Peerârijjâuđâsmittem miäldásiih vaanhimijpeiviruuđah láá uuccâmnáál mudoi mield 1.5. rääjist – vuáváá jieijâd vaanhimijriijâ rekinistemohjelmáin

Peerârijjâuđâsmittem nubásmit vaanhimijriijâi já tain mäksimnáál vaanhimijpeiviruuđâi pištem já äigimudo. Uđâsmittem kuáská perruid, main päärni rekinistum äigi lii 4.9.2022 tâi ton maŋa. Uđđâ peiviruuđâi uuccâm lekkâs mudoi mield 1.5. rääjist. Peerâriijâi vuávám toorjân puáhtá kevttiđ rekinistemohjelmijd.

Peerârijjâuđâsmittem miäldásiih vaanhimijpeiviruuđâi noomah láá puátteevuođâst sierânâsčuávjumruttâ, čuávjumruttâ já vaanhimijruttâ. Hiäđuh kyeskih perruid, main päärni rekinistum äigi lii 4.9.2022 tâi ton maŋa sehe perruid, main adoptiopärni váldoo tiipšon tolemustáá 31.7.2022. Čuávjum vaanhim čuávjum- já vaanhimijruttâ láá uuccâmnáál 1.5.2022. Sierânâsčuávjumruttâ já nube vaanhim vaanhimijruttâ vuod láá uuccâmnáál 1.8.2022 rääjist. Hiäđuid puáhtá uuccâđ OmaKelast (suomâkielân).

Vaanhimijpeiviruuđâid lii máhđulâš jyehiđ táásá vaanhimij kooskâ – njyebžimijn toorjâ aargân

Vaanhimijpeiviruuđah láá kevttimnáál ohtsis 320 argâpeivid. Jis päärnist lává kyehti vaanhim, te riijah juáháseh táásá vaanhimij kooskâ, ađai kuohtuin vaanhimijn láá kevttimnáál 160 argâpeivid. Sist, kiäh láá čuávjum, láá tai peeivij lasseen vala 40 čuávjumruttâpeivid ovdil ko sij sirdâšuveh vaanhimijruutân. Jieijâs tiätumeereest puáhtá sooppâm mield luovâttiđ enâmustáá 63 argâpeivid nube vaanhimân tâi päärni tipšoo ulmui.

Uásiáigásâš vaanhimijruttâ já -rijjâ puáhtá pelestis njyebžilvuođâ pargo já peerâriijâ oohtânheiviitmân já máhđulist ovdâmerkkân uásipeivipargo porgâm. Ohtâ uásiáigásâš vaanhimijruttâpeivi keeppid vaanhimijruttâtiätumeereest peivilahe.

Vaanhimeh pyehtih puátteevuođâst toollâđ riijâ 18 argâpeivid siämmáá ääigi. Vaanhimijruttâpeeivijd puáhtá kevttiđ tagarijn äigimudoin ko jieš haalijd tassaaš ko pärni tiävdá kyehti ive tâi adoptiopäärni tiipšon väldimist lii moonnâm kyehti ive. 

–Uđđâ vyevi miäldásijd hiäđuid puáhtá uuccâđ vyesimáánu rääjist uđđâáigásâš, äššigâs stivree viermiluámáttuvváin. Ášástâllâm tahhoo älkkeebin visuaallij siskáldâsâiguin já sierâlágán rekinistemohjelmijguin. Mij jyehip tiäđu hiäđuin meid uđđâ enijpakettij fáárust sehe Kela pärniperrui čielgâtieđettemčáállusist, muštâl Kela pärnipeerâhiäđui hovdâ Kiti Laitinen.

Vuáváá já savâstâl peerâriijâin pääihist já pargosaajeest

Čuávjum- já vaanhimijruttâpeeivij rekinistemohjelm (suomâkielân) älkkeedit peerâriijâi vuávám. Rekinistemohjelm vievâst puáhtá rekinistiđ, ete mon ááigán čuávjum- já vaanhimijruuđâ puáhtá finniđ. Rekinistemohjelm tiäđuid puáhtá meid kevttiđ ko savâstâl vaanhimijriijâst pargoadeleijein.

Peerârijjâuđâsmittem vaaigut meid pargosoojijn já ravviittuvâin. Kela lii pyevtittâm maaŋgâkielâlii viestâdemmateriaal pargoadeleijei já oovtâstpargokuoimij toorjân.

– Ravviittuvah já pargosajeh láá peerârijjâuđâsmitmist stuorrâ/tehálii roolist, tastko toi peht perruuh finnejeh tiäđu riijâin. Peerâriijâi juáhásem vaanhimij kooskâ lii ain epitäässiv. Peerârijjâuđâsmittem ij lah tuš Kelast toohâmnáál uđâsmittem, peic nubásmittem tarbâšuvvoo oles ohtsâškode tääsist, vâi peerâriijâi juáhásem ličij puátteevuođâst täsivub, muštâl viestâdem äššitobdee Milla Vainio.

Juohhum ilo lii pyeremus ilo -kampanja juáhá tiäđu sierâ kanavain

Peerârijjâuđâsmittem maaŋgâkielâlâš máinuskampanja álgá vyesimáánu aalgâst. Kampanjast viestâdep vijđáht sierâ kanavain, já ton ulmen lii lasettiđ pärniperrui já ulmui, kiäh halijdeh paarnijd, tiäđulâšvuođâ peerârijjâuđâsmitmist já ton pyehtim njyebžilvuođâin perruid.

Peerâriijáid kyeskee uđđâ já puáris laahâ tuáimih paldluvâi ive 2024 loopâ räi. Puáris lahâasâttem heiviittuvvoo, ko päärni rekinistum äigi lii ovdil 4.9.2022.

Lasetiäđuh: