Kela alttad oʹđđest tâʹvvsääʹmǩiõllsaž teʹlfon- da ougglõskääzzkõõzz
Kela alttad 13.2. oʹđđest tâʹvvsääʹmǩiõllsa teʹlfon- da ougglõskääzzkõõzz. Kääzzkõs lij juätkast äävai juõʹǩǩ arggpeeiʹv tueʹlespeeiʹvin. Kääzzkõʹsse vuäitt kueʹđđed še õhttvuõđväʹlddemraukkmõõžž.
Kela tâʹvvsääʹmǩiõllsaž teʹlfon- da ougglõskääzzkõs ävvan oʹđđest âlddsin õõut eeʹjj pešttam kõõut mâŋŋa vuõssaarǥ 13.2.2023. Kääzzkõs lij äävai aarǥi čiâss 9–11. Tâʹvvsääʹmǩiõllsaž teʹlfonkääzzkõõzz nââmar lij 020 634 2894.
Tâʹvvsääʹmǩiõllsa ougglõskääzzkõõzz õhttvuõttväʹlddemliŋkk käunnai sääʹmǩiõllsaž kela.fi-seeidain. Ougglõskääzzkõõzzâst äʹššneǩ vuäǯǯ ougglõsõhttvuõđ Kela äʹššneǩ-kääzzkõʹsttja juʹn-a teâttmašinain leʹbe mobiilaparaattin staanlânji da hieʹlǩeld aivv dååma ååreen. Ougglõskääzzkõsõhtvuõđ vuäǯǯ hieʹlǩeld še Lappi Virtu-paaiʹǩin.
Kela lij taʹrjjääm tâʹvvsääʹmǩiõllsaž teʹlfon- da ougglõskääzzkõõzz še ääiʹjben. Kääzzkõõzz looppteš kõskkpoddsânji pâʹsslašttâm-mannust 2022, ǥu Kelast jiâ leämmaž täʹl ni vooʹps tâʹvvsääʹmǩiõllsa kääzzkõsäʹšštoobdi. Ååʹn Kelast liâ kuõʹhtt tâʹvvsääʹmǩiõllsa kääzzkõsäʹšštoobdi.
Nuõrttsääʹmǩiõllsaž kääzzkõs juätkk vuäʹmm maʹlle
Kela taʹrjjad teʹlfon- da ougglõskääzzkõõzz še nuõrttsääʹmǩiõʹlle. Nuõrttsääʹmǩiõllsaž kääzzkõs lij še äävai juõʹǩǩ arggpeeiʹvin čiâss 9–11. Nuõrtsääʹmǩiõllsa teʹlfonkääzzkõõzz nââmar lij 020 634 4795. Nuõrttsääʹmǩiõllsaž ougglõskääzzkõõzz vuõigg liŋkk käunnai sääʹmǩiõllsaž kela.fi-seeidain.
Kela alttii nuõrtsääʹmǩiõllsa kääzzkõõzz mõõnni eeʹjj. Kelast lij ååʹn õhtt nuõrttsääʹmǩiõllsaž kääzzkõsäʹšštobddi.
Sääʹmǩiõllsaž kääzzkõʹsse vuäitt kueʹđđed õhttvuõđväʹlddemraukkmõõžž
Äʹššneǩ vuäitt še kueʹđđed sääʹmǩiõllsaž kääzzkõʹsse õhttvuõđväʹlddemraukkmõõžž, täʹl Kela sääʹmǩiõllsaž kääzzkõsäʹšštobddi lij õhttvuõđâst äʹššnekka. Õhttvuõđväʹlddemraukkmõõžž vuäitt vuõltteed lääʹddǩiõlin leʹbe sääʹmǩiõlin neʹttpååʹštaddrõʹsse saame@kela.fi. Teâđat saaǥǥâst nõõmad da teʹlfon-nââmrad di tõn, mâid äʹšš kuâskk da mâin ǩiõlin taarbšak kääzzkõõzz.
Aanarsääʹmǩiõllsa kääzzkõõzz vuäǯǯ taarbšeen tuʹlǩǩeeʹl. Jõs taarbšak kääzzkõõzz aanarsääʹmǩiõlin, leäkku õhttvuõđâst Kela päikka. Kela riâššâm tulkk lij tuʹnne õhttvuõđâst, što vueiʹtveʹted suåppâd äʹššummuž ääiʹjpooddâst.
Kela sääʹmǩiõllsaž kääzzkõõzz kääzzkâʹstte Väʹlddkååddlânji jälstempääiʹǩest soorčǩani. Kela sääʹmǩiõllsaž neʹttseeidain čiõlǥtet tääʹrǩben Kela taʹrjjeem sääʹmǩiõllsaž kääzzkõõzzin da Kela ouddõõzzin jeeʹres jieʹllemvueʹjjin.
Sääʹm äʹššneeʹǩǩest lij sääʹm ǩiõll-läkka vuâđđõõvvi vuõiggâdvuõtt håiddad Kela-aaʹššid jiijjâs ǩiõlin.
Looǥǥ lââʹzz
Kela sääʹmǩiõllsa brosyyr (Kela.fi)
Kela sääʹmǩiõllsa lomaakk (Kela.fi)
Tiʹlle Kela sääʹmǩiõllsaž oođâsǩeeʹrj (elämässä.fi)
Ougglõskääzzkõs dommsåffa Lappist (elämässä.fi)