Ive 2025 enijpakkeet lii almostittum – Kela uđâsmit enijpakkeet äššigâsâi tuoivui mield
Kela lii almostittâm ive 2025 enijpakkeet. Taan-uv ive enijpakkeet pyevtittâsvaljiittâs lii pyeredum äššigâsmacâttâs vuáđuld. Äššigâsâi tuoivui mield enijpakkeet pyevtittâsah láá tagareh, ete taid puáhtá kevttiđ ovdiist kuhheeb ääigi.
Ive 2025 enijpakettist láá 38 pyevtittâssâd. Pakkeet jyehim álgá, ko ive 2024 enijpaketteh láá puoh juohhum. Taan tove tiäđui mield ive 2025 enijpakkeet jyehim álgáččij syeini-porgemáánu jorgálduvâst.
Äššigâsah muštâleh, Kela kuldâl
Enijpakkeet pyereduvvoo ain äššigâsmacâttâs vuáđuld. Äššigâsâi tuoivuuh láá valdum huámmášumán pyevtittâsâi olgohäämist já meid jiešvuođâin. Kela addel äššigâssáid maaŋgâid máhđulâšvuođâid vaiguttiđ.
– Jyehi ive äššigâsah uážžuh jienâstiđ uáđđimseehâ já haalar olgohäämist. Toos lasseen pakettist láá taan ive pyevtittâsah, main láá äššigâsâi tuáivum jiešvuođah. Ovdâmerkkân tääl meid ucebijn kiesâstembodyin lii häcciuási, mon puáhtá heiviittiđ, kuás siämmáš piivtâs pištá umogáá kiävtust kuhheeb ääigi, vuávájeijee Veera Petäjä kovvee.
Äššigâsah pyehtih vaiguttiđ meid pyevtittâsâi valjiimân, Petäjä muštâl.
– Mij finnijm macâttâs tast, ete pakettist ij lamaš filtti. Ive 2025 enijpakettist lii filtti.
Enijpakkeet lii maŋgâsân velttidmettum
Enijpakkeet skappumárvu lii 170 eurod, mii lii pissoom siämmážin ive 2018 rääjist. Enijpakkeet pyevtittâsâi meeri lii kiäppánâm, ko 170 euroin ij finnii siämmáá ennuv pyevtittâsâid ko vala čiččâm ihheed tassaaš. Veikâ pyevtittâsah láá ucceeb ko ovdil, te taid puáhtá uđđâ jiešvuođâi tiet kevttiđ kuhheeb ääigi.
Tääl maŋgâ pärnipeerâ iälá ekonomâlávt korrâ aaigijd. Enijpakettist láá maaŋgah pyevtittâsah, moh láá umogâšääigi aargâst velttidmettumeh.
– Enijpakkeet tárguttâs lii pyehtiđ torvo perrui uđđâ eellimtiileest. Mij finnip äššigâsmacâttâs tast, ete pakkeet pyevtittâsah láá velttidmettumeh maŋgáid perruid, Petäjä čielgee.
Kela oovded puátteevuođâst-uv enijpakkeet äššigâsmacâttâs vuáđuld. Návt enijpakkeet västid meid puátteevuođâst perrui muttojeijee tárboid.
Kelast puáhtá táttuđ enijpakettân sämikielâlii vuosâkirje
Kelast puáhtá haalijddijn táttuđ enijpakettân sämikielâlii vuosâkirje. Tiilám puáhtá toohâđ vuolgâtmáin šleđgâpoostâ čujottâsân saame@kela.fi. Kelast puáhtá tiiláđ Ilo riškáttâl! -vuosâkirje (pdf). Toos lasseen tun puávtáh uápásmuđ kela.fist uđđâsumos Loruleipuri teikâ Laavlâliäiboo-vuosâkirje sämikielâlijd jurgâlussáid (pdf).