Tuʹlǩǩeem da aaʹšši håiddmõš nuuʹbb peäʹlest

Sääʹmǩiõllsaž äʹššneeʹǩǩest lij sääʹm ǩiõll-lääʹjj meâldlaž vuõiggâdvuõtt vuäǯǯad Kelast kääzzkõõzz jiijjâs ǩiõʹlle. Kela jääʹrjast äʹššummša taarb mieʹldd tuulk. Vuäitak še väʹlddeed nuuʹbb oummu håiddad aaʹššääd Kelast.

Taarbšak-a tuulk?

Jõs taarbšak tuʹlǩǩummuž, vääʹld õhttvuõđ Kelaaʹje. Kääzzkâʹsttemäʹšštobddi vaʹrrai tuʹnne taarb mieʹldd jeällõččâmääiʹj da tuulk äʹššummuž vääras. Vuäitak äʹššeed koon täättas Kela kääzzkâʹsttempääiʹǩest leʹbe soiʹttjed teʹlfoonkääzzkõʹsse.

Kela-aaʹšši håiddmõš nuuʹbb oummu peäʹlest

Kela-aaʹššid vuäitt håiddad nuuʹbb oummu peäʹlest väʹlddǩiiʹrjin, ouddõsǩiõččjen leʹbe vueʹllâkksaž päärna huõllʼjen.

Aaʹšši håiddmõš väʹlddǩiiʹrjin

Vuäitak uʹvdded nuuʹbb ooumže vuõiggâdvuõđ håiddad aaʹššid peäʹlstad leʹbe väʹlddeed suu. Väʹlddummuž vuäitt uʹvdded õõut leʹbe määŋg ooumže.

Vuäitak uʹvdded nuuʹbb ooumže vuõiggâdvuõđ håiddad Kelast puk ouddõsaaʹššääd. Vuäitak še rääʹjted vuõiggâdvuõđ tiõttum ouddõõzzi leʹbe aaʹšši håiddmõʹšše. Väʹlddǩeʹrjj vuäitt leeʹd viõǥǥâst meäʹrteʹmes ääiʹj leʹbe mieʹrrääiʹj. Väʹlddǩeeʹrj vuäitt tuejjeed tieuʹdeeʹl lomaakk Väʹlddǩeʹrjj aaʹšši håiddmõõžž vääras Kelast. Väʹlddǩeeʹrj vuäitt ǩeeʹrjted še frijjnallšeld.

Vuäitak väʹlddeed nuuʹbb oummu håiddad ääššad še njäälmlânji. Njäälmlaž väʹlddummuš kuâskk takainalla tåʹlǩ õõut äʹššeemǩeârd.

Ouddõsǩiõččjen

Ouddõsǩiõčči vuäitt håiddad nuuʹbb oummu peäʹlest Kela-aaʹššid teʹlfoonâst, kääzzkâʹsttempääiʹǩest da pååʹšt mieʹldd. Ouddõsǩiõčči ij vueiʹt håiddad nuuʹbb oummu peäʹlest aaʹššid Kela neʹttäʹššeemkääzzkõõzzâst leʹbe neʹttpooʹštin.

Vueʹllâkksaž päärna peäʹlest

Huõlli vuäitt håiddad pukid vuâlla 15-ekksaž päärna aaʹššid. Jõs päärnaž lij 15–17-ekksaž, son vuäitt håiddad aaʹššeez jiõčč leʹbe huõlli vuäitt håiddad tõid suu peäʹlest.

Huõlli ij vueiʹt håiddad vueʹllâkksaž päärnes aaʹššid neeʹttest, leʹbe ooccmõõžžid âlgg vuõltteed pååʹšt mieʹldd leʹbe puʹhtted kääzzkâʹsttempäikka. Neeʹttest vuäitt kuuitâǥ ooccâd sosiaalstaaʹne kuullmõõžž (siirdčõõttâm ålggjânnmid) da tiʹllʼjed päärnže euroopplaž puõccihåiddkoort.

Huõlli vuäitt še seʹlvted vueʹllâkksaž päärnes aaʹššid teʹlfoonâst.