Haldâttâsohjelm iävtut maaŋgâid nubástusâid sosiaaltorvon – Kela ráhtádâttâđ tooimânpieijâmân já tieđeet nubástusâin ko miärádâstoohâm ovdán

Uđđâ haldâttâsohjelm siskeeld maaŋgâid sosiaaltorvon kyeskee nubástusâid. Kela uáppáásm haldâttâsohjelmân já ráhtádâttâđ puáttee miärádâsâi tooimânpieijâmân. Nubástusah iä olášuu tállán, tain muštâluvvoo äššigâssáid ton mield ko taid lohtâseijee miärádâstoohâm ovdán. 

Vástuppeeivi almostittum uđđâ haldâttâsohjelm siskeeld maaŋgâid sosiaaltorvon lohtâseijee nubástusâid já linjiimijd, moh vaigutteh Kela tooimân já äššigâsâi aargân. Haldâttâsohjelm mield valjâpaje ääigi lii tárguttâs olášuttiđ merhâšittee nubástusâid eereeb iärrás aassâm torjuid, pargottesvuođâtorvon já áigápuátutorjui. Meiddei uđđâ Kela-sajanmáksumalli sehe oovtâ ucâmuš maali ovdedem vaigutteh vijđáht sehe Kelan ete tom ohtsâšpargokuoimijd já äššigâssáid.

– Mij lep čuávvum haldâttâsráđádâlmij ovdánem čovgâsávt já faallâm tutkum tiäđu sehe tom vuáđuld mii porgâm iävtuttâsâid sosiaaltorvovuáháduv pyeredem várás. Tääl uápásmup haldâttâsohjelmân huolâlávt já ráhtádâttâp puáttee miärádâsâi tooimânpieijâmân, Kela válduhovdâ Outi Antila muštâl.

Nubástusah iä olášuu tállán

Uđđâ haldâttâsohjelm linjáá maaŋgâid nubástusâid meiddei torjuid já palvâlussáid moid Kela fáálá äššigâsâidis. Haldâttâsohjelmist leijee uđâsmitmeh iä olášuu tállán ko toh sirdâšuveh normaal miärádâstoohâmprosesân. Lahâasâttem nubástuumeest kalga vistig valmâštâllâđ haldâttâs iävtuttâs, mii mana ovdâskode kietâdâlmân. 

– Mii iberdep, ete maŋgâ haldâttâsohjelmist iävtuttum nubástus taha äššigâsâinân huolâ.  Haldâttâsohjelm sihtee miljardluoka šiäštoid almolâš ekonomiast, já vaiguttâsah čyecih meiddei Kela torjuid já äššigâssáid. Taan muddoost mij ep kuittâg vala tieđe, maht puáttee lahâasâttem vaaigut mii äššigâsâidân hiäđoid já palvâlussáid. Taah ääših čovdâšuvvojeh lahâvalmâštâllâm ohtâvuođâst, Antila iätá. 

Äššigâssáid Kela tieđeet puáttee nubástusâin jieijâs kanavain tállán, ko miärádâsâi siskáldâs já detaljeh tärhišuveh.

– Mii toollâp eivi ohtâvuođâ meiddei mii ohtsâšpargokuoimijguin, tego pyereestvaijeemkuávloid já kieldáid. Tääl mij tarbâšep aktiivlâš tiäđui jyehim já oovtâstpargo, vâi ulmuuh uážžuh äigikyevdilis tiäđu nubástusâin moh kyeskih sijjân já sii aldaulmuid, Antila iätá.