Kela-taaksi tiilámnummeer muttoo Laapist

Laapist láá 1.1.2022 rääjist kyehti palvâlempyevtitteijee, main Kela sajanmäksim taksimaađhijd kalga tiiláđ. Puátteevuođâst äššigâs puáhtá valjiđ, ete kuábbáá palvâlempyevtitteijest sun tiiláá Kela-taaksi.

Taksi Helsinki Oy já Suomen Lähilogistiikka Oy huolâtteh Kela sajanmäksim taksimaađhijn Laapist 1.1.2022 rääjist. Palvâlempyevtitteijeeh västideh tast, ete puoh tain tiilájum taksimääđhih, maid Kela sajanmáksá, hoittájuvvojeh tiilám miäldásávt já tárguttâsân hiäivulii fiävroin. Koččâmušâst lii olespalvâlem, mii luávdá taksimaađhij tiilám, ovtâstittem já sirdem, jođettempalvâlusâi ornim já kocceem sehe máksujotoluv já raportistem. Máksujotoluvâst kiävttoo Kela šleđgâlâš njuolgâsajanmáksuvuáhádâh.

Vâi Kela puáhtá sajanmäksiđ taksimääđhi, te määđhi kalga tiiláđ jo-uv numerist 0800 414 610 (Taksi Helsinki Oy) tâi numerist 0800 051 54 (Suomen Lähilogistiikka Oy). Tain numerijn tiilájum maađhijn äššigâs máksá jiešvástádâs, mii lii enâmustáá 25 eurod määđhist oovtâ suundán. Tiilámsuáittu lii nuuvtá. Uđđâ numereh palvâleh 20.12.–30.12.2022 tme 8–16. Puáttee ive aalgâ rääjist tain puáhtá tiiláđ maađhijd pirrâ jándur.

Uđđâ tiilámnumereh puátih anon 20.12.2021. Ton rääjist tain puáhtá tiiláđ maađhijd, moh olášuveh 1.1.2022 rääjist. Taan ive määđhih tiilájuvvojeh vala tááláá tiilámnumerijn.

Taksi kalga tiiláđ numerist 0800 414 610 (Taksi Helsinki Oy) tâi numerist 0800 051 54 (Suomen Lähilogistiikka Oy) čuávvoo kieldâin: Iänudâh, Aanaar, Kiemâ, Keminmaa, Kittâl, Kolari, Kiemâjävri, Muonio, Pelkosnjargâ, Puáššu, Ranua, Ruávinjargâ, Salla, Suovâkuoškâ, Simo, Suáđigil, Tervola, Tuárnus, Pello, Ucjuuhâ, Paje-Tuárnus.

Kuullâm- já sárnumváduliih äššigâsah pyehtih ain tiiláđ jieijâs taksimaađhijd tekstâviestáin. Äššigâs kalga liijká almottiđ jieijâs tiäđuid vistig puhelin peht uđđâ palvâlempyevtitteijeid. Meid tekstâviestâpalvâlem tiilámnumereh muttojeh.

Äššigâsâi tuáivum uđâsmitmeh puátimin

Valjimrijjâvuođâ lasseen meid eres äššigâsâi tuáivum nubástusah láá puátimin. Puátteevuođâst äššigâs finnee haalijddijn tekstâviestáin tiäđu, ko auto lii tuhhiittâm tiilám, sehe vyeijee puhelinnummeer. Nubbe tehálâš nubástus lii, ete sirdeh kuhesáigásijd tiäđuid äššigâs vuoigâdvuođâst taaksi kiävtun sehe ihejiešvástádâs (300 e ive 2022) tievâmist Kelast palvâlempyevtitteijei.

Tiäđuid sirdeh Takso-nommâsii šleđgâlii koijâdempalvâlusâst, mon peht pyehtih äššigâs love mield sirdeđ meid eres kuhesáigásijd tiäđuid, moh lohtâseh máátkán. Tággáár lii ovdâmerkkân tiätu tast, ete puátih-uv išeniävuh fáárun máátkán. Palvâlus peht puáhtá äššigâs mietâmâššáin sirdeđ meid tiäđu tast, ete lii-uv äššigâsân mieđettum áigápuátutorjuu máksučonnâsem määđhi jiešvástádâsuási várás. Jis äššigâs ij adde mietâmâš šleđgâlii máksučonnâsem kiävtun, te Kela puáhtá mieđettiđ sunjin ain pááppármáksučonnâsem.

Vuoigâdvuotâ fastâtaaksin siäilu

Jis Kela lii mieđettâm äššigâsân tolebáá vuoigâdvuođâ kevttiđ fastâtaaksi, te vuoigâdvuotâ toos siäilu, veikâ palvâlempyevtitteijee muttoo. Äššigâs kannat koijâdiđ tááláá fastâtaaksist, ete juátká-uv sun sáátuid nube teikâ nube uđđâ palvâlempyevtitteijest. Jis äššigâs tááláš fastâtaksi ij juáđhi äššigâs sáátuid 1.1.2022 rääjist, te äššigâs kalga väldiđ ohtâvuođâ palvâlempyevtitteijei uđđâ fastâtaaksi ornim keežild. Kela avžuut, ete äššigâsah koijâdeh uđđâ fastâtaaksi ton maŋa, ko láá kiergânâm verdidiđ jieijâs kuávlu palvâlempyevtitteijeid ovdâmerkkân algâive ääigi.  

Sämikielâlâš äššigâs puáhtá tiiláđ Kela-taaksi oovdeb vyevi mield meid njuolgist sämikielâlii vyeijest. Sämikuávlust fastâ ässee sämikielâlijn äššigâsâin lii säämi kielâlaavâ vuáđuld vuoigâdvuotâ kevttiđ jieijâskielâlii Kela-taaksi tiervâsvuođâhuolâttâs maađhijn. 

Laapist koloh masa 13 milj. eurod

Ive 2020 Kela sajanmaavsij Laapist 120 128 taksimätkid. Sajanmáávsuid maksii 15 457 ulmuid, já toi koloh lijjii 13,2 milj. eurod.

Ohtsis Kela sajanmaavsij ive 2020 suulân 2,7 milj. taksimätkid suulân 367 610 ulmuid. Taksimaađhijn maksii sajanmáávsuid 169 milj. eurod.

Kela sajanmáksá tiervâsvuođâhuolâttâsân tohhum määđhi koloid, jis mätki lii tohhum puácuvuođâ, čuávjum tâi šoddâdem tiet. Määđhih sajanmáksojeh táválávt hälbimus kevttimnáál orroo mađhâšemvyevi mield. Jis äššigâs tiervâsvuođâtile tâi jotolâhtile váátá spesiaalfiävru, tego taaksi kevttim, te sajanmáávsu puáhtá mäksiđ spesiaalfiävru kiävtust šoddâm koloi mield.

Luuvâ lase