Geassi buktá nuppástusaid Kela bálvalanbáikkiid rabasáiggiide
Geassit maid Kela-áššiid gánneha dikšut OmaKelas dahje riŋgemiin telefonbálvalussii. Máŋggain Kela bálvalanbáikkiin rabasáiggit nuppástuvvet geasi áigái, ja ođđa rabasáiggiide sirdásit 29.5.2023 rájes.
Sáhtát dikšut eanaš oasi Kela-áššiin neahtas: ohcat ovdduid, dárkkistit mearrádusa, oaidnit goas ovdu máksojuvvo, doaimmahit mildosiid ja sáddet Kelai teakstasániid. Kela neahttasiidduin chatrobohtta rávve áššiin, mat laktásit áigáiboahtindoarjagii, almmolaš ássandoarjagii, studeanttaid doarjagiidda ja bearašovdduide. Kela bálvala áššehasaid maiddái Facebookas ja Instagramas.
Jos du áššái ii gávdno vástádus neahtas, sáhtát riŋget Kela telefonbálvalussii. Telefonbálvalus lea geassit maid rabas vuossárggas bearjadahkii dmu 9–16. Telefovnnas sáhtát dikšut seamma persovnnalaš áššiid go bálvalanbáikkis. Bálvalannummirat leat sirrejuvvon eallindiliid mielde. Jus it gávnna heivvolaš nummira, sáhtát riŋget man beare nummirii.
Telefonbálvalussii sáhttá maiddái várret áiggi, dalle Kelas riŋgejuvvo áššehassii. Telefonáiggi sáhttá várret neahtas dahje nu, ahte riŋge man beare bálvalannummirii.
Sámegielat bálvalusat geassit
Kela davvisámegielat telefon- ja gáiddusbálvalus lea rabas olles geasi árggaid dmu 9–11 nummiris 020 634 2894. Kela nuortalašgielat telefon- ja gáiddusbálvalus lea rabas árggaid dmu 9–11 nummiris 020 634 4795 (gitta 10.7.–4.8.). Sámegielat áššehasat sáhttet guođđit maiddái oktavuođaváldinbivdaga šleađgapostii čujuhussii saame@kela.fi. Anárašgillii bálvalusa oažžu dulkka bokte. Gávnnat lassedieđuid Kela sámegielat bálvalusain čujuhusas www.kela.fi/saame.
Bálvalančuoggáid rabasáiggiin nuppástusat 29.5.2023 rájes
Máŋggain Kela bálvalanbáikkiin rabasáiggit nuppástuvvet geasi áigái. Geasserabasáiggit bohtet fápmui 29.5.2023 rájes ja nohket maŋimustá 30.9.2023.
Bálvalančuoggát, mat doibmet stuorát gávpogiid guovddážiin, leat rabas dábálaččat dahje measta dábálaččat. Unnit bálvalanbáikkiid oasil nuppástusat leat eanet. Bálvalančuoggá rabasáigedieđuid gánneha dárkkistit suomi.fi -siiddus.
Mo divššun Kela-ášši, jus dat ii lihkostuva neahtas iige telefovnnas ja lagamus bálvalanbáiki lea gitta?
Máŋggain báikegottiin lea virgeoapmahaččaid oktasaš áššiiddikšunbáiki, gos rávvejuvvo almmolaš dásis Kela-áššiin. Kela-áššiin oažžu rávvema maiddái ovdamearkka dihte Ohjaamoin, Lähitoriin ja bálvalanguovddážiin. Lassin máŋggain báikegottiin lea Kela gáiddusbálvalus, dahje dihtor, man bokte oaččot Kela áššedovdái govva- ja jietnaoktavuođa. Gáiddusbálvalus vástida Kela iežas bálvalanbáikki bálvaleami. Sáhtát dárkkistit suomi.fi -siidduin, gos lea lagamus báiki, mas oažžu Kela gáiddusbálvalusa.
Sáhtát maiddái váldit oktavuođa ruoktogieldda sosiálabálvalusaide, lápmásiidbálvalusaide dahje dearvvasvuođafuolahussii, gos du sáhttet veahkehit ovdamearkka dihte telefonáiggi várremis. Go dutnje várrejuvvo telefonáigi, Kela áššedovdi riŋge dutnje sohppojuvvon áigge, iige riŋgen mávsse maidige.
Báberpoastta gánneha sáddet Kelai čujuhussii Kela, PL 10, 00056 Kela.
Bálvalanbáikkiid rabasáiggit 29.5.2023 rájes (suomagillii)