Kela-aaʹššid kaʹnnat håiddad ǩeässa še neeʹttest da teʹlfoonâst

Kela-aaʹššid kaʹnnat håiddad ǩeässa še OmaKelast leʹbe soiʹttjeeʹl teʹlfonkääzzkõʹsse. Määŋgain Kela kääzzkâʹsttempaaiʹǩin äävaiåårramääiʹj mottje ǩieʹzz ääiǥas, da ođđ äävaiåårramaaiʹjid serddjet 1.6.2021 ääʹljeeʹl.

Vuäitak håiddad jäänmõs vueʹzz Kela-aaʹššin neeʹttest: ooccâd ouddõõzzid, täʹrǩsted tuʹmmstõõǥǥ, vueiʹnned kuäʹss ouddõõzz määuʹset da vuõltteed Kelaaʹje saaǥǥid. Kela neʹttseeidain chattrobott vuäʹppast piʹrǧǧeemtuärjjõõzz da piârouddõõzzid kuõskki aaʹššin. Kõõjj Kelast -čuõldâst (lä. palstalla) vuäitak kõõččâd kõõččmõõžžid da lookkâd vasttõõzzid jeärrsi kõõččmõõžžid. Kela kääzzkâstt äʹššniiʹǩǩid še Facebookâst da Instagraammâst.

Jõs äššʼsad ij kaunnu vasttõs neeʹttest, vuäitak soiʹttjed Kela teʹlfonkääzzkõʹsse. Teʹlfonkääzzkõs lij še ǩeässa äävai vuõssaarǥâst piâtnca čiâss 9–16. Teʹlfoonâst vuäitak håiddad puk seämma persoonlaž aaʹššid ko kääzzkâʹsttempääiʹǩest. Kääzzkâʹsttemnââmar lie jerruum jieʹllempooddi mieʹldd. Jõs jiõk kaaun heiʹvvjeei nââmar, vuäitak soiʹttjed koon nââmra täättas.

Teʹlfonkääzzkõʹsse vuäitt še vaʹrrjed ääiʹj, kuäʹss Kelast soiʹttjet äʹššnekka. Teʹlfonääiʹj vuäitt vaʹrrjed neeʹttest leʹbe soiʹttjeeʹl koon kääzzkâʹsttemnââmra täättas.

Sääʹmǩiõllsa kääzzkõõzz ǩeässa

Kela tâʹvvsääʹmǩiõllsaž teʹlfon- da ougglõskääzzkõs lij äävai aarǥi čiâss 13–15 nââmrest 020 634 2894. Aanar- da nuõrttsääʹmǩiõllsaž kääzzkõõzz vuäǯǯ tuulk ââʹneeʹl. Sääʹmǩiõllsaž äʹššneeʹǩǩ vuäiʹtte kueʹđđed õhttvuõttväʹlddemraukkmõõžž neʹttpååšta addrõʹsse saame@kela.fi. Kaaunak lââʹssteâđ Kela sääʹmǩiõllsaž kääzzkõõzzin addrõõzzâst www.kela.fi/saame.

Kääzzkâʹsttempaaiʹǩi äävaiåårramaaiʹjin muttâz 1.6.2021 ääʹljeeʹl

Määŋgain Kela kääzzkâʹsttempaaiʹǩin äävaiåårramääiʹj mottje ǩieʹzz ääiǥas. Ǩieʹssäävaiåårramääiʹj mottje 1.6.2021 ääʹljeeʹl da poʹtte mââimõsân 31.8.2021.

Šuurab gåårdi kuvddlõõzzin toiʹmmjeei kääzzkâʹsttempääiʹǩ lie äävai takainalla leʹbe âlddsin takainalla. Uuʹccab kääzzkâʹsttempaaiʹǩi vueʹzzeld muttâz lie jäänab. Kääzzkâʹsttempääiʹǩ äävaiåårramteâđaid kaʹnnat täʹrǩsted kela.fist.

Koronaepidemia diõtt jeällmõõžž kääzzkâʹsttempääiʹǩest kaʹnnat še ǩeässa vieʹltted, jõs tõt lij vueiʹtlvaž.

Mäʹhtt hååidam Kela-äššan, jõs tõt ij oʹnnest neeʹttest ni teʹlfoonâst da ââldmõs kääzzkâʹsttempäiʹǩǩ lij ǩidd?

Määŋg päiʹǩǩ-kååʹddest lij veʹrǧǧniiʹǩǩi õhttsaž äʹššeempäiʹǩǩ, koʹst vuäʹpstet almmjallaš tääʹzzest Kela-aaʹššin. Kela-aaʹššin vuäǯǯ vuäʹpstummuž še ouddmiârkkân Ohjaamo-, Lähitori- da kääzzkâʹsttemkõõskõõzzin. Lââʹssen määŋg päiʹǩǩ-kååʹddest lij Kela ougglõskääzzkõs, leʹbe teâttmašina, koon pääiʹǩ vuäǯǯak Kela äʹšštobddja kovv- da jiõnnõhttvuõđ. Ougglõskääzzkõs vaʹsttad kääzzkõõzz Kela jiijjâs kääzzkâʹsttempääiʹǩest.

Vuäitak še väʹldded õhttvuõđ dommkååddad sosiaalkääzzkõõzzid, lääʹmeskääzzkõõzzid leʹbe tiõrvâsvuõtthuõllu, koʹst tuu vueiʹtet vieʹǩǩted ouddmiârkkân teʹlfonääiʹj vaʹrrjummšest. Ko tuʹnne vaʹrrjet teʹlfonääiʹj, Kela äʹšštobddi soiʹttai tuʹnne suåppum ääiʹj, ij-ǥa teʹlfonsåitt määuʹs ni mâid.

Põʹmmaipååʹšt kaʹnnat vuõltteed Kelaaʹje addrõʹsse Kela, PL 10, 00056 Kela.

Kääzzkâʹsttempaaiʹǩi äävaiåårramääiʹj 1.6.2021 ääʹljeeʹl

Lââʹssteâđ