Haldâttâs iävtut leskâiäláttuv meriáigásâžžân já ávuskuáimán vuoigâdvuođâ leskâiäláttâhân

Peerâiäláttâhtorvo lahâasâttem uđâsmittoo. Uđâsmittem ulmen lii hammiđ peerâiäláttâhtorvo tienuuvt, ete tot västid ohtsâškode já perrui nubásmittum tárboid. Uđâsmittem pyereed ávuskyeimi áigápuátutorvo leskâiäláttâhvuoigâdvuođâ mield sehe kuhheed pargoiäláttâhlaavâi miäldásii párnáá iäláttâhvuoigâdvuođâ kuovttijn ivvijn.

Jäämmimtábáhtus ooleest leeskâ já párnái áigápuátu torvejuvvoo pargoiäláttâhlaavâi já aalmugiäláttâhlaavâ miäldásii peerâiäláttuvváin. Peerâiäláttâh puáhtá leđe leskâiäláttâh teikâ päärni-iäláttâh.

Peerâiäláttuv lahâasâttem uđâsmittoo, já lii tárguttâs, ete nubástusah puátih vuáimán ive 2022 aalgâst. Stuárráámus nubástusah láá

  • leskâiäláttuv muttum meriáigásâžžân sist, kiäh láá šoddâm ive 1975 já ton maŋa
  • leskâiäláttâhvuoigâdvuođâ vijđánem ávuskuoimij koskâsâžžân
  • pargoiäláttâhlaavâi miäldásii päärni-iäláttuv uážžoi sajattuv puáránem.

Leskâiäláttuv pištem räijejuvvoo – ávuskyeimi tile puárrán

Haldâttâs lii iävtuttâm ovdâskoodán, ete leskâiäláttuv pištem räijejuvvoo 10 ihán. Leskâiäláttâh máksoo leeskân, kote lii lamaš näimilittoost jáámmám ulmuin. Leskâiäláttâh máksoo kuittâg ucemustáá toos räi, ko nuorâmus pärni, kiäst lii vuoigâdvuotâ päärni-iäláttâhân, tiävdá 18 ihheed. Leskâiäláttuv pištem raijim kuáská ive 1975 já ton maŋa šoddâm leskáid tiileest, mast pelikyeimi lii jáámmám ton maŋa, ko iävtuttum laavah láá puáttám vuáimán.

Pargoiäláttâhlaavâi já aalmugiäláttâhlaavâ miäldásii leskâiäláttâhân ličij puátteevuođâst vuoigâdvuotâ meid ávuskyeimist, kote lii aassâm hiäđukyeđđein ohtsii tálutuálust ucemustáá 5 ive oovtmanolávt já kiäst lii ohtsâš vyeliahasâš pärni suin. Pärni lii kolgâm aassâđ siämmáá tálutuálust hiäđukyeđđein já leskáin. Taam leskâiäláttuv mávsáččii toos räi, ko nuorâmus ohtsâš pärni tiävdá 18 ihheed. Puáttee peerâiäláttâhuđâsmittem ij kuoskâ leskáid, kiäh jo uážžuh leskâiäláttuv teikâ kiäid tot lii mieđettum ovdil iävtuttum laavâi vuáimánpuáttim.

Kela máksá leskâiäláttuv tuš vuálá 65-ihásii leeskân.

Päärni-iäláttâhân pyeredem

Iävtuttuvvoo, ete juátkih pargoiäláttâhlaavâi miäldásâš vuoigâdvuođâ päärni-iäláttâhân 20-ihásâžžân räi. Tääl vuoigâdvuotâ päärni-iäláttâhân nohá 18-ihásâžžân.

Aalmugiäláttâhlaavâ miäldásâš päärni-iäláttâh máksoo jo tääl 21-ihásâžžân räi. 18 ihheed tiävdám ulmuu uásild váttoo kuittâg váldutoimâlâš oppâm. Aalmugiäláttâhlaavâ miäldásii päärni-iäláttâhân iä iävtut nubástusâid.

Lasetiäđuh