Kela ja sámediggi ráđđádalle Anáris - áigáiboahtodoarjaga ovdorávvagat guorahallamii ja rájáid rasttildeaddji gažaldagaide iežas bargojoavku
Kela ja sámedikki jahkásaš ráđđádallamat ordnejuvvojedje 27.5. Sámekulturguovddáš Sajosis Anáris. Ráđđádallamiin bidjui deaddu dán háve erenoamážit sámekultuvrra ja sámegielaid vuhtiiváldimii ovdduin.
Álbmotealáhatlágádusa ja sámedikki ovttasbargu sámiid sosiáladorvvu buorideami várás ja sámi giellalága geatnegasvuođaid ollašuhttima várás vuođđuduvvá ovttasbargosoahpamuššii, mii ođastuvvui jagi 2021. Kela ja sámedikki jahkásaš ovttasbargoráđđádallamiin čuvvojuvvo soahpamuša mihttomeriid ollašuvvan nu, ahte vuojulduvvo jahkásaččat sierra temáide. Jagi 2025 ráđđádallamiin guorahallojedje erenoamážit Kela ovdorávvagat ja rájáid rasttildeaddji gažaldagat.
- Mis Kelas lea boahttevuođas mihttomearrin suokkardallat, man láhkai sáhtášeimmet vuhtiiváldit sámiid gielalaš ja kultuvrralaš vuoigatvuođaid Kela ovdduid gieđahallamii dárkkuhuvvon ovdorávvagiin ja dasto maiddái čoavddusgeavadiin. Vuosttas lávkámet lea guorahallat vuođđoáigáiboahtodoarjaga ovdorávvagiid ássama perspektiivvas, gávnnaha ovdduid ja bálvalusaid plánenovttadaga hoavda Mia Helle Kelas.
Bargojoavku guorahallat čovdosiid rájáid rasttildeaddji dáhpáhusaide
Ráđđádallamiin guorahallojedje sámiid sosiáladorvui guoski rájáid rasttildeaddji gažaldagat ovdamearkadáhpáhusaid vehkiin. Ráđđádallamiin mearriduvvui, ahte vuođđuduvvo bargojoavku, masa meroštallojedje barggut ja mihttomearit. Bargojovkui gullet sihke Kela ja sámedikki ovddasteaddjit.
-Máŋggat sámit barget, ásset ja geavahit bálvalusaid sierra riikkain, mii buktá hástalusaid sámiid giela ja kultuvrra vuhtiiváldimii sierra riikkaid sosiáladorvvus. Sávan, ahte bargojoavkkus gávdnet konkrehtalaš vugiid hástalusaid čoavdima várás, gávnnaha sámedikki ságajođiheaddji sadjásaš Tuomas Aslak Juuso.
Vássán jagi doaimmaid árvvoštallan ja boahttevuhtii geahččan
Ráđđádallamiin gevvojuvvojedje maiddái čađa vássán ja boahtte jagi doaibmabijut, mat laktásit sámiid sosiáladorvui. Dan lassin ságastallui earret eará sámiid sosiáladorvui laktáseaddji dutkamis, ja maiddái Kela ja sámedikki ráhkkaneamis doaibmabijuide, maid duohtavuođa- ja soabadankommišuvnna raporta, mii almmustahtto loahppajagis, eaktuda. Dilálašvuođas ovdanbuktui maiddái Suomi.fi sámegillii -bálvalus, mii ovddiduvvo virgeoapmahaččaid oktasaš sámegielat bálvalusaid ovddideami Mii ovttas -fierpmádaga oktavuođas.
Kela bálvalanhoavda Antti Jussila illuda buorremielalaš, gaskanas luohttámuššii ja oktasaš bargamii vuođđudeaddji ovttasbarggus, mii ii rádjašuva dušše jahkásaš ráđđádallamiidda.
- Dál Kela fállá áššehasbálvalusa telefovnna bokte ja gáiddusin nuortalašgillii ja maiddái dulkoma bakte anárašgillii ja davvisámegillii. OmaKela sámegielat veršuvnnas MuKelas sáhttá dikšut muhtin áššiid buot golmma sámegillii. Mii sávvat, ahte Kela sámegielat bálvalusaid geavaheapmi lassána ovddežis, ja ahte mii sáhttit ná iežamet beales doarjut sámegiela ja kultuvrra eallinfámolašvuođa min virgeoapmahašbargguin, gávnnaha Jussila.
Loga lasi