Ráđđehus evttoha buorideami ahkeolbmuid doavtterbálvalusaide
Ráđđehus evttoha, ahte 1.9.2025 rájes 65 deavdán olbmot oččošedje Kela buhtten priváhta vuođđodoavtterbálvalusaid almmolaš dearvvasvuođafuolahusa áššehasmávssu hattiin. Kela buhttešii maiddái dábáleamos laboratorio- ja govvendutkamiid, mat leat mearriduvvon vuostáiváldimis. Jearaldagas lea geahččaleapmi, mii bisttášii jagi 2027 loahpa rádjai. Geahččaleapmi lea oassi ráđđehusa mihttomearis ovddidit Kela buhttenortnega ja buoridit ahkeolbmuid máŧolašvuođaid oažžut alladássásaš dearvvasvuođafuolahusa.
Geahččaleami ánssus 65 jagi deavdán olbmot sáhtášedje hálidettiin beassat johtilabbot doaktára vuostáiváldimii almmá divššu dárbbu árvvoštallama haga várremiin áiggi priváhta vuođđodoaktáris.
-
Áššehas mávssášii vuođđodoaktára vuostáiváldinfitnamis eanemustá 28,20 euro iežasvásttu (jagi 2025).
-
Buhtadusa oaččošii maiddái vuođđodoaktára mearridan dihto dutkamušain, main buhtadus livčče 50 % dutkamuša bajimuš hattis.
-
Dutkamušaide ja vuostáiváldinfitnamiidda boađášii bajimuš haddi (haddegáhttu), mii dáhkidivčče dan, ahte áššehasaide eai boađe govttohis golut.
Buhtadusaid oažžun eaktuda, ahte priváhta bávalusbuvttadeaddji lea bargan soahpamuša Kelain. Áššehasat sáhtášedje oažžut buhtadusa eanemustá golmma fitnamis vuođđodoaktára luhtte jagis, muhto jagi 2025 áigge buhttejuvvošedje eanemustá guokte fitnama.
Buhtadusa oaččošii njuolggobuhtadussan dalán vuostáiváldimis. Kela nannešii dutkamušaid, mat sierra buhttejuvvojit, ja daid bajimuš hattiid stáhtaráđi ásahusa vuođul. Kela almmustahtášii maiddái bálvalusbuvttadeaddjiid, geat leat geahččaleamis mielde, oktavuođadieđuid neahttasiidduin.
Geahččaleami mihttomearrin lea buoridit ahkeolbmuid beassama vuođđodoaktára vuostáiváldimii ja geahpedit almmolaš dearvvasvuođafuolahusa noađuhusa. Máŋggat 65 jagi deavdán olbmot eai šat leat bargodearvvasvuođafuolahusa biirres, ja priváhta buohcooajut leat dávjá ahkeolbmuide divrasat dahje váddásit oažžumis.
Geahččaleapmi lasiha áššehasaid válljenfriijavuođa, dasgo sii sáhttet válljet sullii seamma olu máksi priváhta dahje almmolaš bálvalusa sihke alcces heivvoleamos doaktára bálvalusbuvttadeaddjiin, geat oassálastet geahččaleapmái. Mihttomearrin lea johtilut dikšumii beassan, mii sáhttá eastit váddásut dearvvasvuođaváttisvuođaid ovdáneami ja geahpedit dárbbu gohcin- ja spesiálabuohccedikšuma bálvalusaide.
Árvvoštallamiid mielde oassi almmolaš dearvvasvuođafuolahusa áššehasain sirdásivčče priváhta dearvvasvuođafuolahussii, mii sáhttá oanidit dikšunráidduid buresveadjinguovlluin. Dát sáhttá friijadahttit resurssaid erenomážit daidda, geat geavahit ovdasajis almmolaš bálvalusaid.