Kela säursmâttmõõžž ââʹnnem GAS-mõõntõõllâm materiaal käunnʼje ååʹn koolm sääʹmǩiõʹlle
Kela säursmâttmõõžžâst lij ââʹnnmest GAS-mõõntõõllmõš säursmâttmõõžž täävtõõzzi raajjâm da tõi čõõđ viikkâm ärvvtõõllmõõžž neävvan. GAS-mõõntõõllmõõžž Ǩiõttǩeʹrjj da Jiijjan täävtõõzz -lomakk käunnʼje ååʹn še tâʹvvsääʹmǩiõʹlle, aanarsääʹmǩiõʹlle da nuõrttsääʹmǩiõlle.
GAS-mõõntõõllmõš (Goal Attainment Scaling) toiʹmmai Kela säursmâttmõõžžâst täävtõõzzi raajjâm da ärvvtõõllâm neävvan. Säursmâttmõõžžâst meäʹrtet õõutsââʹjest äʹššniiʹǩǩin realiistlaž, äiʹǧǧtauʹlle pijjum, metteemnalla da ǩeeʹrjeemnalla åårrai da äʹššnekka miârkteei täävtõõzzid da ärvvtõõlât tõid kuâsttmõõžž. GAS-mõõntõõllmõš vueiʹtlvâstt tääʹzz meâldlaž täävtõõzzi metteemvuõđ, mii hiâlpat säursmâttmõõžž ääuʹǩ ärvvtõõllmõõžž da raportâsttmõõžž.
Äʹššneeʹǩǩ täävtõõzzid raajât Jiijjan täävtõõzz -lomaʹǩǩe säursmâttmõõžž aalǥâst, da tõiʹd ärvvtõõlât säursmâʹttem ääiʹj da säursmâttmõõžž puuđeen. Täävtõõzzid meäʹrtõõlât vittpuärddsaž ceäkksid, koin kõskktääʹss (0) kovvad täävtõõzzid kuåsttmõõžž vueʹrddemnalla åårrai tääʹzz, da nuuʹbb tääʹzz kovvee juʹn-a hueʹnab (-1, -2) leʹbe pueʹrab (+1, +2) täävtõõzzid kuåsttmõõžž.
GAS-mõõntõõllmõõžž âânnmõõžž oudldet pukin tõin Kela säursmâʹttemkääzzkõõzzin, koin kääzzkõskovvõs ohjjad čõõđviikkmõõžž.
Kela veekk sääʹmǩiõllsa säursmâttmõõžž ooudårra vääʹldeeʹl lokku ǩiõlʼlaž vuõiggâdvuõđid
Kela pârgg oouʹdeed sääʹm ǩiõll-lääʹjj täävtõõzzi da säʹmmlai tuõttääʹššlaž õõutverddsažvuõđ teâuddjummuž takai jieʹllmest. Säʹmmlai ǩiõlʼlaž vuõiggâdvuõđ kueʹsǩǩe še Kela säursmâʹttemkääzzkõõzzid, da äʹššneeʹǩǩest lij vuõiggâdvuõtt ââʹnned sääʹmǩiõl Kela säuʹrsmâʹttemääʹšš ǩiõttʼtõõllmõõžžâst. Kela jääʹrjast tän poodd Tules-kuursid sääʹmǩiõllsaid, da sääʹmǩiõllsa vuäiʹtte še nuʹtt haaʹleen vuäǯǯad tuʹlǩǩõõzz Kelan jäʹrjstem jeeʹres säursmâttmõõžžid. Kela lij še jåårǥlâttam säursmâttmõõžž ooccâmlomaakkid sääʹmǩiõlid. Lomaakk käunnʼje Kela sääʹmǩiõllsain neʹttseeidain.
GAS-mõõntõõllmõõžž jåårǥlâʹttemtuâjj lij čõõđtum vueʹssen Säursmâttmõš sääʹmǩiõllsaid -projeeʹktest, koʹst ooudâsviiǥǥât da ǩiõččlõõddât sääʹmǩiõllsaid jurddum säursmâʹttemkääzzkõõzz, kååʹtt väldd lokku ǩiõl da kulttuur. Projeeʹktest ǩiõččlõddum säursmâʹttemkääzzkõõzz täävtõõlât äʹlǧǧem eeʹjj 2026 aalǥâst. Äʹššneeʹǩǩ jiiʹjjesnallšem taarbid lokku vaʹlddi säursmâʹttemkääzzkõs lij jurddum 18–67-âkksaid sääʹmǩiõllsaid leʹbe sääʹmkulttuur meâldlaž säursmâttmõõžž taarbšeei äʹššniiʹǩǩid, koin lie miõlltiõrvâsvuõđ vaʹǯǯtõõzz. Säursmâʹttemkääzzkõʹsse ohjjummšest da ooccmõõžžâst juuʹrdet teâđted da tõʹst õlmstââʹttet jiiʹjjes neʹttseeid čõhččmannust 2025.
Tobdstõõđ sääʹmǩiõllsaid materiaalid
GAS-mõõntõõllâmvueʹppes
GAS-lomakk (Jiijjan täävtõõzz)
Kela lomaakk ooumažäʹššniiʹǩǩid