Puárásijiäláttâh

Puárásijiäláttâh puáhtá leđe pargoiäláttâh, aalmugiäláttâh teikâ kuohtuuh. Aalmugiäláttâhhân mäksimnáál puárásijiäláttâh álgá 65 ive avveest.

Jis tun lah aassâm tâi porgâm olgoenâmijn, puárásijiäláttuv meeri puáhtá pääcciđ uccen.

Ovdâmerkkâ iäláttuvâin

Irján já Iŋgá lává naaijâm. Suái lává kuohtuuh puárásijiäláttuvâst.

Irján uážžu pargoiäláttuv 1 300 e/mp. Sun ij uážu aalmugiäláttuv ijge táhádâsiäláttuv.

Iŋgá lii tipšom kuhháá párnáid pääihist. Sun uážžu pargoiäláttuv 500 e/mp já aalmugiäláttuv suulân 370 e/mp. Te Iŋgá uážžu iäláttuv ohtsis suulân 870 e/mp. Sunjin ij kuulâ táhádâsiäláttâh.

Luuvâ lase pargoiäláttuv ucâmist (suomâkielân).

Iäláttuv toledem

Jis tust lii vuoigâdvuotâ aalmugiäláttâhân, te tun puávtáh meridiđ, ete vááldáh-uv tom toledum puárásijiäláttâhhân ovdil ko tun tiävdáh 65 ihheed.

Jis tun lah šoddâm ovdil ive 1958, puávtáh väldiđ toledum puárásijiäláttuv tolemustáá 63-ihásâžžân.

Jis tun lah šoddâm iivij 1958–1961, puávtáh väldiđ toledum puárásijiäláttuv 64-ihásâžžân.

Toledum iäláttâh lii pisovávt ucceeb ko aalmugiäláttâh, mii álgá 65-ihásâžžân. Iäláttâh kiäppán 0,4 % jyehi mánuppaajeest, moin tun toledah tom. Kannat čielgâdiđ muuneeld, ete mon stuárusâš toledum puárásijiäláttâh ličij.

Ovdâmerkkâ toledum puárásijiäláttuvâst

Piäkká páácá pargoiäláttâhân 63 ive já 9 mánuppaje avveest. Sun uážžu pargoiäláttuv 700 e/mp. Piäkká ocá toos lasseen aalmugiäláttuv toledum 1 ivvijn já 3 mánuppoojijn. Aalmugiäláttâh lii 6 % (suulân 20 e/mp) ucceeb ko tot ličij 65-ihásâžžân.

Piäkká áásá ohtuu.

Sun uážžu pargoiäláttuv lasseen aalmugiäláttuv suulân 320 e/mp.

Iäláttuv maŋedem

Tun jieh taarbâš uuccâđ iäláttuv vala 65-ihásâžžân. Talle tun puávtáh majediđ adai sirdeđ iäláttuv älgim majeláhháá. Tot aaleed iäláttuv. Iäláttâh stuáru 0,6 % jyehi mánuppaajeest, moin tun majedah tom.

Pargottesvuotâ já iäláttâh

Jis tun lah kuhháá pargottem já alda iäláttâhave, puávtáh peessâđ nuuvt kočodum iäláttâhrááiđun adai uážžuđ pargottesvuotâpeiviruuđâ tassaaš, ko uusah puárásijiäláttuv.

Jis tun lah šoddâm ovdil ive 1958, te tust puáhtá leđe vuoigâdvuotâ uuccâđ puárásijiäláttuv 62-ihásâžžân.

Jis tun lah šoddâm iivij 1958–1961, te tust puáhtá leđe vuoigâdvuotâ uuccâđ puárásijiäláttuv 62-ihásâžžân.

Taan tábáhtusâst iäláttâh ij kiäppán. Mudoi tun uážuh pargottespeiviruuđâ 65-ihásâžžân räi.