Kela almostitij vuossâmuid ive 2022 čielgâkielâlijd tieđettemčálusijd

Kela lii almostittâm vuossâmuid ive 2022 čielgâkielâlijd tieđettemčálusijd. Čielgâkielâliih tieđettemčáluseh oovdânpyehtih Kela hiäđuid čielgâkielân jieškote-uv eellimtiileest. Meid kyeimih pyehtih tiiláđ tieđettemčálusijd olssis.

Kela almostit jyehi ive 8 sierâlágán čielgâkielâlâš hiätutieđettemčáállus jieškote-uv eellimtile mield. Tain vittâ láá tääl almostittum suomâkielân já ruotâkielân. Siämmást láá meid peividâm tieđettemčálusij sämikielâlijd versioid.

Tääl valmâštum tieđettemčáluseh láá

  • Áigápuátutoorjâ
  • Pargottesvuotâ
  • Almos aassâmtoorjâ
  • Puoccâm já vajoidittem
  • Varrim Suomân tâi Suomâst olgoenâmáid.

Páárnášperruuh já Iäláttuvah já eres iäláttâhuážžoo torjuuh -tieđettemčáluseh valmâštuveh meid forgâpalij. Páárnášperruuh-tieđettemčálusist váldoo huámmášumán taan ive eromâšávt peerârijjâuđâsmittem. Uđđâ tieđettemčálusist valdâleh sehe puáris já uđđâ vuáháduv miäldásii tile. Uáppei já viärjukenigâsâi torjuid kyeskee tieđettemčáálus peividuvvoo luuhâmihán, ij kalenderihán kyesken. Tot almostuvá maŋeláá kiđđuv.

Muálkkáás sajeh láá hämmejum ovdiist čielgâsubbon, já ovdâmerkkân Varrim Suomân -tieđettemčálusân láá lasettum ovdâmerkkâulmuuh vâi teekstân puátá lase konkreetlâšvuotâ. Toos lasseen tieđettemčálusáid láá tiäđust-uv peividum meid uđđâ hiätusumeh já máhđuliih eres hiätunubástusah.

Peividem ohtâvuođâst meid tieđettemčálusij olgohäämi lii váhá uđâsmâm; ivneh láá ovdiist kuovgâduboh já kaskoo teevstâ oovdânpuohtum nettičujottâsah uáinojeh tääl pyerebeht. Tieđettemčálusij lookán lii meid lasettum ávhálâš iheloho. 

Suomâ- já ruotâkielâliih čielgâkielâliih tieđettemčáluseh já tai sämikielâliih versioh peividuvvojeh jyehi ive. Eŋgâlâs-, ruošâ- já eestikielâliih versioh peividuvvojeh jyehi nube ive.

Kyeimih pyehtih tiiláđ tieđettemčálusijd Kelast

Kela vuolgât tieđettemčálusijd jieijâs palvâlemsoojij lasseen meid ovdâmerkkân sosiaaltoimâttuvváid, PI-toimâttuvváid já ravviittuvváid. Toos lasseen kyeimih pyehtih jieš tiiláđ tieđettemčálusijd čielgâkielân já eres tieđettemčálusijd Kela luámáttâhvuárhást šleđgâpostáin (lomakevarasto@kela.fi). Ucemus tiilámmeeri lii 10 pittád/vuolgâttâs.

Kela čielgâkielâlij já eres tieđettemčálusij já infoloostâi pdf-nettiversioid puáhtá uápásmuđ kela.fi-siijđoin. Tieđettemčálusij nettiversioin váldojeh huámmášumán juksâmvuotâvátámâšah, te tâi laađđâm luhostuvá pyereest meid čááitulohhein.

Čielgâkielâ lii jieijâs kielâhäämis

Selkokeskus (Čielgâkielâkuávdáš) lii mieđettâm Kela čielgâkielâláid tieđettemčálusáid čielgâkielâtobdos. Tobdos lii merkkâ tast, ete almostittem tiävdá čielgâkielâ kriterijd. Čielgâkielâ lii jieijâs suomâkielâ häämi, mast siskáldâs, sánádâh já ráhtuseh láá hämmejum tienuuvt, ete taid lii älkkeb iberdiđ.

Čielgâkielâmateriaalijn lii ävkki eromâšávt

  • ulmuid, kiäin láá muštovááduh tâi luuhâm já oppâm vädisvuođah
  • ovdánemváduláid ulmuid
  • tagaráid ulmuid, kiäid suomâkielâ tâi ruotâkielâ ij lah eenikielâ.

Kelast ij lah sierâ almoskielâliih hiätutieđettemčáluseh, ko lii smiettum, ete čielgâkielâliih tieđettemčáluseh palvâleh puoh kevtteid. Čielgâkielâ heivee puohháid, já tot lii siämmást pyeri vuolgâsaje meid nuubij kielâi jurgâlussáid.

Čielgâkielâlij tieđettemčálusij siskáldâs kávnoo meid kela.fi-nettisiijđoin suomâkielân, ruotâkielân sämikielân.

Uáppáásm Kela tieđettemčálusáid:

Lue lisää