Kela ođđ ouddõsbrosyyr lie õlmstõttum

Kela ouddõsbrosyyr poʹhtte ouʹdde Kela tuärjjõõzzid čiõlgglääddas da čiõlggruõccâs di kooum sääʹmǩiõʹlle. Brosyyri ođđ versio lie ååʹn õlmstõttum eeǥǥas 2021. Sääʹmǩiõllsaž brosyyrid vuäitt priʹnttjed Kela neʹttseeidain.

Lääʹdd- da ruõccǩiõllsaž ouddõsbrosyyrin mušttlet Kela tuärjjõõzzin da kääzzkõõzzin čiõlggǩiõʹlle. Čiõlggǩiõll lij jiijjâs ǩiõllååʹbleǩ, koʹst siiskõs, sannõs da rajjâz lie šiõttõllum võl čiõlgg takaiǩiõl hiâlpben fiʹttjemnalla.

Brosyyr lij juõkkum Kela ouddõõzzi mieʹldd, da tõk lie kääuʹc:

  • Jeältõõǥǥ da jeeʹres jeältõkvuäǯǯai tuärjjõõzz
  • Päʹrnnpiârri
  • Siirdčõõttâm Lääʹddjânnma leʹbe Lääʹddjânnmest ålggjânnmid
  • Mättʼtõõttmõš da prizoov
  • Puõccmõš da säursmâttmõš
  • Piʹrǧǧeemtuärjjõs
  • Reâuǥteʹmesvuõtt
  • Takai jälstemtuärjjõs.

Käʹhccen brosyyrâst čiččâm lie peeiʹvtum. Mättʼtõõttji da prizoovniiʹǩǩi brosyyr peeiʹvtet mâʹŋŋlest.

Ođđ brosyyr lie čiõlggsab ko ouddâl

Kela brosyyrid lie tuejjääm ääiʹjab čiõlggsubun: ǩiõllââʹnnem leät õhttnâttam da teeʹksti kuâsttjõʹsse lij jäänab sââʹjj.

– Pueʹrõõlim brosyyri jååʹđtemteeʹkst õhttnââʹtteeʹl teeʹkstid jeeʹres brosyyri kõõsk. Jååʹđtummuš kovvad ååʹn brosyyr siiskõõzz ääiʹjab pueʹrben. Lââʹzztim jååʹđtemsijddu še teâttčuuʹǩǩ, koin lookki ohjjeet ooccâd lââʹssteâđaid Kela neʹttseeidain leʹbe teʹlfonkääzzkõõzzâst, maainast brosyyri teeʹkst peeiʹvtam da ǩiõllhuâlast vaʹsttääm Suvi Syrjänen.

Kuâsttjõʹsse lij uvddum jäänab sââʹjj ko ouddâl, da tõt lij vueiʹtlvâsttam tõn, što teeʹkst lie pijjum õõut ceäggčuuʹǩǩ sizz ääiʹjab kueiʹt ceäggčuuʹǩǩ sââʹjest. Lââʹssen äʹššvoudda suåppi snimldõõǥǥ tuejjee brosyyrâst čiõlggsab. Nääiʹt brosyyri seiddmeäʹr lie lâssnam, håʹt lââʹssteeʹkst jie leäkku puättam.

Brosyyri ođđ neʹttversioin lie välddam lokku še ođđ âsttjemvuõttõõlǥtõõzzid. Brosyyri neʹttversioi plaađđmõš lij ouddmiârkkân teâttikkânlookkjin hiâlpab ko ouddâl.

Sääʹmǩiõllsaž brosyyr kooumin sääʹmǩiõlin

Brosyyr lie õlmstõttum še puki Lääʹddjânnmest mainstum sääʹmǩiõlivuiʹm, tâʹvv-, aanar- da nuõrttsääʹmǩiõʹlle.

– Sääʹmǩiõlin ij leäkku jiijjâs čiõlggǩiõll, leâša čiõlggǩiõlâst lij šiõǥǥ vuâđđ še sääʹmǩiõllsaž jåårǥlõõzzid, maainast sääʹmǩiõllsaž saakkummšest vaʹstteei äʹšštobddi Arja Jomppanen.

Sääʹmǩiõllsaž brosyyrid õlmstââʹttet nuʹtt, što tõk lie priʹnttjemnalla neeʹttest pdf-teâttõssân. Brosyyrid vuäitt lookkâd da priʹnttjed addrõõzzâst www.kela.fi/saamenkieliset-esitteet.

Brosyyri siiskõõzz käunnʼje lääddasruõccâs da säämas še kela.fi-seeidain.

Looǥǥ lââʹzz