Kela čielggada sámegielagiidda oaivvilduvvon veajuiduhttinbálvalusaid dálá dili
Kela dutkamuš čielggada sámegielat veahkadahkii oaivvilduvvon Kela veajuiduhttinbálvalusaid dálá dili. Čielggadeamis jearahallat sin, geat leat oassálastán veajuiduhttinkurssaide ja sáddet gažadeami daidda, geat rávvejit veajuiduhttimii.
Kela dutkamuš dahká čielggadeami, mas kártejit sámegielagiid oainnuid Kela veajuiduhttinbálvalusaid ektui. Dutkamušas čielggadit ovdamearkka dihte dan, man duđavaččat áššehasat leat leamašan bálvalussii. Veajuiduhttimii rávvejeddjiid dáfus čielggadit dan, mo sii rávvejit sápmelaččaid veajuiduhttimii.
Čielggadeapmi lea guovtti oasis. Čielggadeapmi álggii giđđat 2023, go kártejedje ja geahčadedje girjjálašvuođa. Čuovvovažžan jearahallat veajuiduhttimii oassálastiid ja gažadit daid, geat rávvejit veajuiduhttimii. Čielggadeami várás jearahallat áššehasaid, geat leat oassálastán sámegielagiidda oaivvilduvvon Tules- ja IKKU-kurssaide. Dutkanjearahallamat leat sámegillii ja suomagillii.
Sámegielat veajuiduhttima birra unnán dutkamuš
Čielggadeami vásttolaš dutkin bargá Kela dutkamuša joavkohoavda Sari Miettinen. Miettisa dutkansuorggit laktásit viidát veajuiduhttinvuogádahkii ja sosiála- ja dearvvašbálvalusvuogádahkii. Miettinen lea geahčadan erenomážit dan, mo áššehasaid rávvejit sin dárbbuid mielde veajuiduhttinbálvalusaide. Maŋimuš áiggiid Miettinen lea dutkan veajuiduhttimii rávvema erohusaid guovlluid mielde ja maiddái Kela ja eará doaibmiid gaskasaš ovttasbarggu.
– Čielggadeapmi lea dárbbašlaš, daningo dutkamuš sámegielat veajuiduhttimii rávvema ja áššehasaid bálvalusduđavašvuođa birra lea duođaid unnán. Dán čielggadeami vuođul beassat buorebut smiehttat, mo ovddidit sámegielagiidda oaivvilduvvon veajuiduhttima, Sari Miettinen muitala.
Sámegielagiidda oaivvilduvvon veajuiduhttima dálá dili čielggadeapmái lea Suoma beal Sámediggi addán searvvušlaš miehtama. Čielggadeami leat plánen ja materiála čoaggán ovttas sámedikki ja Lappi buresveadjinguovllu ovddasteddjiiguin.
Sámegielat sáhttá oažžut dulkoma maiddái eará veajuiduhttimiidda, maid Kela ordne
Kela ordne jahkásaččat moadde sámegielat joavkkuide oaivvilduvvon veajuiduhttinkurssaid. Veajuiduhttinkurssas veajuiduvvi oažžu doarjaga buohcuvuođas dahje lámisvuođas veajuiduvvamii. Kurssas oažžu maiddái dieđu buohcuvuođa birra, veardásašdoarjaga ja doarjaga árgga doaimmaide.
Sámegielagiid veajuiduhttinkurssaid lágidit suomagillii ja dulkojit dárbbu mielde iešguđet sámegillii. Sámegielagat sáhttet oažžut dulkoma maiddái eará veajuiduhttimiidda, maid Kela ordne.
Kela neahttasiidduin muitalit dárkileappot sihke sámegielagiid veajuiduhttinkurssaid ja maid eará Kela veajuiduhttinbálvalusaid birra.