Šleđgâtorjuu uuccâm álgá uđđâivemáánust
Ovdâskodde lii tuhhiittâm laavâ koskâpuddâsii šleđgâtorjust. Šleđgâtorjuin lii tárguttâs tuárjuđ uccáátiänájeijee päikkituáluid tiileest, mast šleđgâhade vuáimálâš tivrom toovât vaigâdvuođâid stuorrâ šleđgârekigij mäksimân.
Laahâ koskâpuddâsii šleđgâtorjust puátá vuáimán 1.1.2023. Šleđgâtoorjâ lii uáivildum päikkituáloid, kiäh iä paste uccâ ihepuáđui tiet anneeđ ollásávt uđđâ šleđgâkiäpádâs viäruttâsâst. Šleđgâkiäpádâs lii te vuosâsajasâš vyehi finniđ iše šleđgâkoloid. Päikkituálu ij paste finniđ sehe šleđgâkiäpádâs já šleđgâtorjuu. Uccâ-uv šleđgâtorjuu meeri meddâlist ollásávt vuoigâdvuođâ šleđgâkiäpádâsân.
Šleđgâkiäpádâs tâi šleđgâtorjuu puáhtá finniđ šleđgâenergiakoloid ađai šleđgâenergia, árvulaseviäru já máhđulii vuáđumáávsu koloid. Šleđgâsirdem koloin já máhđulijn maŋanemmáávsuin ij paste finniđ šleđgâkiäpádâs, iäge tain määvsi šleđgâtorjuu.
Šleđgâtorjuu ij paste finniđ, jis šleđgâkoloh láá vuálá 400 e/mp
Uuccâmluámáttâh almostittoo 7.1.2023. OmaKelast ucâmuš puáhtá toimâttiđ 12.1.2023 rääjist.
Ucâmuš lahtosin taarbâš šleđgâreekkig. Šleđgâtoorjâ lii uáivildum šleđgâenergiakoloid, moh láá šoddâm 1.1.–30.4.2023 koskâsii ääigi.
Torjuu puáhtá finniđ tuš oovtâ fastâ kiävtust orroo aassâmviste šleđgâkoloid. Aassâmviste kalga leđe Suomâst.
Šleđgâtorjust lii jiešvástádâs 400 e/mp. Torjuu meeri lii 60 % tain šleđgâenergiakoloin, moh maneh jiešvástádâs paijeel. Enâmustáá šleđgâtorjuu puáhtá finniđ 660 e/mp. Enâmusmere šleđgâtorjuu finnee te talle, jis šleđgâenergiakoloh láá 1 500 e/mp teikâ eenâb. Ucemus Kelan mäksimnáál puáttee šleđgâtorjuuh láá 5 e/mp.
Šleđgâtoorjâ lii viäruttes hiätu, ige tot vaaigut Kela äššigâs eres hiäđoid. Jis äššigâs lii kuittâg finnim šleđgâreekkig várás áigápuátutorjuu, te sun ij táválávt paste finniđ siämmáá reekkig vuáđuld šleđgâtorjuu.
Máhđulâšvuođâ šleđgâkiäpádâsân kalga selvâttiđ vistig
Šleđgâtorjuu puáhtá te uuccâđ talle, jis ij paste anneeđ šleđgâkiäpádâs ollásávt.
Šleđgâkiäpádâs puáhtá finniđ, jis šleđgâenergiakoloh láá paijeel 2 000 eurod 1.1.–30.4.2023 kooskâst. Kiäpádâs meeri lii 60 % tain šleđgâenergiakoloin, moh láá paijeel 2 000 eurod. Enâmustáá šleđgâkiäpádâs puáhtá finniđ 2 400 eurod ivveest.
Ovdâmerkkân, jis šleđgâenergiakoloh láá ohtsis 4 000 eurod uđđâive–cuáŋuimáánu ääigi, te summeest puáhtá kepidiđ viäruttâsâst 60 % 2 000 euro paijeel mannee uásist ađai 1 200 eurod. Jis päikkituálun čoggâšuveh ivveest 2023 puátuviäruh vuálá 1 200 eurod ige kiäpádâs pyevti ollásávt tondiet anneeđ, te päikkituálust lii vuoigâdvuotâ šleđgâtorjui.
Jieijâs viärui mere puáhtá árvuštâllâđ Viäruhaldâttuv viäruprooseent rekinistemohjelmijn.
Oles ive 2023 puátuviärui já uđđâive-cuáŋuimáánu šleđgâkoloi mere árvuštâllâm muuneeld puáhtá leđe vaigâd. Šleđgâtorjuu puáhtá kuittâg uuccâđ ive 2023 loopâ räi. Uđđâive–cuáŋuimáánu šleđgârekigijd kannat mäksim maŋa pieijâđ vuárkán, tastko reekkig annoo šleđgâtorjuu ucâmuš lahtosin.
Tiäđáttâsân peividum 1.12. tiätu tast, ete ucâmušâid puáhtá toimâttiđ OmaKelast 12.1.2023 rääjist.