Geassi buktá nuppástusaid Kela bálvalanbáikkiid rabasáiggiide ja eará bálvalusaide

Geassit Kela-áššiid gánneha dikšut njuovžilit MuKelas dahje Kela telefonbálvalusas. Máŋggaid Kela bálvalanbáikkiid rabasáiggit nuppástuvvet geassái.

Kela bálvalanbáikkiid geasserabasáiggit bohtet fápmui muddu hávil miessemánu dahje geassemánu rájes, ja nohket maŋimustá 30.9.2025.

Rabasáiggiid, mat leat áiggidásis, gánneha dárkkistit čujuhusas www.kela.fi/palvelupisteet (suomagillii). Don sáhtát maiddái geahččat sierra listtá Kela bálvalanbáikkiid rabasáiggiin geassit 2025 (pdf, suomagillii). Eará bálvalanbáikkiid rabasáiggit eai rievdda. Bálvalanbáikkiide, mat leat áiggivárremiin rahpasat, sáhtát várret áiggi Kela telefonbálvalusas (suomagillii).  

Divššo Kela-ášši álkit neahtas dahje telefovnna bokte

Sáhtát dikšut stuorámus oasi Kela-áššiin njuovžilit neahtas. MuKelas (OmaKela) sáhtát ovdamearkan:

• ohcat ovdduid
• dárkkistit du oažžun mearrádusa
• geahččat doarjaga máksinbeaivve
• doaimmahit čuvvosiid.

Kela neahttasiidduin chatrobohtta rávve birra jándora. Chatrobohta vehkiin oaččut veahki earret eará áššiin, mat laktásit áigáiboahtodoarjagii, almmolaš ássandoarjagii, stuđeantadoarjagiidda ja bearašovdduide. MuKela chat bálvala maiddái geassit árggaid dmu 12–15.30. Gávnnat áigeguovdilis dieđuid Kela bálvalusain ja ovdduin geassit maiddái Facebookis ja Instagramis.

Jos it gávnna vástádusa iežat áššái neahtas, sáhtát riŋget Kela telefonbálvalussii. Telefonbálvalus lea rabas geassit vuossárggas bearjadahkii dmu 9–16, muhto mihcamárruohttan 20.6. telefonbálvalus lea gitta. Telefonbálvalusas sáhtát dikšut seamma persovnnalaš áššiid go bálvalanbáikkis.

Kela telefonbálvalussii sáhttá čálihit identitehta duođaštemiin MuKela bokte. Čáliheapmi identitehta duođaštemiin jođálmahttá áššiid dikšuma, daningo Kela áššedovdi oaidná dalán áššehasdieđuid, go vástida telefovdnii. Kelai sáhttá riŋget maiddái almmá čáliheami identitehta duođaštemiin, ja dalle áššehas identifiserejuvvo telefovnnas eará láhkai.

MuKelas sáhttá guođđit riŋgenbivdaga suoma-, ruoŧa- dahje eaŋgalsgielat telefonbálvalussii. Riŋgenbivdaga sáhttá guođđit seamma beaivái dahje maŋit árgabeaivái. Kela áššedovdi riŋge áššehassii diibmobeale siste válljejuvvon áiggis.

Sámegielat bálvalusat geassit

• Nuortalašgielat telefonbálvalus: Rabas duorastagaid dmu 9–11 nummiris 020 634 4795. Bálvalus lea gitta 2.6.–13.6.2025 ja 14.7.–1.8.2025.
• Davvisámegielat telefonbálvalus: Doaisttážii gitta.

Sámegielat áššehasat sáhttet guođđit oktavuođaváldinbivdaga šleađgapoastačujuhussii saame@kela.fi.

Mo divššun Kela-ášši, jos lagamus bálvalanbáiki lea gitta?

Jos it sáhte dikšut iežat ášši neahtas dahje telefovnna bokte ja lagamus Kela bálvalanbáiki lea gitta, sáhtát oažžut veahki Kela-áššiide maiddái eará sajis.

• Áššiiddikšunbáikkit ja eará bálvalanbáikkit: Máŋggain báikegottiin leat virgeoapmahaččaid oktasaš áššiiddikšunbáikkit, gos addojuvvo dábálaš rávven Kela-áššiin. Dan lassin Kela-áššiide oažžu veahki máŋggain Ohjaamoin, lagaštoarggain (lähitori) ja bálvalanguovddážiin.
• Kela gáiddusbálvalus: Máŋggain báikegottiin lea fállun Kela gáiddusbálvalus, man vehkiin sáhtát ságastallat Kela bargiin videooktavuođa bokte. Gáiddusbálvalus fállá seammalágan rávvema go Kela iežas bálvalanbáikkit.
• Báberpoastta sádden: Sáhtát doaimmahit áššebáhpáriid ja eará Kela-áššiid báberpoasttain čujuhussii: Kela, PL 10, 00056 KELA.

Loga lasi