Ráđđehusprográmma linnje máŋggaid nuppástusaid sosiáladorvui – Kela ráhkkana doaibmabidjui ja addá dieđuid nuppástusain dađi mielde go mearrádusdahkan ovdána

Ođđa ráđđehusprográmma sisttisdoallá máŋggaid nuppástusaid, mat gusket sosiáladorvvu. Kela oahpásnuvvá ráđđehusprográmmii ja ráhkkana boahttevaš mearrádusaid doaibmabidjui. Nuppástusat eai dáhpáhuva dalán, muhto dain muitaluvvo áššehasaide dađi mielde go mearrádusdahkan daid birra ovdána.

Bearjadaga almmustahtton ođđa ráđđehusprográmma sisttisdoallá máŋggaid sosiáladorvvu nuppástusaid ja linnjemiid, mat váikkuhit Kela doaimmaide ja áššehasaid árgii. Ráđđehusprográmma mielde válgabaji áigge lea dárkkuhussan ollašuhttit mearkkašahtti nuppástusaid earret eará ássama doarjagiidda, bargguhisvuođadorvui ja áigáiboahtindoarjagii. Maiddái ođđa Kela-buhtadanmálle ja ovtta ohcamuša málle ovddideapmi váikkuhit viidát sihke Kelai ja dan ovttasbargoguimmiide ja áššehasaide.

– Mii leat čuvvon ráđđehusráđđádallamiid ovdáneami garrasit ja fállan dutkojuvvon dieđu ja evttohusaid, maid mii leat dan vuođul dahkan sosiáladorvovuogádaga buorideapmi várás. Dál mii oahpásnuvvat ráđđehusprográmmii fuolalaččat ja ráhkkanit boahttevaš mearrádusaid doaibmabidjui, Kela oaivehoavda Outi Antila muitala.

Nuppástusat eai ollašuva dalán

Ođđa ráđđehusprográmma linnje máŋggaid nuppástusaid maiddái doarjagiidda ja bálvalusaide, maid Kela fállá iežas áššehasaide. Ođastusat, mat leat ráđđehusprográmmas, eai ollašuva dalán, muhto sirdásit dábálaš mearrádusdahkanprosessii. Láhkaásaheami nuppástusas galgá vuos válmmaštallat ráđđehusa evttohusa, mii manná riikkabeivviid gieđahallamii.

– Mii áddet, ahte máŋggat ráđđehusprográmmas evttohuvvon nuppástusat boktet fuola min áššehasain. Ráđđehusprográmma viggá seastit miljárddaid almmolaš ekonomiijas, ja váikkuhusat čuhcet maiddái Kela doarjagiidda ja áššehasaide. Dán muttus mii eat goittotge vel dieđe, mo boahttevaš láhkaásaheapmi váikkuha min áššehasaid ovdduide ja bálvalusaide. Dát áššit čovdojuvvojit láhkagárvema oktavuođas, Antila dadjá.

Áššehasaide Kela addá dieđu boahttevaš nuppástusain iežas kanálaid bokte dalán, go mearrádusaid sisdoallu ja detálljat dárkkálnuvvet.

– Mii doallat lávga oktavuođa maiddái min ovttasbargoguimmiide, dego buresveadjinguovlluide ja gielddaide. Dál mii dárbbašit aktiivvalaš dieđuid juohkima ja ovttasbarggu, vai olbmot ožžot áigedássidis dieđuid nuppástusain, mat váikkuhit sidjiide alcces dahje lagašolbmuide, dadjá Antila.