Kela vajodittem kevttim GAS-meetood materialeh kávnojeh tääl meid kuulmâ sämikielân
Kela vajoditmist lii kiävtust GAS-meetood vajodittem uulmij rähtim já tai olášume árvuštâllâm niävvun. GAS-meetood Kietâkirje já Jieččân ulmeh -luámáttâh kávnojeh tääl meid tavesämikielân, anarâškielân já nuorttâlâškielân.
GAS-meetood (Goal Attainment Scaling) tuáimá Kela vajoditmist uulmij rähtim já árvuštâllâm niävvun. Vajoditmist miäruštâllojeh oovtâst äššigâssáin ulmeh, moh láá realistliih já äššigâsân teháliih, moid puáhtá rähtiđ äigitaavlu já maid puáhtá čäälliđ pajas já mittediđ. Uulmij juksâm árvuštâlloo. GAS-meetood taha máhđulâžžân kvaliteetlii uulmij mittedem, mii iššeed vajodittem hiäđu árvuštâlmist já raportistmist.
Äššigâs ulmeh ráhtojeh Jieččân ulmeh -luámáttuvváin vajodittem aalgâst, já toh árvuštâllojeh vajodittem ääigi já ko vajodittem nohá. Uulmij várás miäruštâlloo viiđâ tääsi ciäkkáduv, mast koskâtääsi (0) kovvee ulme juksâm tego lii vuordum, já eres tääsih kovvejeh jo-uv hiäjub (-1, -2) tâi pyereeb (+1, +2) juksâm.
GAS-meetood kevttim váttoo puoh Kela tagarijn vajodittempalvâlusâin, moi olášuttem stivree palvâlemkuvvim.
Kela oovded sämikielâlij vajodittem väldimáin huámmášumán kielâlijd vuoigâdvuođâid
Kela viggá ovdediđ säämi kielâlaavâ uulmij já sämmilij tuođâlii oovtâviärdásâšvuođâ olášume keevâtlii elimist. Sämmilij kielâliih vuoigâdvuođah kyeskih meid Kela vajodittempalvâlussáid, já äššigâsâst lii vuoigâdvuotâ kevttiđ sämikielâ Kela vajodittemääši kieđâvušmist. Kela uárnee tääl Tules-kuursâid sämikielâláid, já sämikielâliih pyehtih haalijddijn finniđ tulkkum meid eres Kela ornim vajoditmáid. Kela lii jurgâlâm sämikieláid meid vajodittem uuccâmluámáttuvâid. Luámáttuvah kávnojeh Kela sämikielâlijn nettisiijđoin.
GAS-meetood jurgâlempargo lii olášum uássin Vajodittem sämikielâláid -proojeekt, mast ovdeduvvoo já keččâluvvoo sämikielâláid čuosâttum vajodittempalvâlus, mii váldá huámmášumán kielâ já kulttuur. Viggâmuš lii, ete vajodittempalvâlus, mii keččâluvvoo projektist, álgá ive 2026 aalgâst. Vajodittempalvâlus, mii váldá huámmášumán äššigâs individuaallijd táárbuid, lii uáivildum 18–67-ihásáid sämikielâláid tâi sämikulttuur miäldásii vajodittem tarbâšeijee äššigâssáid, kiäin láá mielâtiervâsvuođâ hástuseh. Vajodittempalvâlusân stivriimist já ucâmist tieđettuvvoo já almostittoo jieijâs nettisijđo čohčâmáánust 2025.
Uáppáásm sämikielâláid materialáid
GAS-meetood kietâkirje
GAS-luámáttâh (Jieččân ulmeh)
Kela luámáttuvah persovnäššigâssáid