Hoittáá Kela-aašijd ääigild oornigân ovdil pessijái

Pessijááh toledeh pargottesvuođâääigi almottâs- já máksupeeivijd. Áigápuátutoorjâ kiergân tilin ovdil pessijái, jis ucâmuš já lahtoseh láá toimâttum majemustáá 19.3. Skillâtuorâstuv palvâlep äššigâsâid tme 13 räi, mutâ áigápuátutorjuu kocceem lii áávus tme 16 räi.

Almoot pargottesvuođâpeeivijd ääigild

Pessijááh toledeh pargottesvuođâääigi almottâs- já máksupeeivijd. Spiekâstâsâin muštâlep meid ášástâllâmpalvâlusâst já pargottesvuođâääigi almottâsluámáttuvâst.

Jis pargottesvuođâääigi almottâs paje nohá 30.–31.3.2021

  • almottâs puáhtá macâttiđ 30.3.2021
  • ruuđah láá tilist tolemustáá 1.4.2021.

Jis pargottesvuođâääigi almottâs paje nohá 1.4.2021

  • almottâs puáhtá macâttiđ 31.3.2021
  • ruuđah láá tilist tolemustáá 6.4.2021.

Jis pargottesvuođâääigi almottâs paje nohá 2.–4.4.2021

  • almottâs puáhtá macâttiđ 1.4.2021
  • ruuđah láá tilist tolemustáá 7.4.2021. 

Almottâs kannat toimâttiđ ášástâllâmpalvâlusâst jo macâttempeeivi iiđeed, vâi kiergânep kieđâvuššâđ tom nuuvt jotelávt ko máhđulâš.

Uusâ áigápuátutorjuu puorijn aaigijn

Áigápuátutorjuu majemuš máksupeivi ovdil pessijái lii 1.4. tuorâstuv. Toorjâ kiergân talle tilin, jis ucâmuš já puoh tárbuliih lahtoseh láá toimâttum Kelan majemustáá 19.3.

Jis äššigâs taarbâš áigápuátutorjuu huápulávt, te sun kalga väldiđ ohtâvuođâ Kela palvâlemnumerân 020 692 207 tâi palvâlemsajan. Huápulâš tile puáhtá leđe ovdâmerkkân kivkked šoddâm tárbu máksučonnâsmân talkkâsij tâi purrâmuškáálvui várás.

Skillâtuorâstuv Kelast lii huápulii áigápuátutorjuu tárbâšeijeid kocceem puhelinpalvâlusâst já uásist palvâlemsoojijn tme 16 räi. Jis äššigâs taarbâš áigápuátutorjuu huápulávt Kela ávusorroomaaigij ulguubeln, te kieldâ puáhtá jieijâs kuorâttâllâm mield mieđettiđ estee áigápuátutorjuu. Kivkked šoddâm kriisâtiileest poosij ääigi äššigâs puáhtá leđe ohtâvuođâst jieijâs aassâmkieldâ sosiaalkocemân.

Äššigâspalvâlem ávusorroomääigih pessijái ääigi

Kela tavesämikielâlâš puhelinpalvâlem kii kiddâ skillâtuorâstuv 1.4. Sämikielâliih äššigâsah pyehtih kyeđđiđ ohtâvuođâväldimtáttum šleđgâpoostân čujottâsân saame@kela.fi. Ohtâvuođâväldimtáttumáid västidep argâpeeivij táválávt jo siämmáá peeivi. Tun kaavnah lasetiäđu Kela sämikielâlijn palvâlusâin čujottâsâst kela.fi/saame.

Kela suomâkielâlâš puhelinpalvâlus lii skillâtuorâstuv áávus tme 9–13, mutâ áigápuátutorjuu palvâlemnumerân 020 692 207 puáhtá huápulijn tiilijn suáittiđ tme 16 räi. Tun kaavnah Kela palvâlemnumerijd viermist: kela.fi/soita-kelaan.

Skillâtuorâstâh vaaigut meid áávus orroo palvâlemsoojij ávusoromân. Áávus orroo palvâlemsajeh steŋgejuvvojeh tme 13, mutâ uási kocá huápulii áigápuátutorjuu tarbâšeijei várás tme 16 räi. Tiätu palvâlemsajeh koceh áigápuátutorjuu tiet.

Täärhist palvâlemsoojij čujottâsâid já ávusorroomaaigijd palvâlemsaje uuccâmsaajeest.

Aanaar palvâlemsaje Avelist lii áávus koskohoi tme 10–12 já 13–15, te pessijááh iä vaaigut ávusorroomááigán.

Kela puhelinpalvâlem já palvâlemsajeh láá steŋgejum

  • kuhesvástuppeeivi 2.4.
  • pessijâšlávurduv 3.4.
  • 1. pessijâšpeeivi 4.4.
  • 2. pessijâšpeeivi 5.4.

Mij tuáivuttep mii äššigâssáid suottâsijd pessijáid!

Luuvâ lase