Kela álggaha nuortalašgielat telefon- ja gáiddusbálvaleami

Kela álggaha vuossárgga 7.2. nuortalašgielat telefon- ja gáiddusbálvaleami rattát davvisámegielat bálvalusain. Nuortalaš- ja davvisámegielat bálvalusat leat boahttevuođas rahpasat juohke árgabeaivve iđitbeivviid. Sámegielat bálvalussii sáhttá maiddái guođđit oktavuođaváldinbivdaga.

Kela fállagoahtá telefon- ja gáiddusbálvaleami davvisámegiela lassin maiddái nuortalašgillii. Nuortalašgielat telefon- ja gáiddusbálvaleapmi rahpasa vuossárgga 7.2.2022. Telefonbálvaleapmi lea rabas doaisttážii árggaid dmu 9-11. Telefonbálvaleami nummir lea 020 634 4795. Gáiddusbálvaleami njuolggo liŋka gávdno nuortalašgielat kela.fi-siiddus. Siidduin almmuhuvvo maiddái vejolaš spiehkkasemiin bálvalanáiggiin.

Kela lea fállan nuortalašgielat bálvalusa maiddái ovdal. Bálvalus heaittihuvvui jagi 2019 loahpas go nuortalašgielat bargi sirdásii nuppi bargoaddi bálvalussii. Dán gaskkas nuortalašgielat bálvalus lea lágiduvvon tulkoma bokte dárbbu mielde.

Davvisámegielat bálvalusa bálvalanáigi rievdá

Maiddái davvisámegielat bálvalusa bálvalanáigi rievdá 7.2.2022 rájes. Bálvaleapmi lea boahttevuođas rabas árgan dmu 9-11. Telefonbálvaleami nummir lea 020 634 2894. Gáiddusbálvaleami njuolggo liŋka gávdno davvisámegielat kela.fi-siidduin. Siidduin almmuhuvvo maiddái vejolaš spiehkkasemiin bálvalanáiggiin.

Sáhtát guođđit oktavuođaváldinbivdaga sámegielat bálvalusa šleađgapoastačujuhussii juogo suomagillii dahje sámegillii. Sádde oktavuođaváldinbivdaga čujuhussii saame@kela.fi. Muital sáddagisttát iežat nama ja telefonnummira sihke dan, maid ášši guoská ja mainna gielain dárbbašat bálvalusa. Kela sámegieldáiddolaš bálvalanáššedovdi lea dutnje oktavuođas.

Anárašgielat bálvalusa oažžu dárbbu mielde tulkoma bokte. Kela lágidan tulka lea dutnje oktavuođas soahpan dihtii áššedikšuma áiggis.

Kela sámegielat bálvalusat bálvalit ássanbáikkis fuolakeahttá buot sámegielagiid, geat gullet Suoma sosiáladorvui. Kela sámegielat neahttasiidduin muitaluvvo dárkilabbot Kela fállan sámegielat bálvalusain ja Kela ovdduin sierra eallindiliin.

Sápmelaš áššehasas lea sámi giellalága vuođul vuoigatvuohta dikšut Kela-ášši iežas gielain.

Loga lasi