie vaaikât

  • tiõttum tuärjjõõzz (ouddmiârkkân piʹrǧǧeemtuärjjõs, päärnažlââʹss, mätt-tieʹǧǧ huõlteeipââjõs leʹbe roodnairuåtthååid tuärjjõs)
  • mättläinn
  • poorrâmkååʹdd vueʹllâkksaž päärna puåtti
  • aaiʹji meâldla puåtti (ouddmiârkkân äʹrbb leʹbe sǩiâŋkk).

Tuʹst feʹrttai iʹlmmted puk puåttjääd jälstemtuärjjõsooccmõõžžâst. Kela vuäǯǯ teâđaid mahssum paaʹlǩin še puåđrekisteeʹrest.

Muuʹšt iʹlmmted Kelaaʹje, jõs puåttjad lâssne leʹbe ǩeäppne.

Tiânâsǩeäʹppõs

Tiânâsǩeäʹppõõzzin juuʹrdet tõn, što juõʹǩǩ poorrâmkååʹdd vuäzzla õʹhttelaʹsǩǩuum tiânnsin ǩieʹppeet 300 euʹrred määnpââʹjest. Kela ij âʹte vääʹld tän suum lokku, ko tõt laʹsǩǩad jälstemtuärjjõʹsse vaaikteei puåttji meäʹr. Tiânâsǩeäʹppõõzz vueiʹtet tuejjeed päʹlǩǩpuåttjest, jieʹllemvueʹǩǩtoiʹmmjummuž puåttjest da mäddtääl puåttjest.

Vuäǯǯak lââʹssteâđ puåttji vaaiktõõzzâst jälstemtuärjjõõzz meärra Kela neʹttseeidain.

Mäʹhtt tuärjjõõzz meäʹr laʹsǩǩeet?

Jälstemtuärjjõõzz meäʹr laʹsǩǩeet nääiʹt: Jälstemkoolain ǩieʹppeet vuõššân vuâđđjiõččvasttõõzz. Jälstemtuärjjõs lij 80 % suumâst, kååʹtt pääcc.

Vuäitak ärvvtõõllâd Kela neʹttseeidai laʹsǩǩeem-mašina veäkka, mâʹmmet vuäǯǯak jälstemtuärjjõõzz (lääddas).

Ouddmiârkk

Jääkk jäälast õhttu vuåkrrazlmest Turku-gåårdest. Aazzâlm vuåkrr lij 700 e/mp. Jakku bruttopuåtti lie 724 e/mp. Ko Jakku puåtti lie occka, vuâđđjiõččvasttõs ij leäkku.

Jakku jälstemkoollan vueiʹtet priimmâd jäänmõsân 400 e/mp. Jälstemtuärjjõõzz meäʹr laʹsǩǩeet jäänmõsjälstemkoolai mieʹldd. Tõn jeät laʹsǩǩuku Jakku vuåkr leʹbe 700 eeuʹr vuâđald.

Jakku jälstemtuärjjõs lij 80 % jäänmõsjälstemkoolain leʹbe 400 euʹrred x 0,80 = 320 e/mp.

Jääkk mähss jälstummšest jiõčč 880 e/mp (700 euʹrred – 320 euʹrred = 380 euʹrred).