Olugo sáhtát oažžut almmolaš ássandoarjaga?

Ássandoarjja sáhttá leat eanemustá 80 % dahjege njeallje viđátoassi ássangoluin. Nuba mávssátge ieš ássangoluin álot unnimustá 20 % dahjege ovtta viđátoasi.

Ássandoarjja ii goittotge máksojuvvo buot ássangoluin, baicce lágas meroštallojuvvon dohkkehuvvon ássangoluin.

Lágas meroštallojuvvojit maiddái ássangoluid eanemusmearit dahjege stuorimus euromearit, maid vuođul sáhttá oažžut ássandoarjaga. Juos ássangolut mannet badjel eanemusássangoluid, sáhtát oažžut doarjaga eanemustá eanemusássangoluid vuođul.

Eanemusássangoluide váikkuhit sihke visttis ássi ollesolbmuid ja mánáid mearri ja vistti sajádatgielda.

Vistti sajádat

Gielddat leat juhkkojuvvon njeallje sierra jovkui ássama hatti vuođul.

Vuosttas jovkui gullá dušše Helsset. Doppe ássan lea divraseamos, nuba doppe oažžu stuorimus ássandoarjaga.

Nuppi jovkui gullet

  • Espoo
  • Kauniainen
  • Vantaa.

Goalmmát jovkui gullet

  • Hyvinkää
  • Hämeenlinna
  • Joensuu
  • Jyväskylä
  • Järvenpää
  • Kajaani
  • Kerava
  • Kirkkonummi
  • Kouvola
  • Kuopio
  • Lahti
  • Lappeenranta
  • Lohja
  • Mikkeli
  • Nokia
  • Nurmijärvi
  • Oulu
  • Pori
  • Porvoo
  • Raisio
  • Riihimäki
  • Roavvenjárga
  • Seinäjoki
  • Sipoo
  • Siuntio
  • Tampere
  • Turku
  • Tuusula
  • Vaasa
  • Vihti.

Njealját jovkui gullet buot eará gielddat, muhto ii Ålánd.

Iežas joavkun leat Ålándda gielddat.

Sáhtát ieš árvvoštallat Kela siidduin rehkenastiin, man olu oaččut ássandoarjaga (suomagillii).

Ovdamearkkat

Máijjá ássá okto láigovisttis Helssegis. Son máksá láiggu 800 e/mb. Okto ássi eanemusássangollun sáhttá Helssegis dohkkehit 537 /mb. Máijá ássandoarjja rehkenasto dalle 537 euro vuođul iige su máksán 800 euro láiggu vuođul.

Duommá ássá okto vuolleláigolažžan Giemas. Son máksá láiggu 291 e/mb. Okto ássi ássangollun Giemas sáhttá dohkkehit eanemustá 364 e/mb. Duommá ássandoarjaga meari sáhttá nappo rehkenastit Duommá máksán láiggu dahjege 291 euro vuođul, danin go láiggu mearri ii mana badjel eanemusássangoluid.