Kela uđđâ hiätutieđettemčáálluseh láá almostittum

Kela hiätutieđettemčáálluseh oovdânpyehtih Kela hiäđuid čielgâ suomâkielân já čielgâ ruotâkielân já kuulmâ sämikielân. Tieđettemčáállusijn láá tääl almostittum uđđâ versioh ihán 2021. Sämikielâlijd tieđettemčáállusijd puáhtá printtiđ Kela viermisiijđoin.

Suomâ- já ruotâkielâlijn hiätutieđettemčáállusijn muštâlep Kela torjuin já palvâlusâin čielgâkielân. Čielgâkielâ lii jieijâs kielâhäämi, mast siskáldâs, sánádâh já ráhtus lii heiviittum tienuuvt, ete tom lii vala älkkeb iberdiđ ko čielgâ almoskielâ.

Tieđettemčáálluseh láá juohhum Kela hiäđui mield, já toh láá käävci:

  • Iäláttuvah já eres iäláttâhuážžoo torjuuh
  • Pärniperruuh
  • Varrim Suomân tâi Suomâst olgoenâmáid
  • Oppâm já viärjukenigâsvuotâ
  • Puoccâm já vajoidittem
  • Áigápuátutoorjâ
  • Pargottesvuotâ
  • Almos aassâmtoorjâ.

Käävci tieđettemčáállusist lep peividâm čiččâm. Uáppei já viärjukenigâslij tieđettemčáálus peividuvvoo maŋeláá.

Uđđâ tieđettemčáálluseh láá ovdiist čielgâsuboh

Kela tieđettemčáálluseh láá čielgâsmittum ovdiist: kielâkevttim lii ohtâlistum já tuáijim lii ovdiist kaljeb.

– Mij lep hammim tieđettemčáállusij laiđiittâsteevstâ eenâb ohtâlâžžân sierâ tieđettemčáállusij kooskâ. Laiđiittâs valdâl tääl tieđettemčáállus siskáldâs ovdiist pyerebeht. Lep lasettâm laiđiittâssiijđon meid tiätuloová, mast stivrip lohhee uuccâđ lasetiäđu Kela viermisiijđoin tâi puhelinpalvâlusâst, muštâl kielâtipšoo Suvi Syrjänen, kote lii peividâm tieđettemčáállusij teevstâ.

Ovdiist kaljeb tuáijim lii toohâm máhđulâžžân tom, ete tekstâ lii kyevti pálstá saajeest tääl oovtâ pálstáást. Toos lasseen teeman hiävuliih čuovâkoveh adeleh tuáijimân tääl ryytmâ. Návt tieđettemčáállusij sijđomereh láá lasanâm, veikâ ij lah puáttám lase tekstâ.

Tieđettemčáállusij uđđâ viermiversioin láá váldám huámmášumán meid uđđâ juksâmvátámâšâid, já toi laađđâm lii ovdiist älkkeb ovdâmerkkân ruuvdulohhein.

Sämikielâliih tieđettemčáálluseh kuulmâ sämikielân

Tieđettemčáálluseh láá almostittum meid puoh Suomâst sarnum sämikielân, orjâlâš-, anarâš- já nuorttâlâškielân.

– Sämikieláid ij lah jieijâs čielgâkielâstandard, mutâ čielgâkielâ ráhtá šiev vuáđu meid sämikielâ jurgâlussáid, muštâl sämikielâlii viestâdmist västideijee äššitobdee Arja Jomppanen.

Sämikielâliih tieđettemčáálluseh almostittojeh viermist printtimnáál pdf-tiätuvuárkkán, já taid puáhtá laađđâđ já printtiđ čujottâsâst www.kela.fi/saamenkieliset-esitteet.

Tieđettemčáállusij siskáldâs kávnoo suomâkielânruotâkielân já sämikielân meid kela.fi-siijđoin.

Luuvâ lase