Kela lea almmustahttán jagi 2024 etniidpáhka – buktagiid vuosttas kritearan leat kvaliteahta ja dorvvolašvuohta
Jagi 2024 etniidpáhkas leat 39 buktaga. Dán jagige buktagiid skáhppomis deháleamos kritearan lea leamaš kvalitehta. Kela álgá juohkit jagi 2024 etniidpáhkaid dasto, go jagi 2023 etniidpáhkat lea juhkkon lohppii.
Kela lea almmustahttán jagi 2024 etniidpáhka. Dán jagi etniidpáhkka sisdoallá 39 buktaga.
Kela mieđihan etniiddoarjaga dárkkuhussan lea doarjut vánhema ja máná buresveadjima. Etniiddoarjaga sáhttá válljet jogo etniidpáhkkan dahje 170 euro vearuhis ruhtasubmin. Sullii guokte goalmmátoasi válljejit etniidpáhka.
-Etniidpáhka válljejit dábálepmosat vuosttas geardde riegádahttit. Ruhtasupmi fas sii, geain leat jo smávva mánát ja buktagat dáid mánáid etniidpáhkain dahje geat leat ožžon oahpes olbmuin ovddit jagiid áigge etniidpáhka buktagiid, plánejeaddji Veera Petäjä Kelas muitala duogážis.
Etniidpáhka buktagiidda sáhttá oahpásmit siiddus, gos muitaluvvo Kela etniidpáhkas (suomagillii), ja dan vuođul válljet, váldágo doarjaga páhkkan vai ruhtan. Petäjä muittuha, ahte etniidpáhka biktasiid sáhttá addit ovddos guvlui čuovvovaš mánnábearrašii, go mánnái eai dat šat heive. Kela neahttasiidduin gávdnojit maiddái neavvagat etniidpáhka buktagiid geavahanáiggi guhkideapmái.
Kvalitehta lea etniidpáhka vuolggasadji
Etniidpáhka buvttaválljašupmi seailu jagis jahkái buorre muddui seammaláganin, muhto ovdamearkan tekstiillaid ivnnit ja buktagiid mearit molsašuddet. Ráđđehusprográmmasge máinnašuvvon spábba geahččaluvvo lasihuvvot etniidpáhkkii áramustá jagi 2026.
Etniidpáhka buktagat gilvalahttojit jahkásaččat. Kela teste buktagiid sihkkarastin dihte kvalitehta ja dorvvolašvuođa.
-Midjiide lea dehálaš, ahte buktagat leat dorvvolaččat ja girdet geavaheami. Rohttenlohkat eai oaččo skáidnet máná, eaige guhkes láigestuhkat oaččo leat, dasgo dat sáhttet sorrot máná juolgesuorpmaid dahje suorpmaid birra. Sávnnjit ja deaddinboalut galget gierdat geavaheami, jurista Johanna Aholainen Kelas muitala.
-Dasa lassin etniidpáhka buktagat galget movttiidahttit oktasaš bottuide. Aholainen muitala, ahte páhkas fárus lea girji, man háliidit, ahte nanne máná ja vánhema gulahallama.
Etniidpáhka kássa govain fearánastet ealliidbearrašat
Etniidpáhka govaid namma lea Máinnasmeahcci – Satumetsä. Dat govvida meahci oahpes ealliid iežaset ruovttubirrasis Suoma luonddus. Govaid lea plánen govvaráhkadeaddji ja gráfalaš plánejeaddji Heli Hyppönen. Govat válljejuvvojedje álbmotjienasteami vuođul.
-Lean ilolaš, go oainnán mu plánen govaid dán jagi etniidpáhkas. Govat ožžo inspirašuvnna iešguđetlágan ealliidbearrašiin, mat fearánastet Suoma luonddus sierra jagiáiggiid. Sávan, ahte olu govat ja daid liekkus mielladilli buktet ilu juohke bearrašii, Hyppönen muitala.
Máinnasmeahcci-govat čiŋahit maiddái boahtte jagi etniidpáhka.
Etniidpáhkkii sáhttá oažžut maiddái sámegielat vuosttasgirjji
Kelas sáhttá háliidettiin bivdit etniidpáhkkii sámegielat Illu rišaida! -vuosttasgirjji buot golmma sámegillii. Dan lassin neahtas sáhttá luđet pdf-veršuvnna etniidpáhka dálá Bus, bus, bussáčivga -vuosttasgirjjis.