Fievrridansuorggi streaika sáhttá njoahcudit ovdduid gieđahallama – Kela rávve dikšut áššiid neahta bokte
Kelai poastta fárus sáddejuvvon ohcamušat ja čuvvosat sáhttet ádjánit fievrridansuorggi streaikka dihtii. Kela ávžžuha, ahte áššehasat sáddejit ohcamušaid ja čuvvosiid OmaKela-neahttabálvalusa bokte. Jos čuovus dahje lassičilgehus maŋŋona streaikka dihtii, Kela figgá leat njuovžil addojuvvon mearreáiggi ektui.
Biila- ja Fievrridansuorggi Bargiidlihttu AKT lea almmuhan streaikkas, mii lágiduvvo 15.–21.2.2023. Poastasuorggi bargiidlihttu PAU doarju streaikka 16.2. rájes. Streaikkat sáhttet njoahcudit poastta johtima.
Poasta árvvoštallá, ahte streaikka dihtii earret eará breavat sáhttet ádjánit máŋggaid beivviid dahje juoba badjel vahku. Kela áššehasaid dáfus dat dárkkuha dan, ahte mearrádusat sáhttet ádjánit, jos áššehas sádde ohcamuša, čuvvosiid dahje lassičilgehusa poastta fárus.
Kela rávve dikšut áššiid neahta bokte – maiddái telefonbálvalusas ja bálvalančuoggáin veahkehit
Vaikke Kela poastta fárus sádden mearrádusat sáhttet ádjánit streaikka dihtii, mearrádusat goittotge oidnojit dábálaččat OmaKela-neahttabálvalusas. Maiddái ohcamušat ja čuvvosat, maid áššehasat leat sádden, sáhttet maŋŋonit, ja danin lea vejolaš, ahte erenomážit bargguhisvuođaovdduid ja áigáiboahtodoarjagiid máksin maŋŋonit.
Kela áššehasaid gánneha nappo dikšut áššiid ovdasajis OmaKelas, gos streaika ii váikkut áššiid dikšumii. Bálvalussii sáhttá čálihit neahttabáŋkodovddaldagaiguin dahje mobiilanannejeaddjiin, ja bálvalusas sáhttá dárkkistit maiddái iežas ohcamuša gieđahallandili.
– Eanaš oassi Kela áššehasain geavaha jo OmaKela. Jos mange láhkai lea vejolaš, dál gánneha sirdásit dikšut Kela-áššiid neahtas, neavvu Kela áššehasovttadaga hoavda Soili Orre.
Dárbbu mielde Kela telefonbálvalusas ja bálvalančuoggáin veahkehit áššehasaid sin áššiid dikšumis neahta bokte ja maiddái veahkehit daid áššehasaid, geat eai sáhte dikšut áššiid neahta bokte.
Kela geahččala doaibmat njuovžilit
Kela geahččala váldit vuhtii iežas doaimmain streaikka dagahan ádjánemiid.
– Mii áddet Kelas, ahte buot áššehasat eai bastte dikšut áššiid elektrovnnalaččat. Dahkat buot maid sáhttit dan ovdii, ahte streaika ii váttásmahte min áššehasaid áigáiboahtima, dadjá Orre.
Kela čuovvu streaikka váikkuhusaid ja dieđiha dan áššehasaide ja oktasašbargoguimmiide.