Kela õlmstõõʹtti vuõssmõõzzid eeʹjj 2022 čiõlggbrosyyrid

Kela lij õlmstââttam vuõssmõõzzid eeʹjj 2022 čiõlggbrosyyrid. Čiõlggbrosyyr čiõlǥte Kela ouddõõzzid čiõlggǩiõlin jeeʹres jieʹllemvueʹjjest. Še õhttsažtuâjjkueiʹm vueiʹtte tiʹllʼjed brosyyrid jiõccses.

Kela õlmstâtt piirieeʹjji 8 jeeʹresnallšem jieʹllemvueʹǩǩ meâldlaž čiõlggǩiõllsa ouddõsbrosyyr Vitt täin liâ ååʹn õlmstõttum lääddas da ruõccâs. Seämma vuâra liâ peeiʹvtum še brosyyri sääʹmǩiõllsaž ǩiõllversio.

Ååʹn valmštõõvvâm brosyyr liâ

  • Piʹrǧǧeemtuärjjõs
  • Reâuǥteʹmesvuõtt
  • Takai jälstemtuärjjõs
  • Puõccmõš da säuʹrsmâttmõš
  • Siirdčõõttmõš Lääʹddjânnma leʹbe Lääʹddjânnmest ålggjânnmid

Päärnažpiârri da Jeältõõǥǥ da jeeʹres jeältõkvuäǯǯai tuärjjõõzz -brosyyr valmštâʹvve še sõrgg. Päärnažpiârri-brosyyrâst vääʹldet lokku jooʹtti eeʹjjest jeäʹrben piârluõvâsvuõttoođummuš. Ođđ brosyyrâst ärvvtõõlât nuʹt puärrsab ǥu ođđ riâžldõõǥǥ meâldlaž vueʹǩǩ. Mättʼtõõđji da prizoovniiʹǩǩi tuärjjõõzzid kuõskki brosyyr peeiʹvtet lookkâmeeʹjj, ij kalentereeʹjj kuõskkjen. Tõn õlmstââʹttet mâʹŋŋlubust ǩeâđđa.

Nääʹlteʹmes paaiʹǩid liâ ååʹblkam ääiʹjbu čiõlggsubun, da ouddmiârkkân Siirdčõõttmõš Lääʹddjânnma -brosyyʹre liâ lââʹzztum ouddmiârkkoummu puʹhtted tekstta konkretia. Lââʹssen brosyyrid lij teâđast peeiʹvtum še ođđ ouddõssuumm da vueiʹtlva jeeʹres ouddõsmuttâz.

Peeiʹvtummuž õhttvuõđâst še brosyyri kuâsttjõs lij siõmmna ođđnam; eeuʹn liâ õõudab kaiʹǧǧääb eunnsa da teeʹkst mieʹldd čuäʹjtum neeʹttaddrõõzz käggâʹtte pueʹrben kuâsttjummša. Brosyyri ǩeʹrjjooʹlže lij še lââʹzztum äukkas eeʹjjlååkk. 

Lääʹdd- da ruõccǩiõllsa čiõlggbrosyyr da tõi sääʹmǩiõllsa versio peeiʹvtet piirieeʹjji. Eŋgglõs-, ruõšš- da viroǩiõllsa versio peeiʹvtet juõʹǩǩ nuuʹbb eeʹjj.

Õhttsažtuâjjkueiʹm vueiʹtte tiʹllʼjed brosyyrid Kelast

Kela vuõlttâd brosyyrid jiijjâs kääzzkõspaaiʹǩi lââʹssen še ouddmiârkkân sosiaalkonttrid, TE-konttrid da vuäpstõõǥǥid. Lââʹssen õhttsažtuâjjkueiʹm vueiʹtte jijj tiʹllʼjed čiõlggbrosyyrid ja jeeʹres brosyyrid Kela lomakkpääiʹǩest neʹttpååʹštin (lomakevarasto@kela.fi). Uuʹccmõs tiʹllʼjem-mieʹrr lij 10 lomaakk/vuõlttõs.

Kela čiõlggbrosyyri da jeeʹres brosyyri da teâđtemlõõsti pdf neʹttversioid vuäitt tobdstõõttâd kela.fi-seeidain. Brosyyri neʹttversioin vääʹldet lokku âsttjemvuõttõõlǥtõõzz, di tõi lõõstiǩiõččmõš oʹnnast puârast še teâttikkânlookkjin.

Čiõlggǩiõll lij jiijjâs ǩiõllååʹblǩes

Selkokeskus (Čiõlggǩiõllkõõskõs) lij miõttâm Kela čiõlggbrosyyrid čiõlggtuõđstõõzz. Tuõđstõs lij miârkk tõʹst, što õõlmtõs teâudd čiõlggǩiõl kriteeʹrid. Čiõlggǩiõll lij jiijjâs lääʹddǩiõl ååʹblǩes, koʹst siiskõs, sannõs da rajjâz lie šiõttõllum hiâlpben fiʹttjemnalla.

Čiõlggmateriaalin vuäǯǯa ääuʹǩ jeäʹrben

  • oummu, ǩeäin liâ mošttpuõʒʒâlm leʹbe vaiggâdvuõđ lookkmest da mättjummšest
  • ouddnemvâkksa oummu
  • nåkam oummu, ǩeäid lääʹdd- leʹbe ruõccǩiõll ij leäkku jieʹnnǩiõll.

Kelast jeäʹla åårrmõõžžâst jeeʹrab takaiǩiõllsa ouddõsbrosyyr, ǥu lij smiõttum, što čiõlggbrosyyr kääzzkâʹstte pukid õõnnʼjid. Čiõlggǩiõll suäpp pukid, da tõt lij pueʹrr vueʹlǧǧemsââʹjj seämma vuâra še jeeʹres ǩiõllsaž jåårǥlõõzzid.

Čiõlggbrosyyri siiskõs käunnai še kela.fi-neʹttseeidain lääddas, ruõccâs da sääʹmǩiõlin.

Tobdstõõđ Kela brosyyrid:

Lue lisää