Elrávdnjedoarjaga ohcan álgá ođđajagimánus
Riikkabeaivvit lea dohkkehan lága gaskaboddosaš elrávdnjedoarjagis. Elrávdnjedoarjagiin lea dárkkuhus doarjut ruovttudoaluid, geat dinejit unnán dilálašvuođain, main elrávnnji hatti garra loktaneapmi dagaha váttisvuođaid stuorra elrávdnjegoluid máksimis.
Láhka gaskaboddosaš elrávdnjedoarjagis boahtá fápmui 1.1.2023. Elrávdnjedoarjja lea oaivvilduvvon dállodoaluide, geat eai sáhte unna jahkeboađuid dihte ávkkástallat dievaslaččat ođđa elrávdnjegeahpádusa vearuhusas. Elrávdnjegeahpádus lea de vuosttaš vuohki oažžut veahki elrávdnjegoluide. Ruovttudoallu ii sáhte oažžut sihke elrávdnjegeahpádusa ja elrávdnjedoarjaga. Elrávdnjedoarjaga unnage mearri doalvu ollásit vuoigatvuođa elrávdnjegeahpádussii.
Elrávdnjegeahpádusa dahje elrávdnjedoarjaga sáhttá oažžut elrávdnjeenergiijagoluide dahje elrávdnjeenergiija, árvolassivearu ja vejolaš vuođđomávssu goasttádusaide. Elrávnnjesirdima goluin ja vejolaš ádjánanmávssuin ii sáhte oažžut elrávdnjegeahpádusa, iige máksojuvvo elrávdnjedoarjja.
Elrávdnjedoarjaga ii sáhte oažžut, jos elrávdnjegolut leat vuollel 400 e/mb
Ohcanskovvi almmustahttojuvvo 7.1.2023. OmaKelas ohcamuša sáhttá doaimmahit 12.1.2023 rájes.
Ohcamuša mielddusin dárbbašuvvo elrávdnjerehket. Elrávdnjedoarjja lea oaivvilduvvon elrávdnjeenergiijagoluide, mat leat šaddan áigodagas 1.1.–30.4.2023.
Doarjaga sáhttá oažžut dušše ovtta vistti elrávdnjegoluide, mii lea fásta geavahusas. Visti galgá leat Suomas.
Elrávdnjedoarjagis lea iežasvástu 400 e/mb. Doarjaga mearri lea 60 % dain elrávdnjeenergiijagoluin, mat mannet iežasvásttu badjel. Eanemusat elrávdnjedoarjaga sáhttá oažžut 660 e/mb. Maksimálameari elrávdnjedoarjaga oažžu de dalle, jos elrávdnjeenergiijagolut leat 1 500 e/mb dahje eanet. Unnimus elrávdnjedoarjagat, mat bohtet Kelai máksinláhkái leat 5 e/mb.
Elrávdnjedoarjja lea vearuhis ovdu, iige dat váikkut Kela áššehasa eará ovdduide. Jos áššehas leat goittotge ožžon elrávdnjerehkega várás áigáiboahtindoarjaga, son ii sáhte dábálaččat oažžut seamma rehkega vuođul elrávdnjedoarjaga.
Vejolašvuođa elrávdnjegeahpádussii ferte čielggadit vuos
Elrávdnjedoarjaga sáhttá de ohcat dalle, jos elrávdnjegeahpádusa ii sáhte ávkkástallat dievaslaččat.
Elrávdnjegeahpádusa sáhttá oažžut, jos elrávdnjeenergiijagolut leat badjel 2 000 euro áigodagas 1.1.–30.4.2023. Geahpádusa mearri lea 60 % dain elrávdnjeenergiijagoluin, mat leat badjel 2 000 euro. Eanemusat elrávdnjegeahpádusa sáhttá oažžut 2 400 euro jagis.
Ovdamearkka dihte jos elrávdnjeenergiijagolut leat oktiibuot 4 000 euro ođđajagimánu-cuoŋománu áigge, supmis sáhttá geahpedit vearuhusas 60 % 2 000 euro badjel manni oasis dahje 1 200 euro. Jos ruovttudollui čoaggana jagi 2023 áigge boahtovearru vuollel 1 200 euro iige dievaslaš geahpádusa sáhte dan dihte dahkat, ruovttudoallu lea vuoigadahtton elrávdnjedoarjagii.
Iežas vearuid meari sáhttá árvvoštallat Vearrohálddahusa vearroproseantarehkenastiin.
Olles jagi 2023 boahtovearuid ja ođđajagimánu-cuoŋománu elrávdnjegoluid meari árvvoštallan ovddalgihtii sáhttá leat váttis. Elrávdnjedoarjaga sáhttá goittotge ohcat jagi 2023 loahpa rádjai. Ođđajagimánu-cuoŋománu elrávdnjerehkegiid gánneha rádjat máksima maŋŋá, go rehket dárbbašuvvo elrávdnjedoarjaga ohcamuša mielddusin.
Dieđáhussii beaiváduvvon 1.12. diehtu das, ahte ohcamušaid sáhttá doaimmahišgoahtit OmaKelas 12.1.2023 rájes.