Pááppárpostâ nohá – Kela reeivah puátih puátteevuođâst tuš MuuKelan
Kela tooimât miärádâsâid já reeivâid tuš MuuKelan 15.1.2026 rääjist. Pááppárpoostâ finnejeh puátteevuođâst äššigâsah, kiäh iä keevti MuuKela. Sämikielâliih ulmuuh finnejeh miärádâsjurgâlusâid ain pááppárpostân.
Kela miärádâsâi já reeivâi toimâttemvyehi muttoo 15.1.2026. Äššigâsah, kiäh kevttih MuuKela já láá almottâm jieijâs šleđgâpostâčujottâs tâi puhelinnummeer, finnejeh miärádâsâid já reeivâid puátteevuođâst tuš šleđgâlávt MuuKelan. Siämmáá reeivâ iä innig vuolgât poostâ peht. Ko MuuKelast lii uđđâ miärádâs tâi reivâ luuhâmnáál, te äššigâs finnee almottâs Suomi.fi-viestân, šleđgâpostân tâi tekstâviestân.
Nubástus vuáđuduvá skammâmáánust 2025 tuhhiittum Kela-laavâ uđâsmitmân já tuárju šleđgâlii ášástâllâm vijđedem. Ive 2025 Kela vuolgâttij suulân 6 miljovn reivâd pááppárpostân já suulân 9 miljovn pááppárttáá. Šiäštuh printtim- já postâdemkoloin šoddii suulân 6 miljovn eurod moonnâm ive.
– Miärádâsah já reeivah láá lamaš finniimist MuuKelast jo kuhháá, já paijeel 1,5 miljovn äššigâssâd láá jo luoppâm pááppárpoostâst. Šleđgâlâš ášástâllâm lii maŋgâsân jotelumos já älkkeemus vyehi finniđ tiäđu miärádâsâin. Nubástus keeppid tušes postâdem já jođálmit tiäđujotteem, iätá juávkkuhovdâ Anu Lantonen Kela hiätuäššikirjepyevtitmist.
Almottâs miärádâsâin já reeivâin, moh láá MuuKelast, puátá Suomi.fi-viestáid
Almottâsah visásmiteh, ete äššigâs finnee tiäđu miärádâsâst tâi reeivâst tállân, ko tom puáhtá luuhâđ MuuKelast. Almottâs uđđâ miärádâsâst tâi reeivâst MuuKelast vuolgâttuvvoo šleđgâpostâčujottâsân, mii lii vyerkkejum Suomi.fi-palvâlusân. Suomi.fi-heiviittâs kevtteid almottâs puátá meid heiviittâs peht. Äššigâssáid, kiäh iä keevti Suomi.fi-viestâid, Kela vuolgât almottâs šleđgâpostân tâi tekstâviestân.
Pááppárpostâ siäilu tiätu tiilijn
Äššigâsah, kiäh iä keevti MuuKela, finnejeh ain miärádâsâid já reeivâid pááppárpostân. Meid äššigâs, kote kiävttá MuuKela, puáhtá haalijddijn valjiđ pááppárpoostâ. Valjim tahhoo MuuKelast tâi Kela äššigâspalvâlusâst.
Nubástus ij kuoskâ ulmuid, kiäh iä jiejah tubdâttât MuuKelan, peic láá adelâm nube ulmui vääldi ášástâllâđ jieijâs peeleest. Äššiolmooš puáhtá kuittâg luoppâđ pááppárpoostâst MuuKelast ton ulmuu peeleest, kiäi aašijd sun hoittáá.
Uási reeivâin toimâttuvvojeh puátteevuođâst-uv sehe MuuKelan já poostâ peht. Taah láá eereeb iärrás reeivah, moh lohtâseh peerâiäláttuvváid, iäláttuv pärnialadâsân, iäláttâhtorjui já vádulijtorjuid. Áigápuátutorjuu máksučonnâsmeh já ärbipeesij reeivah vuolgâttuvvojeh ain tuš pááppárpostân.
Sämikielâliih miärádâsjurgâlusah já eres sämikielâliih reeivah Kelast vuolgâttuvvojeh äššigâsân ain poostâ peht. Sämikielâlâš olmooš finnee Kelast miärádâs vistig jo-uv suomâkielân tâi ruotâkielân aalmugregistertiäđoid merkkejum ášástâllâmkielâ mield jo-uv MuuKelan tâi reivân jieijâs valjim mield. Tast maŋa Kela jurgâlit miärádâs sämikielân, jis äššigâs lii uuccâm hiäđu sämikielân tâi mudoi puáhtám oovdân jieijâs tuoivuu ášástâllâđ sämikielân.
Ive 2026 meid eres virgeomâhááh tooimâtškyetih reeivâid vuosâsaajeest šleđgâlávt, ko šleđgâlii ášástâllâm vuosâsajasâšvuotân kyeskee laahâ puátá vuáimán. Äigitavlu tärhišuvá, ko kieđâvuššâm ovdâskoddeest ovdán.
Lasetiäđuh
Kela miärádâsâi já reeivâi toimâttemvyehi muttoo (suomâkielân)
Virgeomâhâšpostâ puátá ive 2026 aalgâ rääjist vuosâsaajeest šleđgâlávt (dvv.fi, suomâkielân)