Pessijááh nubásmiteh Kela palvâlusâi já máávsui äigitaavluid

Pessijááh toledeh pargottesvuotâääigi almottempeeivijd já pargottesvuotâtorjuu máksupeeivijd. Áigápuátutoorjâ kiergân tilin ovdil pessijái, jis ucâmuš já lahtoseh láá toimâttum Kelan majemustáá 15.3.2024. Skillâtuorâstuv Kela palvâl äššigâsâid tme 13 räi, já áigápuátutorjuu kocceem lii áávus tme 16 räi.

Pessijááh toledeh pargottesvuotâääigi almottempeeivijd já pargottesvuotâtorjuu máksupeeivijd.

Jis pargottesvuotâääigi almottâs paje nohá majebaargâ 26.3.2024 tâi koskoho 27.3.2024, almottâs puáhtá macâttiđ majebaargâ 26.3.2024 já ruuđah láá tilist tolemustáá tuorâstuv 28.3.2024.

Jis pargottesvuotâääigi almottâs paje nohá tuorâstuv 28.3.2024, almottâs puáhtá macâttiđ koskoho 27.3.2024 já ruuđah láá tilist tolemustáá majebaargâ 2.4.2024.

Jis pargottesvuotâääigi almottâs paje nohá vástuppeeivi 29.3.2024, lávurduv 30.3.2024 tâi pasepeeivi 31.3.2024, almottâs puáhtá macâttiđ tuorâstuv 28.3.2024 já ruuđah láá tilist tolemustáá koskoho 3.4.2024.

Almottâs kannat toimâttiđ MuuKelast (OmaKela) jo macâttempeeivi iđedist, vâi kiergânep kieđâvuššâđ tom nuuvt jotelávt ko máhđulâš.

Pessijái vaikuttâs áigápuátutorjuu ucâmân

Áigápuátutorjuu majemuš máksupeivi ovdil pessijái lii tuorâstâh 28.3.2024. Toorjâ kiergân talle tilin, jis ucâmuš já puoh tárbuliih lahtoseh láá toimâttum Kelan majemustáá 15.3.2024.

Skillâtuorâstuv Kelast lii huápulii áigápuátutorjuu tarbâšeijeid kocceem puhelinpalvâlusâst já uásist palvâlemsoojijn tme 16 räi. Huápulâš tile puáhtá leđe ovdâmerkkân tot, ete äššigâs taarbâš aakuut máksučonnâsem talkkâsáid teikâ purrâmušverhijd.

Jis äššigâs taarbâš áigápuátutorjuu huápulávt Kela ávusorroomaaigij ulguubeln, te pyereestvaijeemkuávlu puáhtá kuorâttâllâm mield mieđettiđ estâdeijee áigápuátutorjuu. Aakuut kriisâtiileest poosij ääigi äššigâs puáhtá leđe ohtâvuođâst jieijâs pyereestvaijeemkuávlu sosiaalkocemân.

Äššigâspalvâlem ávusorroomääigih pessijái

Kela puhelinpalvâlus lii skillâtuorâstuv 28.3.2024 áávus tme 9-13, mutâ áigápuátutorjuu palvâlemnumerân 020 692 207 puáhtá huápulijn tiilijn suáittiđ tme 16 räi. Tun kaavnah Kela palvâlemnumerijd neetist čujottâsâst www.kela.fi/soita-kelaan.

Tavesämikielâlâš puhelinpalvâlus lii tuáistáážân kiddâ. Tun finniih ohtâvuođâ palvâlusân vuolgâtmáin ohtâvuotâväldimtáttum čujottâsân saame@kela.fi.

Nuorttâlâškielâlâš puhelinpalvâlus lii kiddâ skillâtuorâstuv. Nuorttâlâškielâlâš puhelin- já káiduspalvâlus palvâl táválávt tuorâstuvâi tme 9-11. Tun finniih palvâlusân ohtâvuođâ meid eres aaigijn vuolgâtmáin ohtâvuotâväldimtáttum čujottâsân saame@kela.fi.

Skillâtuorâstâh vaaikut meid áávus orroo palvâlemsoojij áávus oromân. Áávus orroo palvâlemsajeh maneh kiddâ majemustáá tme 13, mutâ uási kocá huápulii áigápuátutorjuu tarbâšeijei várás tme 16 räi. Huápulii áigápuátutorjuu keežild koceh čuávuvááh palvâlemsajeh:

• Espoo/Leppävaara
• Helsig/Kamppi
• Hämeenlinna
• Jyväskylä
• Kajaani
• Kokkola
• Kotka
• Kuopio
• Lahti
• Lappeenranta
• Oulu
• Pori
• Raisio
• Rauma
• Ruávinjargâ
• Salo
• Seinäjoki
• Tampere
• Turku
• Vaasa
• Vantaa/Tikkurila.

Täärhist palvâlemsoojij čujottâsâid palvâlemsajeucâmist čujottâsâst www.kela.fi/palvelupisteen-haku.

Kela puhelinpalvâlus já palvâlemsajeh láá kiddâ

• kuhesvástuppeeivi 29.3.2024
• pessijâšlávurduv 30.3.2024
• 1. pessijâšpeeivi 31.3.2024
• 2. pessijâšpeeivi 1.4.2024.

Pessijái spiekâsteijee ääigih oovtâstpargokuoimijd

Skillâtuorâstuv 28.3.2024 Kela palvâl oovtâstpargokuoimijd tme 13 räi. Tuáhtárlinjá lii kuittâg kiddâ skillâtuorâstuv. Puoh palvâlemnumereh kuoimijd láá kiddâ 29.3.–1.4.2024.