Ráđđehus evttoha leaskkaealáhaga mearreáigásažžan ja rabasbeallelažžii vuoigatvuođa leaskkaealáhahkii

Bearašealáhatdorvvu láhkaásaheapmi ođasmahttojuvvo. Ođastusa ulbmilin lea hábmet bearašealáhatdorvvu nu, ahte dat vástida servodaga ja bearrašiid rievdan dárbbuide. Ođastus buorida rabasbeallelačča áigáiboahtindorvvu leaskkaealáhatvuoigatvuođa olis sihke guhkida bargoealáhatlágaid mieldásaš máná ealáhatvuoigatvuođa 2 jagiin.

Jápmindáhpáhusa deaivvadettiin leaskka ja mánáid áigáiboahtin sihkkarasto bargoealáhatlágaid ja álbmotealáhatlága mieldásaš bearašealáhagain. Bearašealáhat sáhttá leat leaskkaealáhat dahje mánáealáhat.

Bearašealáhaga guoski láhkaásaheapmi ođasmahtto, ja lea dárkkuhus, ahte nuppástusat bohtet fápmui jagi 2022 álggus. Stuorámus nuppástusat leat

  • leaskkaealáhaga rievdan mearreáigásažžan jagi 1975 ja das maŋŋá riegádan olbmuide
  • leaskkaealáhatvuoigatvuođa viidáneapmi rabasbeallelaččaid gaskasažžan
  • bargoealáhatlágaid mieldásaš mánáealáhaga oažžuid sajádaga buorideapmi.

Leaskkaealáhaga bisttu ráddjen – rabasbeallelačča sajádat buorrána

Ráđđehus lea evttohan riikkabeivviide, ahte leaskkaealáhaga bistu ráddjejuvvo 10 jahkái. Leaskkaealáhat máksojuvvo náittoslihtus jápmán olbmuin leamaš leskii. Leaskkaealáhat máksojuvvo goittotge uhcimustá dan rádjai, go nuoramus mánáealáhahkii vuoigadahtton mánáin deavdá 18 jagi. Leaskkaealáhaga bisttu ráddjen guoská jagi 1975 ja das maŋŋá riegádan leaskkaid dáhpáhusas, mas beallelaš lea jápmán dan maŋŋá, go evttohuvvon lágat leat boahtán fápmui.

Bargoealáhatlágaid ja álbmotealáhatlága mieldásaš leaskkaealáhahkii livčče boahttevuođas vuoigatvuohta maiddái rabasbeallelaččas, guhte lea ássan ovdduguođđi olbmuin oktasaš dállodoalus uhcimustá 5 jagi boatkkaheamet ja geas lea oktasaš agivuloš mánná suinna. Mánná lea galgan ássat ovdduguođđiin ja leaskkain seammá dállodoalus. Dát leaskkaealáhat máksojuvvošii dan rádjai, go nuoramus oktasaš mánná deavdá 18 jagi. Boahttevaš bearašealáhatođastus ii guoskka leaskkaid, geat juo ožžot leaskkaealáhaga dahje geaidda dat lea mieđihuvvon ovdal evttohuvvon lágaid fápmuiboahtima.

Kela máksá leaskkaealáhaga dušše vuollái 65-jahkásaš leskii.

Mánáealáhahkii buorideamit

Bargoealáhatlágaid mieldásaš vuoigatvuohta mánáealáhahkii evttohuvvo jotkot 20 jagi rádjai. Dán áigge vuoigatvuohta mánáealáhahkii nohká 18 jahkásažžan.

Álbmotealáhatlága mieldásaš mánáealáhat máksojuvvo juo dál 21 jagi rádjai. 18 jagi deavdán nuora oasil eaktuduvvo goittotge ollesáigásaš stuđeren. Álbmotealáhatlága mieldásaš mánáealáhahkii eai evttohuvvo nuppástusat.

Lassidieđut