Tuâjast ålggjânnmin

Reâuggmõš EU-jânnmest, Etv-jânnmest leʹbe Sveiʹccjânnmest

Jõs mõõnak tuõjju koon-ne EU-jânnma, Etv-jânnma leʹbe Sveiʹccjânnma, juʹn vuäʹnkõs reâuggmõš vaaikat nuʹtt, što tuʹst ij teänab leäkku vuõiggâdvuõtt Kela tuärjjõõzzid.

Vuäitak kuuitâǥ vuäǯǯad tuärjjõõzz tõn jânnmest, koʹst reâuǥak. Vuäitak vuäǯǯad tuärjjõõzz, håʹt jiõk jälsteʹče tõn jânnmest, koʹst reâuǥak.

Tuâjjla koʹlle tåʹlǩ õõut jânnam sosiaalstaan sizz vuârstes. Jiõk âʹte vueiʹt seämma-äiggsânji kuullâd Lääʹddjânnam sosiaalstaan sizz, jõs kuulak koon-ne jeeʹres jânnam sosiaalstaan sizz.

Raajjtuâjjla

Raajjtuâjjlaž lij ooumaž, kååʹtt mäcc mieʹrrkõõski juõʹǩǩ peeiʹv leʹbe uuʹccmõsân õõut vuâra neäʹttlest põõšši jälstemjânnmasas.

Jõs reâuǥak raajjtuâjjliʹžžen nuuʹbb EU-jânnmest leʹbe Etv-jânnmest, tuʹst lij vuõiggâdvuõtt reâuggamjânnmad tuärjjõõzzid. Tuärjjõõzz vuäǯǯma ij vaaikât tõt, koon jânnmest jälstak.

Vuõlttuum tuâjjla

Vuõlttuum tuâjjla lie oummu, koid lääʹdd tuâjjuʹvddi lij vuõlttääm tuõjju ålggjânnmid.

Tuâjjmeärrõs jeeʹres ko EU-jânnma, Etv-jânnma, Sveiʹccjânnma leʹbe sosiaalstaansuåppmõšjânnmid

Jõs tuâjjuʹvddjad vuõlttad tuu tuõjju vuâlla 6 määnpââʹj ääiǥas, tuʹst lij õinn vuõiggâdvuõtt Kela tuärjjõõzzid.

Jõs tuâjjuʹvddjad vuõlttad tuu tuõjju pâʹjjel 6 määnpââʹj ääiǥas, iʹlmmet õõutsââʹjest tuâjjuʹvddjinad ålggjânnam tuâjast Kelaaʹje. Iʹlmmtõõzz feʹrttai tuejjeed mââimõõzzâst, ko leäk mäʹccmen Lääʹddjânnma.

Tuâjjmeärrõs EU-jânnma, Etv-jânnma leʹbe Sveiʹccjânnma

Jõs tuâjjuʹvddjad vuõlttad tuu tuõjju täid jânnmid, tuʹst lij takainalla vuõiggâdvuõtt Kela tuärjjõõzzid.

Tuu tuâjjuʹvddjest feʹrttai ooccâd tuʹnne Jeältõkstaankõõskõõzzâst tuõđštõõzz, koin čuäʹjtak nuuʹbb jânnmest, što kuulak õinn Lääʹddjânnam sosiaalstaan sizz.

Lââʹssteâđaid tuõđštõõzz ooccmest vuäǯǯak Jeältõkstaankõõskõõzzâst (etk.fi, lääddas).

Tuâjjmeärrõs jânnma, koin Lääʹddjânnmest lij sosiaalstaansuåppmõš

Jõs tuâjjuʹvddjad vuõlttad tuu tuõjju sosiaalstaansuåppmõšjânnma, tuʹst lij takainalla õinn vuõiggâdvuõtt Kela tuärjjõõzzid. Tuâjjmeärrõs vuäitt teʹl peʹštted še pâʹjjel 6 määnpââʹj.

Täin vuõʹjjin še tuu tuâjjuʹvddjest feʹrttai ooccâd tuʹnne Jeältõkstaankõõskõõzzâst tuõđštõõzz. Tõn vuâđald Kela tuʹtǩǩad, vueiʹtet-a tuʹnne õinn mäʹhssed tuärjjõõzzid.