Kela ođđa ovdobrošyrat leat almmustahtton

Kela ovdobrošyrat muitalit Kela doarjagiin čielgasuomagillii ja čielgaruoŧagilli ja golmmain sámegielain. Brošyrain leat dál almmustahtton ođđa veršuvnnat jahkái 2021. Sámegielat brošyraid sáhttá čálihit Kela neahttasiidduin.

Suoma- ja ruoŧagielat ovdobrošyrain muitaluvvo Kela doarjagiid ja bálvalusaid birra čielgagielain. Čielgagiella lea sierranas giellahápmi, mas sisdoallu, sátnerádju ja ráhkadusat leat heivehuvvon vel álkibun áddehahttin go maid čielga standárdagiella lea.

Brošyrat leat juogaduvvon Kela ovdduid mielde, ja dat leat gávcci:

  • Ealáhagat ja ealáhatoažžu eará doarjagat
  • Mánnábearrašat
  • Fárren Supmii dahje Suomas olgoriikkaide
  • Stuđeren ja vearjogeatnegasvuohta
  • Buohccán ja veajuiduhttin
  • Áigáiboahtindoarjja
  • Bargguhisvuohta
  • Almmolaš ássandoarjja.

Gávcci brošyras čieža leat beaiváduvvon. Stuđeanttaid ja vearjogeatnegasaid brošyra beaiváduvvo maŋŋelabbos.

Ođđa brošyrat leat čielgasabbot go ovdal

Kela brošyrat leat čielggasmahtton ain ovddežis: gielageavaheapmi lea dahkkon sullasažžan ja doadjin d. máhccun lea geahppuduvvon.

– Mii hábmiimet brošyraid láidehusteavstta eanet seammaláganin eará brošyraid ektui. Láidehus govvida dál brošyra sisdoalu ovddeža buorebut. Lasiheimmet láidehussiidui maiddái diehtolođá, gos rávvejuvvo ahte lohkki ohcá lasi dieđuid Kela neahttasiidduin dahje juo telefonbálvalusas, muitala brošyraid teavsttaid beaivádan giellagáhttejeaddji Suvi Syrjänen.

Geahppuduvvon doadjin lea dahkan vejolažžan dan, ahte ovddit guovtte bálsttá teaksta lea dál biddjon ovtta bálstái. Lassin doadjima jođihit temái heivvolaš govat. Nappo brošyraid siidomearit leat lassánan, vaikke teavsttat eai leat boahtán lasi.

Brošyraid ođđa neahttaveršuvnnain leat vuhtii váldon maiddái ođđa olahahttivuođagáibádusat, ja daid bláđen lea ovddibu álkit ovdamearkan ruvttolohkkiin.

Sámegielat brošyrat golmmain sámegielain

Brošyrat leat almmustahtton maiddái Suomas hállon buot sámegielain, davvisáme-, anáraš- ja nuortalašgillii.

– Sámegillii ii leat iežas čielgagiellastandárda, muhto čielgagiella ráhkada buori vuođu maiddái sámegielat jorgalusaide, muitala sámegielat diehtojuohkimis vástideaddji áššedovdi Arja Jomppanen.

Sámegielat brošyrat almmustahttojit pdf-vuorkán, mat čálihuvvojit neahtas, ja daid sáhttá bláđet ja čálihit čujuhusas www.kela.fi/saamenkieliset-esitteet.

Brošyraid sisdoallu gávdno suomagilliiruoŧagillii ja sámegillii maiddái kela.fi-siidduin.

Loga lasi