Enijpakkeet jyehim álgá – mieldi ovdiist eenâb pyevtittâsah
Tääl almostittum enijpakkeet ana sistees ovdiist eenâb pyevtittâsâid, tastko enijpakkeet árvu stuárui taan ive. Kela lii jyeviškuáttám pakkeet äššigâssáid.
Enijtoorjâ lii enijpakkeet tâi 210 euro ruttâsumme. Enijpakkeet mulsâšuvá jyehi ive váhá sierâ ääigi. Pakkeet mulsâšuvá, ko ovdebááh paketteh láá juohhum loopân.
Enijtoorjâ stuárui ive aalgâst
Táválávt maŋalij iivij paketteh iä iärrán merhâšitteht koskânis. Enijpakettist, mii tääl puátá jyehimnáál, láá kuittâg ovdiist eenâb pyevtittâsah, tastko enijtoorjâ stuárui 170 eurost 210 euron. Enijtorjuu áárvu stuárrum lohtâs haldâttâs uulmán nanodiđ päikkituálui luáttámuš puátteevuotân.
– Enijpakkeet áárvu stuárrum mield tääl jyehimnáál enijpakkeet fáálá iänán já umogâžân ovdiist pyereeb torjuu uđđâ eellimmuddoost, Kela äššitobdee Veera Petäjä muštâl.
Enijpakkeet vuáváámist smiettâp eenijd já umogâšâid. Pyevtittâsah väljejuvvojeh kriterijguin, moh vuáđuduvvojeh kvaliteetân já torvolâšvuotân. Meid äššigâsmacâttâs lii merhâšittee roolist enijpakkeet vuávámpargoost.
– Ko jieijâs umogâš šadda nuuvt ennuv, ete pyevtittâsah iä innig heivii, te pyevtittâsâid puáhtá adeliđ ovdâskulij. Kelan já perruid lii tehálâš, ete enijpakkeet pyevtittâsâid puáhtá kevttiđ kuhháá, Petäjä paahud.
Uđđâ enijpakettist: pállu já seŋgâloová koveh
Enijpakettist, mii lii tääl puáttám jyehimnáál, lii mieldi pállu. Ton ruttâd haldâttâsohjelmist leijee Suomi liikkeelle -ohjelm, mon ulmen lii finniđ syemmilij lihâdiđ eenâb. Enijpakkeet timmâ já ivnáás pállu tuárju vaanhim já umogáá vuáruvaikuttâs sehe movtijdit perruid ohtsii porgâmân.
Uđđâ enijpakettist láá seŋgâloová koveh. Taid lii vuávám kovvejeijee Eveliina Muotkavaara já nommâ lii Kuvitellaan tulevaa (Kuvâttâllâp puáttee ääigi).
– Mun halijdim rähtiđ kuuvijd, moh ilosmiteh já adeleh lieggâ tobdoid taan perruid áinoošlajâsii eellimmuddoost. Persikivnásiih komovuotâkovoseh kočoh kuvâttâllâđ puáttee ääigi já šoddâm, Muotkavaara valdâl.
Enijpakettân puáhtá tiiláđ sämikielâlii vuosâkirje
Sämikielâliih perruuh pyehtih tiiláđ enijpakettân teddilum sämikielâlii vuosâkirje. Vuosâkirje puáhtá tiiláđ luámáttuvváin SV 300 (pdf, suomâkielân). Tiilámluámáttâh kávnoo kela.fist meid kuulmâ sämikielân:
Teddilum vuosâkirje lasseen enijpakettist leijee uđđâsub suomâ- já ruotâkielâlii vuosâkirje sämikielâláid jurgâlussáid puáhtá uápásmuđ kela.fi sämikielâlijn siijđoin.
Uáppáásm enijpakettân
Tääl almostittum enijpakkeet ana sistees ovdiist eenâb pyevtittâsâid, timmâ pállu já uđđâ seŋgâloová koveh. Kela lii jyeviškuáttám pakkeet äššigâssáid.