Jagi 2025 etniidpáhkka lea almmustahttojuvvon – Kela ođasmahttá etniidpáhka áššehasaid sávaldagaid vuođul
Kela lea almmustahttán jagi 2025 etniidpáhka. Dánge jagi etniidpáhka buktagiid valljodat lea ovddiduvvon áššehasmáhcahaga vuođul. Áššehasaid sávaldagaid mielde etniidpáhka buktagat leat dakkárat, ahte bistet ain guhkit áigge.
Jagi 2025 etniidpáhkas leat 38 buktaga. Páhka juohkin álgá go jagi 2024 etniidpáhkat leat juhkkojuvvon lohppii. Dalá dieđuid mielde jagi 2025 etniidpáhka juohkin álggášii suoidne-borgemánu molsašumis.
Áššehasat muitalit, Kela guldala
Etniidpáhkka ovddiduvvo jotkkolaččat áššehasmáhcahaga vuođul. Áššehasaid sávaldagat leat váldon vuhtii nu buktagiid lávas ja iešvuođain. Kela fállá áššehasaide máŋga vejolašvuođa váikkuhit.
– Juohke jagi áššehasat ožžot jienastit oađđinseahka ja obbabiktasa lávas. Lassin páhkas leat dán jagi buktagat, main leat áššehasaid sávvan iešvuođat. Ovdamearkka dihte dál maiddái unnit giessanmállet bodyin lea hárčeoassi dakkár ahte dan sáhttá muddet, vai seamma bivttas bistá njuoratmánás guhkit áigge, plánejeaddji Veera Petäjä govvida.
Áššehasain lea máid sáni sadji maiddái dasa, makkár buktagat leat mielde, Petäjä muitala.
– Mii oaččuimet máhcahaga das, ahte páhkas ii lean filte. Jagi 2025 etniidpáhkas lea filte mielde.
Etniidpáhkka lea máŋgasii vealtameahttun
Etniidpáhka háhkanárvu lea 170 euro, mii lea bisson seammán jagis 2018. Etniidpáhka buktagiid mearri lea geahppánan, daningo 170 euroin ii šat oaččo seamma ollu buktagiid go vel čieža jagi dassái. Vaikke buktagat leat unnit mearri go ovdal, dat bistet ođđa iešvuođaid dihte guhkit áigge.
Dál máŋgga mánnábearrašis lea ekonomalaččat čavges áiggit. Etniidpáhkka sisttisdoallá máŋggaid njuoratmánnáárggas dárbbašlaš dárbašiid.
– Etniidpáhka ulbmilin lea buktit dorvvu bearrašii ođđa eallinmuttus. Mii oažžut áššehasmáhcahaga das, ahte páhka buktagat leat vealtameahttumat máŋgga bearrašii, Petäjä muitala duogáža.
Kela ovdánahttá boahttevuođasge etniidpáhka áššehasmáhcahaga vuođul. Dienu etniidpáhkka vástida maiddái boahttevuođasge bearrašiid nuppástuvvi dárbbuide.
Kelas sáhttá bivdit etniidpáhkkii sámegielat vuosttasgirjji
Kelas sáhttá háliidettiin bivdit etniidpáhkkii sámegielat vuosttasgirjji. Diŋgoma sáhttá bargat sáddemiin šleađgapoastta čujuhussii saame@kela.fi. Kelas sáhttá diŋgot Illu rišaida! -vuosttasgirjji (pdf). Dan lassin sáhttá kela.fis oahpásmit ođđaseamos Loruleipuri dahje Leaikaláibu-vuosttasgirjji sámegielat jorgalusaide (pdf).