Kela já Sämitigge ráđádâllii Anarist – áigápuátutorjuu hiäturavvuuh suogârdâlmân já raajij rasta ulâtteijee koččâmuššáid jieijâs pargojuávkku
Kela já Sämitige jyehi-ivvááš ráđádâlmeh uárnejuvvojii 27.5. Säämi kulttuurkuávdáš Sajosist, Anarist. Ráđádâlmij fáddán lâi taan tove eromâšávt sämikulttuur já sämikielâi huámmášumán väldim hiäđuin.
Aalmugiäláttâhlájádâs já Sämitige oovtâstpargo sämmilij sosiaaltorvo pyeredem já säämi kielâlaavâ kenigâsvuođâi olášuttem várás vuáđuduvá ive 2021 uđâsmittum oovtâstpargosopâmušân. Kela já Sämitige jyehi-ivvááš oovtâstpargoráđádâlmijn čuávuh sopâmuš mittomeerij olášume ihásávt sierâ fáádái mield. Ive 2025 ráđádâlmijn tárkkojii eromâšávt Kela hiäturavvuid já raajij rasta ulâtteijee koččâmušâid.
– Mist Kelast lii puáttee ääigi mittomeerrin suogârdâllâđ, maht mij puávtáččijm väldiđ huámmášumán sämmilij kielâlijd já kulttuurlijd vuoigâdvuođâid Kela hiäđui kieđâvušmân uáivildum hiäturavvuin já tienuuvt meid čuávdimvuovijn. Mii vuossâmuš lävkki lii tarkkuđ vuáđuáigápuátutorjuu hiäturavvuid aasâm uáinust, iätá hiäđui já palvâlusâi vuávámohtâduv hovdâ Mia Helle Kelast.
Pargojuávkku smiettâđ čuávdusijd raajij rasta ulâtteijee tiilijd
Sämmilij sosiaaltoorvon lohtâseijee koččâmušâid, moh ulâtteh raajij rasta, suogârdâllii ráđádâlmijn ovdâmerkkâtábáhtusâi vievâst. Ráđádâlmijn meridii vuáđudiđ pargojuávhu, moos meriduvvojii pargoh já mittomereh. Pargojuávkun kuleh sehe Kela já Sämitige ovdâsteijeeh.
– Maaŋgah sämmiliih pargeh, ääsih já kevttih palvâlusâid sierâ staatâi kuávlust, mii toovât hástusijd sämmilij kielâ já kulttuur huámmášumán väldimân sierâ enâmij sosiaaltorvoost. Mun tuáivum, ete pargojuávhust kávnojeh konkreetliih vyevih hástusij čuávdimân, iätá Sämitige saavâjođetteijee sajasâš Tuomas Aslak Juuso.
Moonnâm ive tooimâi árvuštâllâm já kejâstâh puáttee ááigán
Ráđádâlmijn ellii čoođâ meid moonnâm já puáttee ive tooimâid sämmilij sosiaaltorvo háárán. Lasseen savâstâllii eereeb iärrás sämmilij sosiaaltoorvon lohtâseijee tutkâmušâst sehe Kela já Sämitige ráhtádâtmist tooimáid, maid tuotâvuotâ- já sovâdâttâmkomissio loppâivveest almostittemnáál raapoort váátá. Tilálâšvuođâst oovdânpuohtii meid Suomi.fi sämikielân -palvâlus, mii olášuttoo virgeomâhái ohtsii sämikielâlij palvâlusâi ovdedem Mij oovtâst -viärmáduv ooleest.
Kela palvâlemhovdâ Antti Jussila illood pyeri vuoiŋâ oovtâstpargoost, mii vuáđuduvá koskânâs luáttámušân já oovtâst porgâmân já mii ij rájášuu tuše jyehi-ivvááš ráđádâlmáid.
– Tääl Kela fáálá äššigâspalvâlem puhelin peht já káiduspalvâlusân nuorttâlâškielân sehe tulkkum peht anarâškielân já orjâlâškielân. OmaKela sämikielâlii versiost MuuKelast puáhtá hoittáđ motomijd aašijd puoh kuulmâ sämikielân. Mij tuáivup, ete Kela sämikielâlij palvâlusâi kevttim lassaan ovdiist, já ete mij pyehtip návt jieččân uásild tuárjuđ sämikielâ já -kulttuur eellimvuáimálâšvuođâ mii virgeomâhâšpargoin, paahud Jussila.
Luuvâ lase