Tulkkum já nube peeleest ášástâllâm

Sämikielâlii äššigâsâst lii säämi kielâlaavâ mield vuoigâdvuotâ finniđ Kelast palvâlem jieijâs kielân. Kela uárnee ášástâlmân táárbu mield tuulhâ. Tun puávtáh meid váldásmittiđ nube ulmuu hoittáđ tuu aašijd Kelast.

Tarbâšah-uv tuulhâ?

Jis tun tarbâšah tulkkum, te vääldi ohtâvuođâ Kelan. Palvâlemäššitobdee väärrid tunjin táárbu mield jotteemääigi já tuulhâ ášástâllâm várás. Tun puávtáh ášástâllâđ mon peri Kela palvâlemsaajeest tâi suáittiđ mii puhelinpalvâlusân.

Kela-aašij hoittám nube peeleest

Kela-aašijd puáhtá hoittáđ nube peeleest väldikirjijn, hiätukoccen tâi vyeliahasii päärni huolâtteijen.

Aašij hoittám väldikirjijn

Tun puávtáh adeliđ nube ulmui vuoigâdvuođâ hoittáđ aašijd tuu peeleest ađai váldásmittiđ suu. Váldásmittem puáhtá adeliđ oovtâ tâi maaŋgâ ulmui.

Tun puávtáh adeliđ nube ulmui vuoigâdvuođâ hoittáđ Kelast puoh tuu hiätuaašijd. Tun puávtáh meid raijiđ vuoigâdvuođâ tiätu hiäđui tâi aašij hoittáámân. Väldikirje puáhtá leđe vyeimist tuáistáážân tâi meriääigi. Väldikirje puáhtá rähtiđ tevdimáin luámáttuv Väldikirje – Hiätuaašij hoittám Kelast VAL 3smn (pdf). Väldikirje puáhtá rähtiđ meid rijjâhámásávt.

Tun puávtáh váldásmittiđ nube ulmuu hoittáđ tuu ääši meid njálmálávt. Njálmálii váldásmittem kuáská táválávt tuše oovtâ ášástâllâmtován.

Hiätukoccen

Hiätukoccee puáhtá hoittáđ nube peeleest Kela-aašijd puhelimist, palvâlemsaajeest já poostâ peht. Hiätukoccee ij pyevti hoittáđ nube peeleest aašijd Kela viermiášástâllâmpalvâlusâst tâi šleđgâpoostâ peht.

Vyeliahasii päärni peeleest

Huolâtteijee puáhtá hoittáđ puoh vuálá 15-ihásii päärni aašijd. Jis pärni lii 15–17-ihásâš, te sun puáhtá hoittáđ ašijdis jieš tâi huolâtteijee puáhtá hoittáđ taid suu peeleest.

Huolâtteijee ij paste hoittáđ vyeliahasii päärni aašijd viermist, ađai ucâmušâid kalga vuolgâttiđ poostâ peht tâi pyehtiđ palvâlemsajan. Viermist puáhtá kuittâg uuccâđ sosiaaltoorvon kullum (varrim olgoenâmáid) já tiiláđ páárnán eurooplii pyecceetipšomkoortâ.

Huolâtteijee puáhtá meid selvâttiđ suu vyeliahasii päärni aašijd puhelimist.

Luuvâ lase