Reâuǥteʹmesvuõttpeiʹvvteäʹǧǧ

Reâuǥteʹmesvuõttpeiʹvvteäʹǧǧ vuäitt leeʹd tiânâspeiʹvvteäʹǧǧ leʹbe vuâđđpeiʹvvteäʹǧǧ.

Tiânâspeiʹvvteäʹǧǧ

Tiânâspeiʹvvtieʹǧǧ laʹsǩǩeet tiânnsi leʹbe puåttji mieʹldd. Vuäitak vuäǯǯad tiânâspeiʹvvtieʹǧǧ, jõs kuulak reâuǥteʹmesvuõttkäšnna. Jeeʹres ämmatsuõʹrjin lie täujja jiijjâz reâuǥteʹmesvuõttkääʹšn. Lie še reâuǥteʹmesvuõttkääʹšn, koid ǩii täättas vuäitt kuullâd.

Kela ij määuʹs tiânâspeiʹvvtieʹǧǧ, jeät-ǥa tõn occu Kelast.

Reâuǥteʹmesvuõttkäʹšnn mähss tiânâspeiʹvvtieʹǧǧ, jõs leäk kuullâm reâuǥteʹmesvuõttkääʹšnna nokk kuuʹǩǩ da teâudak reâuǥaståårram-määin. Reâuǥaståårram-määin teâuddmõš miârkkšââvv, što leäk leämmaž nokk kuuʹǩǩ reâuǥast ouddâl reâuǥteʹmmen pääccmõõžž.

 Tiânâspeiʹvvtieʹǧǧ määuʹset jäänmõsân 400 peiʹvved. Jõs leäk leämmaž reâuǥast vuâlla 3 eeʹjj, vuäitak vuäǯǯad tiânâspeiʹvvtieʹǧǧ jäänmõsân 300 peiʹvved.

Kõõjj lââʹssteâđaid tiânâspeiʹvvtieʹǧǧest jiijjad reâuǥteʹmesvuõttkääʹšnest leʹbe  Reâuǥteʹmesvuõttkaaʹšni õhttsažorgaanisaatiost (tyj.fi, lääddas).

Vuâđđpeiʹvvteäʹǧǧ

Jõs jiõk leäkku reâuǥteʹmesvuõttkääʹšn vuäzzlaž jiõk-ǥa vuäǯǯ tiânâspeiʹvvtieʹǧǧ, Kela mähss vuâđđpeiʹvvtieʹǧǧ. Tõn määuʹset jäänmõsân 400 peiʹvved. Jõs leäk leämmaž reâuǥast vuâlla 3 eeʹjj, vuâđđpeiʹvvtieʹǧǧ määuʹset jäänmõsân 300 peiʹvved.

Jõs leäk vuâlla 25-ekksaž, vuâđđpeiʹvvtieʹǧǧ vuäǯǯma lie rääʹjtõõzz. Tääʹrǩest TJ-konttrest, vuäitak-a vuäǯǯad vuâđđpeiʹvvtieʹǧǧ.

Mâʹmmet vuâđđpeiʹvvtieʹǧǧ vuäǯǯ?

Vuâđđpeiʹvvteäʹǧǧ lij 33,78 e/peiʹvv, da tõn määuʹset 5 peeiʹvest neäʹttlest. Jõs tuʹst lie päärna, vuäǯǯak päärnažpââjõõzz. Tõt lij 5,30–10,03 euʹrred peeiʹvest tõn mieʹldd, kâʹll päärnžed tuʹst lie.

Vuâđđpeiʹvvtieʹǧǧest määuʹset piiđid.

Looǥǥ lââʹzz vuâđđpeiʹvvtieʹǧǧ ooccmest (lääddas).

Vuâđđpeiʹvvteägga pââjõsvueʹss

Vuâđđpeiʹvvteägga vueiʹtet mäʹhssed pââjõsvueʹzz, jõs vuässõõđak TJ-konttrin suåppum toiʹmmjummša.

Vuâđđpeiʹvvtieʹǧǧ pââjõsvueʹss lij 4,80 euʹrred peeiʹvest. Vuâđđpeiʹvvtieʹǧǧ pââjõsvueʹss määuʹset jäänmõsân 200 peeiʹvest.

Vuäitak ärvvtõõllâd Kela neʹttseeidai laʹsǩǩeem-mašina veäkka, mâʹmmet vuäǯǯak vuâđđpeiʹvvtieʹǧǧ (lääddas).

Reâuǥteʹmmen ålggjânnmin

Reâuǥteʹmesvuõttpeiʹvvtieʹǧǧ määuʹset måtam vuõʹjjin še teʹl, ko leäk ålggjânnmin da ooʒʒak toʹben reâuǥ.

Reâuǥaståårram-mäinn

Što vuäǯǯak vuâđđpeiʹvvtieʹǧǧ, ton õõlǥak tieuʹdded reâuǥaståårram-määin. Reâuǥaståårram-mäinn teâuddai, jõs

  • leäk leämmaž reâuǥast uuʹccmõsân 26 neäʹttled mââimõs 28 määnpââʹj seʹst
  • tuu tuâjjäiʹǧǧ lij leämmaž uuʹccmõsân 18 čiâssâd neäʹttlest
  • tuu päʹlǩǩ lij leämmaž sueʹrj reâuggmäinnsuåppmõõžž meâldlaž leʹbe uuʹccmõsân 1 252 euʹrred määnpââʹjest.

Reâuggmõõžž måtam nuuʹbb EU- leʹbe Etv-jânnmest leʹbe Sveiʹccjânnmest vueiʹtet še laʹsǩǩeet mieʹldd.

Reâuǥaståårram-mainnu vueiʹtet laʹsǩǩeed mieʹldd reâuǥ še kuuʹǩǩab ääiʹjest ko 28 määnpââʹjest ouddmiârkkân pueʹtti vuõʹjjin:

  • leäk puõccâm
  • leäk mättʼtõõttâm
  • leäk håiddam vuâlla 3-ekksaž päärnžad
  • leäk vuässõõttâm TJ-konttâr jäʹrjstem tååimaid.

Põõrǥâsneeʹǩǩest lij jiijjâs reâuǥaståårram-mäinn. Jõs leäk põõrǥâsneǩ, tääʹrǩest vuâđđpeiʹvvtieʹǧǧ määinaid Kelast.